Kũniina Ngarari Maũndũ-inĩ ma Biacara

Ta ũrĩa honanĩtio rĩandĩko-inĩ rĩa 1 Akorintho 6:1-8, mũtũmwo Paulo nĩ aarĩrĩirie ũhoro wa Akristiano gũtwara arĩa angĩ igooti-inĩ. Nĩ aarakaririo nĩ ũndũ wa Akristiano amwe thĩinĩ wa Korintho gũthiĩ ‘gũcira mbere ya andũ arĩa matarĩ athingu.’ (Mũhari wa 1) Paulo onanirie wega atĩ Akristiano matiagĩrĩirũo nĩ gũthitangana magooti-inĩ, no magĩrĩirũo kũniinĩra ngarari ciao o thĩinĩ wa kĩũngano. Rekei twĩcirie ũhoro wa kĩrĩa gĩatũmire ũtaaro ũcio ũheanwo na tũcoke twarĩrĩrie maũndũ mangĩ matahutĩtio nĩ ũtaaro ũcio.

Angĩkorũo twĩ na ngarari cia kĩbiacara na Mũkristiano ũrĩa ũngĩ-rĩ, tũngĩamba kũgeria gũciinina kũringana na ũrĩa Jehova oigĩte, no ti ũrĩa tũreciria. (Thimo 14:12) O ta ũrĩa Jesu onanirie, nĩ wega kũniina ngarari o na ihenya itanatuĩka ũndũ mũnene. (Mathayo 5:23-26) O na kũrĩ ũguo-rĩ, ũndũ wa kĩeha nĩ atĩ, Akristiano amwe nĩ magĩaga na ngarari mũno, nginya magatwarana igooti-inĩ. Paulo oigire ũũ: “Ũndũ ũcio wa gũthitakana inyuene nĩ ihĩtia rĩmũthũkĩire mũno.” Nĩkĩ? Gĩtũmi kĩnene nĩ atĩ ũndũ ta ũcio no ũthũkie ngumo njega ya kĩũngano o hamwe na ya Ngai ũrĩa tũthathayagia. Kwoguo-rĩ, nĩ twĩciragia mũno ũhoro wa kĩũria gĩkĩ gĩa Paulo: “Githĩ ti kaba mwĩtĩkagĩre gwĩkwo ũũru?”—Mũhari wa 7.

Paulo ningĩ nĩ onanirie atĩ Ngai nĩ aahete kĩũngano mũbango mwega wa kũniina ngarari cia mĩthemba mĩingĩ. Athuri a kĩũngano nĩ Akristiano me na ũmenyo nĩ ũndũ wa ũũgĩ wa ma ya Maandĩko, na Paulo oigĩte atĩ no ‘mahote gũciira’ igũrũ rĩa “maũndũ marĩa makoniĩ muoyo ũyũ wa ndũire.” (Mũhari wa 3-5) Jesu onanirie atĩ ngarari ciĩgiĩ mehia maritũ, ta gũcambania na gũtunyana ciagĩrĩire kũniinwo andũ makĩhũthĩra mũtaratara wa makinya maya matatũ: rĩa mbere, andũ acio marahutio nĩ ũndũ ũcio magerie kũniina ngarari icio marĩ oiki; rĩa kerĩ, angĩkorũo nĩ maremwo nĩ gwĩka ũguo me oiki-rĩ, magĩrĩirũo nĩ kũhũthĩra mũira ũmwe kana erĩ; rĩa gatatũ, angĩkorũo nĩ maremanwo o na mahũthĩra ikinya rĩu rĩa kerĩ-rĩ, magĩrĩire kũmenyithia athuri a kĩũngano ũhoro ũcio.—Mathayo 18:15-17.

Athuri a kĩũngano ti mawakiri kana andũ a biacara na matiagĩrĩire kũhũthĩka na njĩra ĩyo. Matiugaga ũrĩa ngarari cia biacara cigũtuithanio. Ithenya rĩa ũguo-rĩ, mageragia gũteithia andũ acio me na ngarari mahũthĩre Maandĩko nĩ getha maiguithanie. Maũndũ mangĩritũha mũno no mahoe ũtaaro kuuma kũrĩ mũrori wa mũthiũrũrũko kana kũrĩ wabici ya rũhonge ya Aira a Jehova. No o na kũrĩ ũguo-rĩ, nĩ kũrĩ maũndũ makoragwo matahutĩtio nĩ ũtaaro ũcio wa Paulo. Nĩ ta marĩkũ?

Rĩmwe-rĩ, gũthitangana no gũkorũo kũrĩ mũtaratara wa kũhingĩrio ũndũ mũna ũtarĩ wa kwĩyenda no nĩ wa gũcaria thayũ. Kwa ngerekano-rĩ, igooti no rĩkorũo norĩo riki rĩngĩheana marũa ma ndigano, rĩngĩheana rũũtha rwa kũrera mwana, gũtua marĩhi marĩa mũndũ ekũheo thuutha wa ndigano, kana marĩhi mangĩ o mothe, na ũrĩa indo ikũgayanwo. Ningĩ nĩ kũrĩ mahinda mangĩ mũrũ wa Ithe witũ angĩona kwagĩrĩire gũthitanga ũrĩa ũngĩ nĩgetha egitĩre ciira mũna.a

Maciira ta macio mangĩciirũo hatarĩ na roho wa gĩcindano-rĩ, no maage kwagarara ũtaaro wa Paulo ũrĩa watongoririo nĩ roho.b No o na kũrĩ ũguo-rĩ, muoroto ũrĩa mũnene wa Mũkristiano wagĩrĩirũo gũkorũo arĩ gũtherio kwa rĩĩtwa rĩa Jehova o hamwe na thayũ na ũiguano wa kĩũngano. Ngumo ĩrĩa nene ĩmenyithanagia arũmĩrĩri a Kristo nĩ wendani, na “wendani . . . ndũcaragia ũrĩa ũngĩĩguna guo mwene.”—1 Akorintho 13:4, 5; Johana 13:34, 35.