Macokio ma Ciũria cia Bibilia

Hihi no ũhote gũtaũkĩrũo nĩ Bibilia?

Bibilia nĩ Kiugo kĩa Ngai. Nĩ ta marũa moimĩte kũrĩ mũciari ũrĩ na wendo. (2 Timotheo 3:16) Thĩinĩ wa Bibilia, Ngai nĩ atarĩirie ũrĩa tũngĩka nĩguo tũmũkenie, kĩrĩa gĩtũmĩte etĩkĩrie waganu, na maũndũ marĩa arĩkĩra andũ mahinda marĩa mokĩte. No arutani a ndini nĩ mogometie ũrutani wa Bibilia; nĩ ũndũ ũcio andũ aingĩ mageciria matingĩhota gũtaũkĩrũo nĩyo o rĩ.—Atũmwo 20:29, 30.

Jehova Ngai endaga tũmenye ma ĩmwĩgiĩ, nĩkĩo atũheete ibuku tũngĩhota gũtaũkĩrũo nĩrĩo.​—Thoma 1 Timotheo 2:3, 4.

Nĩ kĩĩ kĩngĩgũteithia ũtaũkĩrũo nĩ Bibilia?

Makĩria ma gũtũhe Bibilia, Jehova nĩ atũheaga ũteithio nĩguo tũtaũkĩrũo nĩyo. Nĩ aatũmire Jesu atũrute. (Luka 4:16-21) Jesu aateithagia athikĩrĩria ake gũtaũkĩrũo nĩ Maandĩko na njĩra ya kwarĩrĩria mũhari ũmwe thutha wa ũrĩa ũngĩ.​—Thoma Luka 24:27, 32, 45.

Jesu aambĩrĩirie kĩũngano gĩa Gĩkristiano nĩgetha wĩra ũrĩa aambĩrĩirie ũthiĩ na mbere. (Mathayo 28:19, 20) Mahinda-inĩ maya, arũmĩrĩri a ma a Jesu nĩ mateithagia andũ gũtaũkĩrũo nĩ maũndũ marĩa Bibilia ĩrutanaga megiĩ Ngai. Angĩkorũo no wende gũtaũkĩrũo nĩ Bibilia, Aira a Jehova no makenere gũgũteithia.​—Thoma Atũmwo 8:30, 31.