Gwathĩkĩra Mũkaana no Kũhonokie Muoyo Waku!

KŨRĨ Dicemba 26, 2004, nĩ kwagĩire na gĩthingithia kĩnene kĩrĩa kĩarĩ na ũritũ wa 9.1 thĩinĩ wa Simeulue, gĩcigĩrĩra kĩrĩ mwena wa rũgongo wa Sumatra, Indonesia. Maitho mothe maarorete iria-inĩ. Maĩ ma iria maathiĩte kũnene mũno gũkĩra ũrĩa maakoragwo. O rĩo, andũ othe makĩambĩrĩria kũũrĩra irĩma-inĩ, makĩanagĩrĩra “Smong! Smong!” rĩĩtwa rĩrĩa mahũthagĩra kuuga tsunami. Kahinda-inĩ ka ndagĩka 30, makũmbĩ maarĩ na hinya magĩũka mahũrĩte gĩcũa kĩu, magĩthũkia mĩciĩ mĩingĩ na icagi.

Gĩcigĩrĩra gĩa Simeulue nĩkĩo kĩarĩ kĩa mbere kũringwo nĩ tsunami ĩyo. Harĩ andũ 78,000 arĩa maaikaraga kũu no andũ 7 tu maakuire. Nĩkĩ no andũ anini maakuire?a Arĩa maikaraga gĩcigĩrĩra-inĩ kĩu moigaga ũũ: ‘Thĩ ĩngĩthingitha narĩo iria rĩthiĩ, ũrĩra irĩma-inĩ tondũ thutha wa ihinda iria rĩgũũka rĩmũhobanĩirie.’ Nĩ ũndũ wa maũndũ marĩa meyoneire, andũ a Simeulue nĩ maahotaga kũmenya tsunami ĩrĩ hakuhĩ mangĩonire iria rĩgĩthiĩ. Nĩ ũndũ wa gwathĩkĩra mũkaana ũcio, nĩ maahonokire.

Bibilia nĩ yaragia ũhoro wa ũgwati ũgũũka wa “thĩna mũnene ũtarĩ woneka kuuma rĩrĩa thĩ yombirũo nginya rĩu, na ndũkoneka rĩngĩ.” (Mathayo 24:21) No ti atĩ Thĩ ĩniinwo nĩ andũ kana ũndũ mũru wa ndũire, tondũ muoroto wa Ngai nĩ thĩ ĩtũũre tene na tene. (Kohelethu 1:4) Handũ ha ũguo, thĩna ũcio mũnene ũroka nĩ njĩra ya Ngai ya “kũniina arĩa manangaga thĩ.” Ũgakorũo ũrĩ mũico wa waganu wothe na mĩnyamaro. (Kũguũrĩrio 11:18; Thimo 2:22) Kĩu gĩgakorũo kĩrĩ kĩrathimo kĩnene mũno!

Makĩria ma ũguo, ngũrani na tsunami, ithingithia, kana mĩtuthũko ya irĩma, thĩna ũcio mũnene ũroka ndũkaanina andũ arĩa ega. Bibilia yugaga ũũ igũrũ rĩgiĩ Ngai ũrĩa wĩtagwo Jehova: “Ngai nĩ wendo,” na nĩ eeranĩire atĩ “arĩa athingu nĩo makagaya thĩ, na gũtũũra mamĩtũũre o nginya tene.” (1 Johana 4:8; Thaburi 37:29) No ũngĩka atĩa nĩguo ũhonoke thĩna ũcio mũnene na ũkenere irathimo iria ciĩranĩirũo? Ũndũ wa bata nĩ: Athĩkĩra mũkaana ũrĩa ũheetwo!

IKARAGA WĨIGUĨTE

Tũtingĩmenya nĩ rĩ maũndũ moru na mĩnyamaro yothe ĩgathira, tondũ Jesu oigire ũũ: “Ũhoro wĩgiĩ mũthenya ũcio kana thaa, gũtirĩ mũndũ ũĩ, o na araika arĩa marĩ igũrũ kana Mũriũ, no Ithe witũ ũĩ.” O na kũrĩ ũguo, Jesu aatwĩkĩrire ngoro ‘tũikarage twĩiguĩte.’ (Mathayo 24:36; 25:13) Nĩkĩ? Bibilia nĩ ĩtũtaaragĩria ũrĩa maũndũ mangĩgakorũo matariĩ thĩinĩ wa thĩ mbere ya Ngai kũrehe mũico. O ta ũrĩa mogarũrũku ma na ihenya maateithirie aikari a Simeulue kũmenya atĩ tsunami yarĩ hakuhĩ, mogarũrũku marĩa marĩ kuo thĩinĩ wa thĩ no matũteithie kũmenya atĩ mũico ũrĩ hakuhĩ. Gathandũkũ karĩa karĩ gĩcunjĩ-inĩ gĩkĩ nĩ karonania mogarũrũku mamwe marĩa Bibilia yaragia ũhoro wamo.

Mamwe mamo maanoneka na gĩkĩro kĩna mahinda mahĩtũku. No Jesu oigire atĩ rĩrĩa tũkona “maũndũ macio mothe” nĩ tũngĩkaamenya atĩ mũico ũrĩ hakuhĩ. (Mathayo 24:33) Wĩyũrie ũũ: ‘Nĩ rĩ thĩinĩ wa historĩ maũndũ macio mataarĩirio hau (1) meekĩkire thĩinĩ wa thĩ yothe, (2) meekĩkire o ihinda-inĩ rĩmwe na (3) mathiĩte magĩthũkaga makĩria?’ Hatarĩ nganja, tũratũũra ihinda-inĩ rĩu.

ŨRĨA NGAI ONANĨTIE WENDO

Mũtongoria ũmwe warĩ wa Amerika oigire ũũ: “Mĩtaratara ya kũheana mĩkaana kabere . . . nĩ ĩhonokagia mĩoyo.” Nĩ ũndũ wa tsunami ĩyo ya 2004, nĩ gwekĩrirũo mũtambo wa kũheana mũkaana gĩcigo-inĩ kĩu nĩguo ihinda rĩũkĩte andũ matigakue ta hĩndĩ ĩyo. O ta ũguo, Ngai nĩ abangĩte ũrĩa mũkaana ũkũheanwo mbere ya mũico ũkĩte. Bibilia yarathĩte ũũ: “Naguo ũhoro ũyũ mwega wa Ũthamaki nĩ ũkaahunjio thĩ yothe ũtuĩke ũira kũrĩ ndũrĩrĩ ciothe, na hĩndĩ ĩyo nĩrĩo mũico ũgaakinya.”​—Mathayo 24:14.

Mwaka ũcio ũrathirire, Aira a Jehova marahũthĩrire mathaa makĩria ma bilioni 1.9 makĩhunjia ũhoro mwega mabũrũri-inĩ 240 na makĩria ma thiomi 700. Ũndũ ũcio ũronania biũ atĩ mũico ũrĩ hakuhĩ. Nĩ ũndũ wa Aira a Jehova kwenda andũ arĩa angĩ, merutanagĩria biũ kũhe andũ mũkaana wĩgiĩ mũthenya wa Ngai wa ciira ũrĩa ũkuhĩrĩirie mũno. (Mathayo 22:39) Gũkorũo atĩ no ũgunĩke nĩ ũhoro ũyũ, kũronania wendo wa Jehova gũkwerekera. Ririkana atĩ, “[Ngai] ndendaga mũndũ o na ũmwe akaaninwo no endaga othe merire.” (2 Petero 3:9) Hihi nĩ ũgwathĩkĩra mũkaana ũcio wa Ngai wa wendo?

WĨTHARE NĨGUO ŨHONOKE!

Ririkana atĩ aikari a gĩcigĩrĩra gĩa Simeulue moorĩire kũndũ kũrĩa kwarĩ igũrũ rĩrĩa moonire maĩ magĩthiĩ, no matiametereire nginya macoke. Itua rĩao rĩa na ihenya nĩ rĩamahonokirie. Nĩguo ũhonoke thĩna mũnene ũrĩa ũrĩ mbere, ũrabatara kũũrĩra kũndũ kũrĩ igũrũ kwa mũhaano, mbere ya ihinda rĩthirĩte. Na njĩra ĩrĩkũ? Mũnabii Isaia aatongoririo nĩ roho wa Ngai kwandĩka ũhoro wĩgiĩ ndũmĩrĩri njega ĩrĩa ĩraheanwo ‘matukũ-inĩ ma kũrigĩrĩria,’ ihinda rĩrĩ tũratũũra. Yugaga ũũ: “Ũkai twambate kĩrĩma-inĩ kĩa Jehova, . . . atũrute mĩthiĩre yake, na ithuĩ tũthiage na njĩra ciake.”​—Isaia 2:​2, 3.

Kwambata kĩrĩma igũrũ gũgũteithagia kuona wega kũndũ kũraihu na ũkagĩa na ũgitĩri. O ũndũ ũmwe na ũguo, kũmenya njĩra cia Ngai kũgerera Bibilia, nĩ kũrateithia andũ milioni nyingĩ thĩinĩ wa thĩ meke mogarũrũku mega mĩtũũrĩre-inĩ yao. (2 Timotheo 3:​16, 17) Na njĩra ĩyo, makambĩrĩria ‘gũthiaga na njĩra cia Ngai’ na magakenera gwĩtĩkĩrĩka na kũgitĩrũo nĩwe.

Hihi nĩ ũgwĩtĩkĩra rĩĩtana rĩu rĩa Ngai rĩa wendo ũgĩe na ũgitĩri matukũ-inĩ maya mooru? Tũragwĩkĩra ngoro ũthuthurie na kinyi Maandĩko marĩa marĩ gathandũkũ-inĩ thĩinĩ wa gĩcunjĩ gĩkĩ marĩa maronania ũira wa atĩ tũrĩ “matukũ ma kũrigĩrĩria.” Aira a Jehova arĩa marĩ hakuhĩ nawe nĩ megũkena gũgũteithĩrĩria gũtaũkĩrũo wega nĩ maandĩko macio monanĩtio hau na ũrĩa ũngĩmahũthĩra. Ningĩ no wone macokio ma ciũria ciaku Intaneti-inĩ, thĩinĩ wa jw.org/ki. Rora rungu rwa MORUTANI MA BIBILIA > MACOKIO MA CIŨRIA CIA BIBILIA.