Ũrĩa Mbaara na Ngũĩ Igaathira

NGAI NĨ AKEEHERIA THIRIKARI CIA ANDŨ

Ngai akeeheria thirikari cia andũ kũgerera mbaara ĩrĩa Bibilia ĩtĩte Hari–Magedoni.a (Kũguũrĩrio 16:16) Hĩndĩ ĩyo, “athamaki a thĩ yothe ĩrĩa ĩikaragwo” nĩ magaacokanĩrĩrio hamwe nĩ ũndũ wa “mbaara ya mũthenya ũrĩa mũnene wa Ngai Mwene-Hinya-Wothe.” (Kũguũrĩrio 16:14) Mbaara ya Hari–Magedoni nĩyo ĩgaakorũo ĩrĩ mbaara ya mũico thĩinĩ wa thĩ.

Thutha wa Ngai kweheria thirikari cia andũ, nĩ akaarehe thirikari yake ĩrĩa ĩgaathana kuuma igũrũ, na ĩgaatũũra tene na tene. (Danieli 2:44) Ngai nĩ athuurĩte Mũrũwe Jesu Kristo atuĩke Mũthamaki wa thirikari ĩyo. (Isaia 9:​6, 7; Mathayo 28:18) Thirikari ĩyo nĩyo Ũthamakib ũrĩa Jesu eerire arũmĩrĩri ake mahoyage igũrũ rĩaguo. (Mathayo 6:​9, 10) Andũ othe thĩinĩ wa thĩ magaakorũo rungu rwa thirikari ĩmwe magĩathwo nĩ Jesu.

Ngũrani na athamaki a gũkũ thĩ, Jesu ndakaahũthĩra ũnene wake na njĩra ya mwĩyendo. Tondũ nĩ arĩ kĩhooto na ndathutũkanagia, gũtirĩ mũndũ ũgeekwo maũndũ matarĩ ma kĩhooto nĩ ũndũ wa rũrĩrĩ rwake, bũrũri ũrĩa aumĩte, kana ũndũire wake. (Isaia 11:​3, 4) Ningĩ andũ matikabatara kũrũĩrĩra ihooto ciao. Gĩtũmi nĩ tondũ Jesu nĩ akaarũmbũiya mabataro ma o mũndũ. Bibilia yugaga ũũ: “Nĩ akaahonokia athĩni arĩa makayaga makĩhoya ũteithio, o na mũndũ ũrĩa ũtarĩ hinya hamwe na ũrĩa wothe ũtarĩ na wa kũmũteithia. . . . Nĩ akaamahonokia matige kũhinyĩrĩrio na gwĩkwo maũndũ ma ũhinya.”—Thaburi 72:​12-14.

Ũthamaki wa Ngai nĩ ũkaananga matharaita mothe ma mbaara thĩinĩ wa thĩ. (Mika 4:3) Ningĩ nĩ ũkaaniina andũ arĩa mendete kũrũa kana gũthararia thayũ wa andũ arĩa angĩ. (Thaburi 37:​9, 10) Andũ othe gũtekũmakania kana nĩ mũthuri, mũtumia, kana mwana, nĩ makaiguaga marĩ na ũgitĩri kũrĩa guothe marĩ thĩinĩ wa thĩ.—Ezekieli 34:28.

Andũ nĩ magaakorũo na ũtũũro mwega rungu rwa thirikari ya Ngai. Thirikari ĩyo nĩ ĩkaaniina mathĩna marĩa matũmaga andũ marũe, ta ũthĩni, ngʼaragu, na kwaga gwa gũikara. O mũndũ nĩ agaakoragwo na irio nyingĩ cia gwaka mwĩrĩ, na mũciĩ mwega.—Thaburi 72:16; Isaia 65:​21-23.

Ũthamaki wa Ngai nĩ ũkeeheria maũndũ mothe moru marĩa marehagwo nĩ mbaara. Maũndũ macio nĩ hamwe na nguraro cia mwĩrĩ, mĩtangĩko ya meciria, na ruo rwa ngoro rũrĩa ruumanaga na njũragano hĩndĩ ya mbaara. Nginya arĩa makuĩte nĩ makaariũkio na matũũre rĩngĩ thĩinĩ wa thĩ. (Isaia 25:8; 26:19; 35:​5, 6) Famĩlĩ nĩ igaakorũo hamwe rĩngĩ, na andũ matikaririkana rĩngĩ maũndũ ma kũguoyohia marĩa maumanaga na mbaara, tondũ ‘maũndũ ma tene magaakorũo marĩ mathiru.’—Kũguũrĩrio 21:4.

NGAI NĨ AKEEHERIA MEHIA

Hĩndĩ ya Ũthamaki wa Ngai, andũ othe magaakorũo magĩthathaiya Ngai ũrĩa ũmwe wa ma Jehovac, o we “Ngai mwene wendo na thayũ.” (2 Akorintho 13:11) Andũ nĩ makeeruta gũtũũrania hamwe na thayũ. (Isaia 2:​3, 4; 11:9) Arĩa othe mathĩkagĩra Ngai nĩ makeehererio mehia na matuĩke akinyanĩru.—Aroma 8:​20, 21.

NGAI NĨ AKAANIINA SHAITANI NA NDAIMONO CIAKE

Ũthamaki wa Ngai nĩ ũkaaniina arĩa macogagĩra mbaara, na nĩo Shaitani na ndaimono ciake. (Kũguũrĩrio 20:​1-3, 10) Tondũ gũtigaakorũo na ũgucania wao mũũru, “thayũ nĩ ũkaaingĩha.”—Thaburi 72:7.

Korũo na ma atĩ kĩĩranĩro kĩa Ngai kĩgiĩ kũniina mbaara na ngũĩ nĩ gĩkaahinga. Arĩ na wendi na ũhoti wa kũniina mbaara.

• Ngai arĩ na ũũgĩ na hinya ũrĩa ũrabatarania wa kũniina mbaara na ngũĩ. (Ayubu 9:4) Gũtirĩ ũndũ abangĩte gwĩka ũngĩmũrema.—Ayubu 42:2.

• Ngai nĩ aiguaga ũũru ona andũ magĩthĩnĩka. (Isaia 63:9) Ningĩ “nĩ athũire mũndũ o wothe wendete ũhinya.”—Thaburi 11:5.

• Hingo ciothe Ngai nĩ ahingagia uuge wake, na ndangĩheenania.—Isaia 55:​10, 11; Tito 1:2.