Eehamba dotete

13 Omupiya waKalunga okwa dja mo muJuda palombwelo laJehova, ndele ta i kuBetel, ofimbo Jerobeam a li a fikama ta twimine omayambo koaltari. 2 Opo nee okwa ingida koaltari palombwelo laJehova, ndele ta ti: “Akutu oaltari, oaltari! Jehova okwa ti: ‘Tala, meumbo laDavid otamu ka dalwa omumati wedina Josia. Ota ka yambela kwoove ovapristeri vokeenhele dokoikulundudu, ovo hava twimine kwoove omatwiminoyambo, nota ka xwikila oipongolo yovanhu kwoove.’” 3 Mefiku olo, okwa yandja edidiliko* ta ti: “Eli edidiliko* olo Jehova a popya, a ti: Tala, oaltari otai ka tatuka pokati, nomute,* oo u li ko, otau ka tikila pedu.”

4 Diva eshi ohamba ya uda eendjovo odo omupiya waKalunga kashili a popya shi na sha noaltari puBetel, Jerobeam okwa kufa ko eke laye koaltari, ndele ta ti: “Mu kwata po!” Diva, eke olo a li ta ulikifa omulumenhu oo ola kukuta,* noka li vali ta dulu oku li alula ko. 5 Opo nee oaltari oya tatuka pokati, nomute, oo wa li koaltari, owa tikila pedu metwokumwe nedidiliko,* olo omupiya waKalunga kashili a popya palombwelo laJehova.

6 Ohamba oya lombwela omupiya waKalunga kashili, ya ti: “Alikana, pula ekwafo* kuJehova, Kalunga koye, nokwiilikana ponhele yange, opo eke lange li kale nawa.” Onghee omupiya waKalunga kashili okwa pula ekwafo kuJehova, neke lohamba ola kala nawa ngaashi la li. 7 Ohamba oya tya komupiya waKalunga kashili: “Ila tu ye keumbo u ka lye, nohandi ke ku pa oshali.” 8 Ashike omupiya waKalunga kashili okwa tya kohamba: “Nonande ou pe nge etata leumbo loye, itandi i pamwe naave, noitandi ka lya omungome, ile ndi nwine omeva monhele ei. 9 Eshi osho nda lombwelwa kuJehova: ‘Ino lya omungome, ile u nwe omeva, noino ya nondjila oyo we uya nayo.’” 10 Onghee okwa shuna nondjila imwe vali, ndele ina shuna nondjila oyo e uya nayo kuBetel.

11 MuBetel omwa li hamu di omuprofeti a kulupa, novanamati vaye ova li ve uya keumbo, ndele tave mu lombwele oinima aishe oyo omupiya waKalunga kashili a ninga muBetel mefiku olo, noinima oyo a lombwela ohamba. Konima eshi va lombwela xe oshinima osho, 12 xe okwe va pula, a ti: “Okwa ya nondjila ilipi?” Onghee ovanamati vaye ove mu lombwela kutya omupiya waKalunga kashili, oo a dja kuJuda, okwa ya nondjila ilipi. 13 Onghee okwa tya kovanamati vaye: “Longekidilei nge ondongi.” Onghee ove mu longekidila ondongi, ndele ta londo nokwa ya.

14 Opo nee okwa shikula omupiya waKalunga kashili nokwe mu hanga e li omutumba momuti wa kula. Okwe mu pula, a ti: “Oove omupiya waKalunga kashili oo a dja kuJuda?” Okwa nyamukula, a ti: “Heeno, aame.” 15 Omuprofeti okwa tya kuye: “Ila tu ye keumbo u ka lye omungome.” 16 Omupiya waKalunga okwa ti: “Itandi dulu okushuna naave, ile ndi tambule ko eshivo loye, noitandi dulu okulya omungome, ile ndi nwe omeva pamwe naave monhele ei. 17 Osheshi Jehova okwa lombwela nge, a ti: ‘Ino lya ko nande omungome, ile u nwe ko omeva konhele oko. Ino shuna nondjila oyo we uya nayo.’” 18 Opo nee omuprofeti okwa tya kuye: “Naame omuprofeti ngaashi ove, nomweengeli okwa lombwela nge pawiliko laJehova, a ti, ‘Shuneni naye keumbo loye, opo a ka lye omungome noku ka nwe omeva.’” (Okwe mu kengelela.) 19 Opo nee okwa ya naye a ka lye omungome nokunwa omeva keumbo laye.

20 Ofimbo va li omutumba poshitaafula, ondjovo yaJehova oye uya komuprofeti oo e mu alula, 21 ndele ta lombwele omupiya waKalunga kashili oo a dja kuJuda, ta ti, “Eshi osho Jehova a popya: ‘Molwaashi ino dulika kelombwelo laJehova, noino diinina oshipango osho Jehova, Kalunga koye, e ku pa, 22 ndele owa shuna u ka lye omungome nokunwa omeva monhele oyo nda li nde ku lombwela kutya, “Ino lya mo omungome, ile u nwe mo omeva,” osheshi olutu loye itali ka pakwa monhele omo mwa pakwa ooxokulululwa.’”

23 Konima eshi omupiya waKalunga kashili a lya nokunwa, omuprofeti, oo a kulupa, okwa longekidila omuprofeti, oo a alula, ondongi. 24 Onghee okwa ya nondjila yaye nokwa hangwa konghoshi mondjila, ndele tai mu dipaa. Oshimhu shaye osha li sha wila mondjila, nondongi oya li ya fikama popepi nasho. Onghoshi nayo oya li ya fikama popepi noshimhu. 25 Ovalumenhu ovo va li tava ende po ova mona oshimhu sha kupulwa mondjila, nonghoshi ya fikama popepi noshimhu. Onghee ova ya, ndele tave ke shi hokolola moshilando omo mwa li hamu di omuprofeti oo a kulupa.

26 Eshi omuprofeti, oo e mu alula, e shi uda, okwa tya diva: “Omupiya waKalunga kashili oo ina dulika kelombwelo laJehova. Onghee Jehova okwe mu yandja konghoshi, i mu ponokele noku mu dipaa, ngaashi Jehova e mu lombwela.” 27 Opo nee okwa tya kovanamati vaye: “Longekidilei nge ondongi.” Onghee ove i mu longekidila. 28 Opo nee okwa ya, ndele ta hange oshimhu sha kupulwa mondjila, pe na ondongi nonghoshi ya fikama popepi nasho. Onghoshi kaya li ya lya po oshimhu, nokaya li ya ponokela ondongi. 29 Omuprofeti okwa kufa po oshimhu shomupiya waKalunga kashili, ndele te shi londeke kondongi, nokwe shi shunifa koshilando shavo, a ka lilwe nokupakwa. 30 Onghee okwe mu paka mombila yaye, nova kala tave mu lili tava ti: “Oshi nyemateka mumwameme!” 31 Konima eshi ve mu paka, okwa lombwela ovanamati vaye, a ti: “Ngeenge nda fi, omu na okupaka nge ponhele opo pa pakwa omupiya waKalunga kashili. Omakipa ange naa tulwe popepi nomakipa aye. 32 Eendjovo odo a popya, palombwelo laJehova, shi na sha noaltari, oyo i li muBetel nosho yo omaumbo aeshe okulongela ookalunga keenhele dokoikulundudu, moshilando shaSamaria, odi li pokuwanifwa.”

33 Nokuli nokonima eshi osho sha ningwa, Jerobeam ina efa po eendjila daye dii, ndele okwa kala nokunangeka po ovapristeri vokeenhele dokoikulundudu, ta kufa mokati kovanhu. Keshe oo a li a hala okuninga omupristeri, okwa li he mu nangeke po e li omupristeri,* ta ti: “Na ninge omupristeri womovapristeri vokeenhele dokoikulundudu.” 34 Oukwaneumbo waJerobeam owa hanaunwa po nowa xulifwa po kombada yedu alishe omolwenyono lao.