Etukulwa 1
Omatumwalaka a dja meulu
OMBIBELI aishe oi li onhumwafo oyo ya dja kuTate yetu womeulu, note tu hongo okupitila muyo. Ndele opa li pa yandjwa omatumwalaka avali e likalekelwa omido di dule po 2000 da pita komweengeli, oo ha “kala ofika koshipala shaKalunga.” Edina lomweengeli oo oGabriel. Natu ka konakoneni osho sha li sha kwatelwa mo momatalelepo oo avali a fimana omweengeli oo kombada yedu.
Momudo omuti-3 K.O.P., koikulundudu yaJudea, tashi dulika popepi naJerusalem, okwa li omupristeri waJehova wedina Sakaria. Sakaria nomukulukadi waye Elisabet ova li va kulupa nokava li ve na okaana. Ndele ofimbo Sakaria a li ta longo olufo laye loupristeri motembeli yaKalunga muJerusalem, okwa li a holokelwa komweengeli Gabriel ombadilila kolulyo loaltari yomatwimino.
Sakaria okwa li a tila neenghono, ndele Gabriel okwa li e mu lombwela kutya ina tila, a ti: “Sakaria, ino tila, osheshi eilikano loye ola udika, nomukainhu woye Elisabet ote ku dalele okamati, ndele to ka luku Johannes.” Gabriel okwa li yo a lombwela Sakaria kutya Johannes “ota ningi omunene koshipala shOmwene” nota ka ‘longekidila Omwene oshiwana sha pwa.’
Sakaria ka li a itavela kutya osho otashi ka ningwa. Okwa li sha fa itashi shiiva kuye nosho yo kuElisabet okumona okaana moukulupe wavo. Onghee hano, Gabriel okwa li e mu lombwela a ti: “Ove to fiti ondaka, ito shiiva okupopya fiyo efiku olo eshi tashi ningwa, shaashi ino itavela eendjovo odo dange.”
Ovanhu ovo va li pondje yotembeli fimbo Sakaria e li motembeli ova li tave lipula kutya omolwashike Sakaria a kala mo neenghono motembeli. Eshi a dja mo, ka li ta popi vali ndele okwa li ashike ta udike nomake aye, novanhu ova li va didilika kutya okwa li a mona oshinima she likalekelwa.
Eshi Sakaria a mana ko olufo laye lokulonga kotembeli, okwa li a shuna keumbo, nokonima yefimbo lixupi Elisabet okwa li shili a ninga oufimba. Ofimbo Elisabet a li a teelela okumona okaana, okwa li a kala meumbo eemwedi nanho ina pita mo.
Konima yefimbo Gabriel okwa ka holokela vali omukainhu omunyasha ina hombolwa wedina Maria, oo a li ha kala moshilando Nasaret. Gabriel okwa li a etela Maria etumwalaka lilipi? Okwa li a lombwela Maria a ti: ‘Ove wa mona onghenda kuKalunga. Tala, ove to ningi omufimba ndee to dala okamati, ndee to ka luku edina lako Jesus.’ Gabriel okwa ti yo: ‘Ye ota ningi omunene, ndele Ye e nokwiifanwa Omona waau wOkombadambada. Ndele Ye ota ningi ohamba yeumbo laJakob fiyo alushe, nouhamba waye kau na apa tau xulu po.’
Otu na oushili kutya Gabriel okwa li e udite e na oufembanghenda okutwala omatumwalaka a tya ngaho. Eshi hatu ka lesha shihapu kombinga yaJohannes naJesus, ohatu ka mona filufilu kutya omolwashike omatumwalaka oo a dja meulu a li a fimanenena. 2 Timoteus 3:16; Lukas 1:5-33.
▪ Omatumwalaka avali a fimana elipi a li a dja meulu?
▪ Olyelye a li a eta omatumwalaka oo kombada yedu, noolyelye va li ve a etelwa?
▪ Omolwashike sha li shidjuu okwiitavela omatumwalaka oo?