Etukulwa 87

Longifa eendunge mokulilongekidila onakwiiwa

JESUS okwa li ashike opo a mane okuhokololela eemhunga dovanhu nosho yo ovahongwa vaye kombinga yomumati a kanene, ovafendelifi ovakengeleledi, ovanhu vamwe ovo va li ve shiivike kutya ovalunde nosho yo ovanongo vomishangwa nOvafarisai. Ashike pomhito ei okwa li ta popi novahongwa vaye, te va hokololele efaneko li na sha noshipuna osho sha li sha yakula onghundana ii i na sha nomupiya washo.

Jesus okwa li a popya kutya oshipuna osho osha li sha ifana omupiya washo ndele tashi mu lombwele kutya otashi ke mu taataa mo moilonga. Omupiya okwa li e lipula a ti: “Ohandi ningi ngahelipi, omwene wange ngenge ta kufa nge [oukeleli]? Okulima itandi ku dulu, nokweehela nda fya ohoni. Ondi shi shii eshi handi shi ningi, opo va tambule nge momaumbo avo, ngenge handi tewa mo moukeleli.”

Omupiya oo okwa li a diladila okuninga po shike? Okwa li a ifana ovanhu ovo va li ve na oikolo yomwene waye, ndele te va pula a ti: “Oshikolo shoye nomwene wange oshi fike peni?”

Omunhu umwe okwa li a nyamukula a ti: ‘Omaadi eemono eelitela 2 200.’

Omupiya oo okwa li a lombwela omunhu oo a ti: ‘Kufa omushangwa woye woshikolo, kala omutumba ove u shangele mo divadiva eelitela 1 100.’

Omupiya oo okwa li a pula omunhu umwe vali a ti: ‘Ove oshikolo shoye oshi fike peni?’

Omunhu oo okwa li a nyamukula a ti: “Oilya omakutu efele.”

Omupiya oo okwa li a lombwela omunhu oo a ti: “Kufa omushangwa woshikolo, ove u shangele mo 80.”

Omupiya oo okwa li e na oufemba okuninipika oikolo oyo ya lilwa omwene waye, molwaashi okwa li ta pashukile natango oimaliwa yomwene waye. Eshi a li a ninipika oikolo yovanhu ovo, okwa li ta pange oukaume navo opo ve ke mu kwafele ngeenge a kanifa oilonga yaye.

Omwene waye okwa li a kumwa eshi a li a uda osho sha ningwa po. Ashike okwa li a ‘pandula omukeleli oo ehe fi omuyuki molwaashi e neendunge.’ Jesus okwa li a weda ko a ti: “Ovana vounyuni ou ove na omakeko mokukalafana kwavo ve dule ovana vouyelele.”

Jesus okwa li a lombwela ovahongwa vaye osho ve na okulihonga mo mefaneko olo moku va ladipika a ti: “Likongeleni nemona loipupulu ookaume, olo ngenge tali xulu po, opo ve mu tambule momaumbo aalushe.”

Jesus ka li ta pandula omupiya oo omolwokuhenouyuki kwaye, ndele omolwokukala e na eendunge. Luhapu “ovana vounyuni ou” ohava longifa oimaliwa yavo ile eendodo davo pandunge opo va pange oukaume novanhu ovo tava dulu oku ke va kwafela. Onghee hano, ovapiya vaKalunga, sha hala okutya, “ovana vouyelele,” navo ova pumbwa okulongifa pandunge oiniwe yavo ile ‘emona loipupulu’ opo va mone ouwa.

Ndele ngaashi Jesus a popya, ove na okupanga oukaume okupitila memona olo naavo tava ka dula ‘oku va tambula momaumbo aalushe.’ Oilyo yokangudu otai ka kala momaumbo aalushe oo meulu, ofimbo ‘eedi dimwe’ tadi ka kala mOparadisa kombada yedu. Molwaashi Jehova Kalunga nOmona waye ovo aveke tava dulu okutambula ovanhu momaumbo oo, otu na okukendabala noudiinini tu pange oukaume navo hatu longifa ‘emona loipupulu’ keshe olo tashi dulika tu na tu yambidide oinima yOuhamba. Opo nee eshi oupuna tau ka xula po, onakwiiwa yetu yaalushe otai ka kala ya shilipalekwa.

Jesus okwa li a popya kutya ovanhu ovo ve li ovadiinini mokufila oshisho omamona oo ile oinima inini, otava ka kala yo ovadiinini mokufila oshisho oinima oyo ya fimanenena. Okwa twikila ko a ti: “Ndele ngenge ihamu kala ovadiinini nemona loipupulu, olyelye te mu pe ei yoshili [sha hala okutya, oinima yopamhepo ile yOuhamba]? Ndele ngenge ihamu kala ovadiinini noinima yovanhu [oinima yOuhamba oyo Kalunga e lineekelela ovapiya vaye], olyelye te mu pe ei yeni vene [ondjabi yomwenyo momaumbo aalushe]?”

Itatu dulu okukala ovapiya vaKalunga nopefimbo opo tuu opo otu li ovapiya vomamona oipupulu, sha hala okutya, oinima yopamaliko, ngaashi Jesus a popya a ti: “Kape nomukaleli ta dulu okulongela oovene vavali, osheshi oha kala nokutonda umwe nokuhola omukwao, ile ta hokwa ou ndee ta dini mukwao. Kamu dulu okukalela Kalunga nemona.” Lukas 15:1, 2; 16:1-13; Johannes 10:16, OB-1986.

▪ Omupiya womefaneko laJesus okwa li a panga ngahelipi oukaume novanhu ovo tava dulu oku ke mu kwafela konima yefimbo?

▪ ‘Emona loipupulu’ oshike, nongahelipi hatu dulu okupanga oukaume okupitila mulo?

▪ Oolyelye tava dulu oku tu tambulila “momaumbo aalushe,” nomaumbo oo otaa ulike kushike?