Etukulwa 86

Ehokololo li na sha nomumati a kanene

KONIMA eshi Jesus a mana okulombwela Ovafarisai shi na sha nodi oyo ya li ya kana ndele tai monika nosho yo oshimaliwa osho sha li sha kana, okwa li a twikila oku va hokololela va li efaneko limwe. Efaneko olo ola li li na sha naxe omunahole nosho yo nghee a li a ungaunga novanamati vaye vavali, ovo keshe umwe womuvo a li a ninga epuko la kwata moiti.

Tete okwa li a popya shi na sha nomumati oo a li munini kumukwao, oo oye ta dana onghandangala mehokololo. Omumati oo okwa li a pula a pewe efyuululo laye, naxe okwa li e li mu pa nopehe na okwoongaonga. Opo nee okwa li a dja mo meumbo nokwa kala e na onghalamwenyo inai koshoka. Paife natu ka pwilikine kehokololo laJesus nokutala ngeenge ohatu dulu okumona kutya ovanhu ovo va popiwa mehokololo omo otava faneke oolyelye.

Jesus okwa ti: “Okwa li ku nomunhu e novana ovamati vavali. Ndele ou omunini okwa tya kuxe: Tate, pe nge ombinga ei yeliko ndi noku i pewa. [Xe] okwe va tukulila emona laye.” Omumati oo munini okwa li a longifa ngahelipi emona laye?

Jesus okwa ti: “Ndele inapa pita nee omafiku mahapu, omona ou omunini okwa ongela oinima yaye aishe, ndele okwa ya koshilongo shokokule, ndele okwa hanaunina ko emona laye nokukala moulunde.” Omumati oo okwa li a longifa oimaliwa yaye mokukala neembwada. Lwanima, eenghalo oda li de mu djuupalela.

Jesus okwa li a twikila ehokololo a ti: “Ndele eshi a mana po aishe, oshilongo shinya osha hangika kondjala inene, ndele ye okwa hovela okuhepa. Okwa ya ko ndele okwe litula poshipuna shoshilongo shinya. Ye okwe mu tuma momaluxwa aye [a ka life] oingulu. Ndele okwa hala okukutifa edimo laye nomahakashala omakunde aa haa liwa koingulu, ndele ine a pewa nande okomunhu.”

Kashidinifa tuu okulifa oingulu oyo ya li inai koshoka paMhango! Ashike osho sha li tashi yahameke unene omumati oo ondjala oyo ya li ye mu konena, nokwa li nokuli ye mu ningifa a kale a hala okulya oikulya oyo ya li hai liwa koingulu. Jesus okwa li a popya kutya omumati oo okwa li “e lialuluka” omolwonghalo inyikifa oluhodi omo a li.

Jesus okwa li a twikila nehokololo laye a ti: “[Okwe lipopila] ta ti: Ovapiya vatate vahapu ve fike peni ve noikulya ya wana, ndele ame ohandi file po ondjala. Ohandi fikama ndele ohandi i kutate, ndele handi mu lombwele: Tate, onda nyona nokeulu nokoshipala shoye, ndele ame inandi wana vali ndi ifanwe omona woye, tambule nge ngaashi umwe wovapiya voye. Ndele ye okwa fikama ndele okwa ya kuxe.”

Paife diladila kwaashi: Ngeno xe okwa taataele omumati oo noku mu tangunina eshi a li ta fiye po eumbo, ngeno otashi dulika ina ka kala ta diladila kutya oku na okuninga po shike. Otashi dulika ngeno a tokola okwaalukila koshilongo shambulavo ndele ta kongo oilonga ponhele yonhumba opo aha monike kuxe. Ndele omumati oo ka li nande a diladila okuninga ngaho. Okwa li a hala oku ka kala meumbo lavo.

Osha yela kutya xe womefaneko laJesus ota faneke Tate yetu womeulu omunahole nomunanghenda, Jehova Kalunga. Otashi dulika yo wa didilika kutya omumati oo a kanene ota faneke ovanhu ovo va li ve shiivike kutya ovalunde. Ovafarisai ovo Jesus a li ta hokololele efaneko olo, pomhito imwe ova li ve mu tokola eshi a li ta li pamwe novalunde. Ndele mbela omumati ou womukulunhu ota faneke lyelye?

Osho sha li sha ningwa po eshi omumati oo a li a kana a alukila keumbo

Eshi omumati a kanene oo a hokololwa mefaneko laJesus a li a alukila keumbo kuxe, okwa li a tambulwa ko ngahelipi? Natu ka pwilikine kehokololo laJesus.

Jesus okwa ti: “Ndele fimbo a li kokule, xe okwe mu mona ndele okwe mu uditile onghenda, a tondoka e mu shakeneke ndele okwe mu dingatela kofingo yaye ndele okwe mu fipa komilungu.” Xe oo ke fi tuu omunanghenda nomunahole nota faneke nawa Tate yetu womeulu, Jehova!

Otashi dulika xe oo a li a uda kutya omonamati okwa li nonghalamwenyo inai koshoka. Ndele nande ongaho, eshi a alukila keumbo okwa li e mu tambula ko nopehe na okuteelela a yelifilwe moule. Jesus naye osho ha tambula ko ovanhu ngaho, a li ha katuka eenghatu tete okuya kovalunde nosho yo kovafendelifi ovo mefaneko olo tava fanekwa komumati oo a kanene.

Nopehe na omalimbililo, xe omunaendunge womefaneko laJesus okwa li e wete kutya omonamati okwe livela ombedi eshi a nyika oluhodi nota monika a teka omukumo. Eshi xe oo a li a ungaunga nomona pahole eshi e uya osha li she shi ningifa shipu komona opo a hepaulule omanyono aye, ngaashi Jesus eshi popya eshi a ti: “Tate, onda nyona keulu nokuove, ame noinandi wana vali okwiifanwa omona woye.”

Fimbo omumati oo ina mana okupopya, xe okwa li a lombwela ovapiya vaye a ti: “Ka eteni divadiva oshikutu shinya shiwa shiwelela, mu shi mu dike, nokalinga ka dikeni komunwe waye, neenghaku keemhadi daye, nye mu ka tale ko onhana inya ya ondoka, i tomeni, tu lyeni fye tu hafeni, osheshi omona wange ou okwa li a fya, ndele okwa nyumuka, okwa li a kana, ndele okwa monika.” Opo nee ova li va hovela “okuhafa.”

Pefimbo opo, “omona waye omukulunhu okwa hangika mepya.” Paife pwilikina koshixupe shehokololo ove u tale ngeenge oto dulu okumona kutya ota faneke lyelye. Jesus okwa li a popya shi na sha nomumati oo a kula a ti: “Eshi e uya a fika popepi neumbo, okwa uda mo olwiimbo noudano. Ndele okwa ifana omupiya umwe, okwe mu pula eshi shi li mo. Ou okwa tya kuye: Omumwanyoko e uya, xo okwe mu tomena onhana inya ya ondoka, eshi e mu mona e nomwenyo. Ndele ye okwa handuka, ye ina hala okuya mo meumbo. Xe okwe uya nee pondje, ndele okwe mu popifa nombili. Ndelenee ye okwa tya kuxe: Tala, omido edi nde ku kalela apa di fike, ndele inandi nyona nande oshipango shoye. Ove ino pa nge nande okakombwena ndi hafe pamwe nookaume kange. Ndelenee omona woye oo a manena po emona loye meembwada, eshi e uya, ove we mu tomena onhana inya ya ondoka.”

Ngaashi omonamati oo a kula, oolyelye va li hava kembaula ngeenge ve wete ovalunde tava filwa onghenda notava pewa elitulemo? Kave fi mbela ovanongo vomishangwa nOvafarisai? Molwaashi Jesus okwa li e va hokololela efaneko olo omolwoku mu kembaula eshi a tambula ko ovalunde, osha yela kutya ovo tava fanekwa komonamati oo a kula.

Pexulilo lehokololo, Jesus okwa li a popya shi na sha nanghee xe oo a li a popya nombili nomonamati oo womukulunhu a ti: “Omona wange, ove wa kala alushe puame, ndele aishe yange oyoye yo. Ndele paife eshi otu nokuhafa, osheshi omumwanyoko ou okwa li a fya ndele okwa ninga vali omwenyo, okwa li a kana ndele okwa monika.”

Jesus ka li a popya kutya omonamati oo womukulunhu lwanima okwa ka ninga po shike. Ashike lwanima konima yokufya kwaJesus nokunyumunwa kwaye, ‘ongudu inene yomovapristeri oya li ya dulika keitavelo,’ tashi dulika mwa li mwa kwatelwa vamwe vomongudu ‘yomona womukulunhu’ ovo Jesus a li ta popi mefaneko olo.

Oolyelye tava fanekwa kovanamati ovo vavali kunena? Otava faneke ovanhu ovo ve shii nawa omalalakano aJehova e na sha neshiivo olo ve na okukala ve na opo va kale ve na ekwatafano naye. Omonamati oo womukulunhu ota faneke vamwe ovo ve li oilyo ‘yokangudu’ ile tu tye ‘yeongalo loiveli ei ya shangelwa meulu.’ Ovanhu ovo ove na oikala ya fa oyo ya li iniwe komonamati oo womukulunhu. Inava hala okutambula ko ovo tava ka kala kombada yedu, ‘eedi dimwe,’ ovo tava diladila kutya ohava pewa elitulemo lihapu.

Mepingafano naasho, omumati oo a kanene ota faneke vamwe vomoshiwana shaKalunga ovo va li va fiya po oshili opo va ka hafele omalihafifo omounyuni ou. Ndele mokweendela ko kwefimbo, ovanhu ovo ove lialuluka ndele tava ningi vali ovapiya vaKalunga ve lipyakidila. Doshili, Xe ita ka ulikila tuu ohole nokufila onghenda ovanhu ovo va mona kutya ova pumbwa okudiminwa po nova alukila kuye! Lukas 15:11-32; Leviticus 11:7, 8; Oilonga 6:7; Lukas 12:32; Ovaheberi 12:23; Johannes 10:16, OB-1986.

▪ Jesus okwa li ta lombwele oolyelye efaneko ile ehokololo, nomolwashike?

▪ Olyelye ta dana onghandangala mehokololo olo, noshike sha li she mu ningilwa?

▪ Pefimbo laJesus olyelye a li ta fanekwa kuxe nosho yo komonamati oo munini?

▪ Ongahelipi Jesus a li a hopaenena olukeno lomushamane oo a tumbula mehokololo laye?

▪ Omonamati oo womukulunhu okwa li a tala ko ngahelipi okutambulwa ko kwamumwaina, nongahelipi Ovafarisai va li va fa omonamati oo a kula?

▪ Efaneko laJesus otali faneke shike kunena?