Okupopya wa ngungumana

LUHAPU ovapopi ohava kala ve na oumbada ngeenge tava i komutune oku ka yandja oipopiwa, unene tuu ngeenge ihava yandje oipopiwa luhapu. Omuudifi wonhumba naye otashi dulika a kale e na oumbada ngeenge ta hovele oukalele. Eshi Jeremia a li a pulwa a ninge omuprofeti, okwa li a nyamukula a ti: “Tala, ame kandi shii kupopya, osheshi aame omunyasha.” (Jer. 1:5, 6) Jehova okwa li a kwafela Jeremia, note ke ku kwafela yo. Mokweendela ko kwefimbo, oto ka kala ho popi wa ngungumana.

Omupopi oo ha popi a ngungumana oyoo ha kala a ngungila ngeenge ta yandje oshipopiwa, naasho ohashi limonikila monghedi omo a fikama note linyenge. Omalinyengo aye ohaa kala e li paushitwe nokwa yukila kwaasho ta popi. Oha pangele ewi laye nokupopya monghedi ya yela.

Ngeenge ou udite kutya ino wanifa po natango omaukwatya oo a tumbulwa metetekelo, oto dulu okuninga exumokomesho. Ngahelipi mbela? Natu ka taleni kutya oshike hashi ningifa omunhu a kale e na oumbada nokukala ta popi ina ngungila. Otashi dulika omunhu ta imbwa okupopya a ngungila koupyakadi wonhumba wopalutu.

Ngeenge wa taalela eshongo lonhumba nowa halelela okupondola ndele ku na oushili kutya oto ke shi pondola, oho kala u na oumbada. Osho ohashi ningifa ouluvi u nduluke eeholomone odo hadi ningifa omunhu a kale e na eenghono. Osho osho hashi ningifa omutima womunhu u kale tau denge tau endelele, a kale ta fudaana, ta pushu neenghono, ile ta kakama keenyala ile ta shololokwa meengolo noku kale newi tali ngengema. Kungaho, olutu otali kendabala okuungaunga nonghalo oyo la taalela. Osho u na okulalakanena osho okulongifa eenghono odo mokukala to diladila pandunge nokuyandja oshipopiwa shoye nexwamo.

Nghee to dulu okuninipika outile. Dimbuluka kutya oshi li paushitwe okukala tu na outile wonhumba. Ndele opo u dule okupopya wa ngungila, ou na okupangela outile wa tya ngaho nokuungaunga nonghalo ya tya ngaho nengungumano nomonghedi yefimaneko. Oshike mbela tashi ke ku kwafela u dule okuninga ngaho?

Kala ho lilongekida nawanawa. Kala ho longifa efimbo la wana ngeenge to lilongekida oshipopiwa shoye. Shilipaleka kutya ou udite ko nawa oshikundafanwa shoye. Ngeenge oshipopiwa shoye otashi pula u hoolole oitwa yonhumba oyo u na oku ka yelifa, lipula kutya ovapwilikini voye ove shii nale shi fike peni kombinga yoshikundafanwa osho, na kaleka momadiladilo elalakano olo wa hala okuhanga. Osho otashi ke ku kwafela u hoolole ouyelele oo tau ti sha lela. Ngeenge potete ou wete shidjuu okumona osho to ka kundafana, pula omupopi e na owino e ku kwafele. Omupopi oo ota dulu oku ku kwafela u konakone noukeka ouyelele omo to kufa oitwa yoye nosho yo u diladile nawa kombinga yovapwilikini. Ngeenge owa kongo ouyelele oo tau ka etela ovapwilikini ouwa nowa koneka oitwa oyo wa hala oku ka yelifa, ehalo loku ka yelifa ouyelele oo otali ke ku kwafela uha kale unene u na outile.

Longekida nawa etwalemo loye. Kala we lilongekida kutya oto ka hovela ngahelipi. Shimha wa hovele oshipopiwa shoye, otashi dulika oumbada tau ka ninipala.

Osho sha kundafanwa metetekelo otashi dulu yo oku ku kwafela ngeenge to lilongekidile okuya moukalele. Tala kwaasho wa hala oku ka kundafana novanhu nokudiladila kombinga yovanhu ovo to ka udifila. Lilongekida nawa omatwalemo oye. Lihonga yo kovaudifi ovanawino.

Otashi dulika u diladile kutya ngeenge owa shange oshipopiwa shoye ashishe otashi ke ku kwafela u kale to popi wa ngungila. Ndele osho otashi dulu oku ku ningifa u kale u na oumbada efimbo keshe to ka yandja oshipopiwa. Oshoshili kutya ovapopi vamwe ohava shange ouyelele muhapu oo tava ka longifa, ofimbo vamwe hava shange ashike oinima inini. Ndele osho hashi kwafele omunhu a ninipike outile hauyelele oo omunhu a shanga, ndele okukala e na omukumo kutya ouyelele oo e lilongekida otau ka tya sha shili kovapwilikini vaye.

Kala ho lideula to popi mokule. Okulilongekida monghedi ya tya ngaho otaku ku kwafele u kale u na omukumo woku ka yandja oshipopiwa shoye. Eshi to lilongekida, oto ende to koneke oitwa oyo wa hala oku ka yelifa noto ke i dimbuluka noupu eshi to ka yandja oshipopiwa shoye. Eshi to lideula, kala wa fa to yandje oshipopiwa shoye. Kala wa fa u wete ovapwilikini. Kala omutumba poshitaafula ile kala ofika wa fa naanaa to yandje oshipopiwa komutune.

Pula ekwafo kuJehova meilikano. Mbela Jehova ota ka nyamukula eilikano la tya ngaho? Ombibeli otai ti: “Elineekelo eli letu tu li na muye oleli: ngenge hatu mu indile sha pahalo laye, ote tu udu.” (1 Joh. 5:14) Ngeenge owa halelela okufimaneka Kalunga nowa hala ovanhu va mone ouwa mEendjovo daye, nopehe na omalimbililo, ota ka nyamukula eilikano loye. Elineekelo la tya ngaho otali dulu oku ku pameka u yandje oshipopiwa shoye nomupondo. Kakele kaasho, ngeenge owa kulike kekwafo lomhepo iyapuki omaukwatya ngaashi, ohole, ehafo, ombili, engungumano nelididimiko, otae ke ku kwafela u kale ho popi wa ngungila. — Gal. 5:22.

Likola owino muhapu. Apa ngoo pe fike okukala ho kufa ombinga moukalele, opo ngoo tapa ka kala pe fike okuninipika outile woye. Ngeenge owa kala ho yandje luhapu omilombo pokwoongala, otashi ka kala yo shipu okuyandja oipopiwa meongalo. Ngeenge owa kala to yandje oipopiwa luhapu, outile oo ho kala u na otashi dulika tau ka enda tau ninipala. Mbela owa hala okukala ho mono omhito luhapu yokuyandja oipopiwa? Kala ho liyambe okuyandja oipopiwa ngeenge ovanafikola vamwe inava holoka.

Ngeenge owa kala to tula moilonga omayele oo a yandjwa metetekelo, otashi ka kala shiwa okukonakona omadidiliko oo taa ulike kutya ou na oupyakadi wokupopya wa ngungumana. Ngeenge owa didilike oupyakadi oo u na nokukendabala okuungaunga nao, oto ka dula okukala ho popi wa ngungila. Omadidiliko oo ohae limonikila monghedi omo to linyenge ile e liudikile mewi loye.

Omadidiliko oo hae limonikila monghedi omo to linyenge. Omalinyengo olutu loye ile eenyala doye ohaa ulike kutya owa ngungila ile hasho. Tete konakona omalinyengo eenyala doye. Ngeenge oho popi u kwetele omaoko oye konima, ile a endjelela ashike a yukilila, u kwete okataafula kovapopi wa diinina, ho ningi wa i meendjato wa di mo, ho ningi wa pate ondjafa yoye we i patulula, we likwata keemhanda, we likwata komayulu ile wa kwata omakende, ile oho kala to kwatakwata ovili yoye, opena, olinga, eembapila doye, ile iho popi to udike oinima nawa, oinima aishe oyo otai ulike kutya iho popi wa ngungumana.

Ngeenge omunhu oku na outile, ohashi limonikila yo mokukala kwaye te linyenganyengifa eemhadi daye ile olutu laye, a fikama a kukuta, ta ngongonyotoka, te lilafaalafa komilungu, ta pona omate luhapu, ile ta fuda mokule.

Ngeenge owa kala to ningi eenghendabala da mana mo, oto ka dula okukala to lipangele. Oshixwepo okuungaunga noupyakadi oo koumwe. Ou na tete okudidilika oupyakadi oo u na nokudiladila kutya oshike u na okuninga po opo u u pondole. Ngeenge owa ningi eenghendabala da tya ngaho, oto ka dula okupopya nolutu la ngungumana.

Omadidiliko oo hae liudikila mewi. Ngeenge omunhu a tila, otashi dulika a kale ta popi newi lopombada unene ile newi tali ngengema. Otashi dulika yo a kale te likolomona luhapu ile ta popi ta endelele. Ndele omunhu ota dulu okupondola omaupyakadi a tya ngaho, ngeenge okwa kala ta ningi eenghendabala da mana mo a pangele ewi laye.

Ngeenge oho kala u udite wa tila, kala to fudile mo omhepo ya wana ofimbo ino ya komutune. Kendabala u kale nolutu la ngungila. Ponhele yokukala to yandje elitulemo koutile, kala to lipula nomatomheno kutya omolwashike wa hala okuyelifila ovapwilikini ouyelele oo we lilongekida. Ngeenge wa i komutune, fimbo ino hovela okupopya, tala oule wokafimbo kovapwilikini, to tale koipala oyo i na ohamu, ove to limemesha. Eshi to ningi etwalemo loshipopiwa shoye, popya to ende kanini, opo nee yandja oshixupe shoshipopiwa shoye nondjungu.

Osho u na okukala wa teelela. Ino diladila kutya outile oo ho kala u na ngeenge u na oshipopiwa otau ka kana po filufilu. Ovapopi vahapu ovanawino ohava kala natango ve na outile ngeenge ve li pokuya komutune. Ndele ove lihonga okukala tava pangele outile wa tya ngaho. Omupopi umwe omunawino okwa ti: “Ohandi kala natango nda tila, ndele ohandi pangele outile wa tya ngaho.”

Ngeenge owa kala to ningi eenghendabala da mana mo opo uha kale to monika wa tila, oto ke limonikila kutya oho popi wa ngungumana. Odoshili kutya oto ka kala natango u na outile, ndele otashi dulika ovapwilikini itave ke shi didilika mo nandenande.

Dimbuluka kutya eeholomone odo hadi ndulukwa kouluvi ngeenge omunhu a tila, ohadi ningifa omunhu a kale e na eenghono. Onghee hano, longifa eenghono odo opo u popye to holola omaliudo.

Ino pumbwa okuteelela u ye komutune opo u tule moilonga oinima oyo ya kundafanwa metetekelo. Lihonga okupopya wa ngungumana, to pangele ewi loye nokupopya nomaliudo a yukila ko nokuli nomokupopya kwoye kwakeshe efiku. Osho otashi ke ku kwafela u kale u na omukumo peemhito opo wa pumbwa unene oukwatya oo, komutune nosho yo moukalele.