Okupopya nexwamo

OKUPOPYA nexwamo ohaku mwenyopaleke oshipopiwa. Nonande osha fimana okupa ovapwilikini ouyelele oo tau hongo, otava ka kala tava pwilikine nelitulemo ngeenge oto popi nexwamo nowa mwenyopala. Oto dulu okukala ho popi nexwamo, kashi na nee mbudi kutya owa dja meputuko lilipi ile ou na omaukwatya a tya ngahelipi.

Popya to holola omaliudo. Eshi Jesus a li ta popi nomukainhu umwe Omusamaria, okwa li a popya kutya ovo tava longele Jehova ove na oku mu longela “momhepo nomoshili.” (Joh. 4:24) Ovo tava longele Jehova ove na oku mu longela nomitima di na olupandu nove na okukala metwokumwe noshili oyo tai hangwa mEendjovo daYe. Ngeenge omunhu oku na olupandu linene, otashi ke limonikila monghedi omo ha popi. Ota ka kala a halelela okulombwela vamwe kombinga yomafiloshisho aJehova opahole. Omalinyengo aye okoshipala, omaudi nosho yo ewi laye otai ka holola lela nghee e udite.

Ndele mbela omolwashike nee omunhu oo e hole Jehova nokwa itavela osho ta popi tashi dulika a yandje oshipopiwa ehe na exwamo? Ke na ashike okulilongekida osho ta ka tya, ndele oku na okukala e litula mo filufilu moshikundafanwa shaye, noshi na okukuma omaliudo aye. Natu tye nee ngeno omupopi okwa pewa oshipopiwa shi na sha nekuliloyambo laJesus Kristus. Ngeenge ta yandje oshipopiwa shaye, ke na ashike okukala e na momadiladilo ouyelele u na sha naasho, ndele oku na okukala e na olupandu li na sha naasho ekuliloyambo laJesus tali ti kuye nosho yo kovapwilikini vaye. Oku na okukaleka momadiladilo olupandu olo e na shi na sha naJehova Kalunga nosho yo Kristus Jesus omolwefiloshisho likumwifi la tya ngaho. Oku na okudiladila kombinga yeteelelo likumwifi li na sha nomwenyo olo ekuliloyambo le shi ninga tashi shiiva, sha hala okutya, etimaumbwile loku ka kala twa hafa fiyo alushe notu na oukolele muwa meduparadisa lipe. Kungaho, ota ka dula okupopya tashi di komutima.

Ombibeli oya popya shi na sha nomunongo womishangwa Esra, oo a li omuhongi muIsrael ya ti okwa “paka omutima waye mokukonakona omhango yOmwene noku i [shikula] nokulonga Ovaisrael.” (Esra 7:10) Ohatu ka popya tashi di komutima ngeenge otwa unganeke nawa ouyelele wetu nokulongekida omitima detu. Okupopya tashi di komutima kwa tya ngaho shi na sha noshili, otaku dulu filufilu okukwafela ovo hatu popi navo va kale ve hole lela oshili.

Diladila kombinga yovapwilikini voye. Oshinima shimwe sha fimana osho tashi dulu oku ku kwafela u popye nexwamo okukala u udite kutya ovapwilikini voye ova pumbwa ouyelele oo. Osho osha hala okutya eshi to lilongekidile oshipopiwa shoye ou na okwoongela ouyelele tau ti sha nou na yo okwiilikana kuJehova e ku wilike opo u longife ouyelele oo monghedi oyo tai etele ouwa ovo to ka popya navo. (Eps. 32:8; Mat. 7:7, 8) Diladila kutya omolwashike ovapwilikini voye va pumbwa ouyelele oo, nghee tau ke va kwafela nonghee to dulu oku u yandja monghedi omo tava ka uda ko efimano lao.

Kala to konakona ouyelele oo fiyo osheshi wa mona mo oinima oyo ihokwifa. Nonande ino mona mo ouyelele mupe, tala kutya oto ka yelifa ngahelipi oinima oyo monghedi imwe i lili. Ngeenge owa longekida sha osho tashi ka kwafela shili ovapwilikini voye va pameke ekwatafano lavo naJehova, va kale nolupandu omolwomafiloshisho aye, va dule okuungaunga nomupondo nomaupyakadi omonghalamwenyo monghalelo ei ya kulupa, ile va kale ovanekeka moukalele wavo, oto ka kala u na etomheno lokuyandja oshipopiwa shoye to popi nexwamo.

Ndele mbela ongahelipi ngeenge owa pewa oshinakuwanifwa shoku ka lesha pokwoongala? Opo u leshe nexwamo, owa pumbwa okuninga shihapu shihe fi ashike okutumbula oitya mondjila nokulesha nawa oinhoko yomatumbulo. Ou na okukonakona nawa oshikundafanwa shoye. Ngeenge oto ka lesha etukulwa lonhumba lOmbibeli, konga ouyelele wa wedwa po u na sha netukulwa olo. Shilipaleka kutya ou udite ko oshikalimo shetukulwa olo. Diladila shi na sha nanghee etukulwa olo tali dulu oku ku etela ouwa nosho yo ovapwilikini voye. Lesha etukulwa olo to holola omaliudo opo okulesha kwoye ku kale ku na eityo.

Ongahelipi ngeenge oto lilongekidile oukalele? Endulula mo moshikundafanwa nosho yo momishangwa odo wa hala oku ka longifa. Diladila yo shi na sha naasho ovanhu tave lipula nasho. Mbela oshike sha kala tashi popiwa meenghundana? Ova palamenwa komaupyakadi elipi? Ngeenge owe lilongekida oku ka ulikila ovanhu kutya Eendjovo daKalunga odi na ouyelele oo tau ulike nghee Kalunga ta dulu okukandula po omaupyakadi avo, oto ka kala wa halelela okuninga ngaho, noto ka popya nexwamo paushitwe.

Exwamo ohali limonikila mokupopya wa mwenyopala. Ovanhu ohava dulu okumona kutya ou na exwamo ngeenge to popi wa mwenyopala. Osho oshi na okukala shi liwetikile komalinyengo oye okoshipala. Ou na okuulika kutya owa tomhwa u itavele osho to popi, ndele ku na okudivilika oinima oyo ihe fi yoshili.

Owa pumbwa okukala nondjele. Ovapopi vamwe ohava kala va nyakukwa kukeshe shimwe. Otashi dulika va pumbwa okukwafelwa va kaleke momadiladilo kutya ngeenge otava popi tava longifa oitya idjuu okuudiwa ko ile va mwenyopala sha pitilila, ovapwilikini otava ka yukifa elitulemo kuvo ponhele yokudiladila koshipopiwa sho vene. Mepingafano naasho, ovo ve na eehoni ova pumbwa okutuwa omukumo opo va kale hava popi nexwamo.

Okupopya nexwamo ohaku linyengifa ovapwilikini. Ngeenge oto popi to tale kovapwilikini noto popi nexwamo, ovapwilikini voye otava ka kala va tunhukwa. Apollos okwa li ha popi nondjungu, nokwa popiwa mOmbibeli kutya okwa li omunongo mokupopya. Ngeenge omhepo yaKalunga oye ku kwafele u popye nexwamo, oshipopiwa shoye osho to yandje nondjungu otashi ke linyengifa ovo to popi navo va katuke eenghatu. — Oil. 18:24, 25; Rom. 12:11.

Exwamo loye nali kale la wapalelela oshikundafanwa shoye. Lungama uha kale wa xwama unene eshi to yandje oshipopiwa opo uha lolokife ovapwilikini. Ngeenge oto popi wa xwama unene, ovapwilikini itava ka tambula ko osho to popi noitave ke shi tula moilonga. Osho otashi ulike nghee sha fimana u lilongekidile ouyelele oo tau ke shi ningifa tashi shiva opo u yandje oshipopiwa to longifa eenghedi dokupopya di lili noku lili. Kendabala okuhapopya monghedi oyo tai ulike okuhenakonasha. Ngeenge owa hoolola nawa ouyelele woye, oto ka kala we u hokwa neenghono. Ndele ope na oitwa imwe oyo u na okupopya nexwamo shi dulife ikwao, ashike ou na oku shi ninga nelungi momukokomoko woshipopiwa.

Oitwa oyo ya fimanenena oyo unene i na okupopiwa nexwamo. Oshipopiwa shoye oshi na okukala shi na oitwa oyo ya tongomana oyo ya nuninwa unene tuu okulinyengifa ovapwilikini va katuke eenghatu. Konima eshi wa tomha ovapwilikini voye, owa pumbwa oku va ladipika, oku va yelifila ouwa oo tava dulu okumona ngeenge ova tula moilonga osho wa kundafana navo. Okupopya nexwamo otaku ke ku kwafela u hange omitima dovapwilikini. Ku na okupopya wa fa omunhu te liningifa. Ngeenge to popi nexwamo, ou na oku shi ninga nelalakano, nouyelele woye otau ku kwafele u mone kutya openi u na okupopya nexwamo.