OSHITUKULWA 8

Ekelashi elongelokalunga loipupulu; kufa ombinga melongelokalunga lashili

1. Shi na sha nelongelokalunga, ovanhu ova taalelwa kehoololo lilipi kunena?

JESUS okwa ti: “Ou iha kala kumwe naame, oye e nondubo naame.” (Mateus 12:30) Otashi dulika tu li kombinga yaJehova ile kombinga yaSatana. Ovanhu vahapu ohava diladila kutya otava longele Kalunga monghedi oyo a hokwa, ndelenee Ombibeli otai ti kutya Satana ota “hongaula ounyuni aushe.” (Ehololo 12:9) Omamiliyona ovanhu okwa itavela kutya otaa longele Kalunga, ndelenee doshili otaa longele Satana Ondiaboli. Ovanhu kunena ova taalelwa kehoololo eli: Ove na okulongela Jehova, “Kalunga kashili,” ile Satana, ‘xe yoipupulu.’ — Epsalme 31:5, NW; Johannes 8:44.

Manguluka ko kelongelokalunga loipupulu

2. Onghedi imwe oilipi oyo Satana ta kendabala okukelela ovanhu va ha longele Jehova?

² Okuninga etokolo okulongela Jehova oko ehoololo lopandunge, ehoololo olo tali eta okuhokiwa kuYe. Ndelenee Satana ina hafela keshe umwe oo ta longele Kalunga; ota etele omaupyakadi ovo tave mu longele. Onghedi imwe oyo he shi ningi oyo okweeta omasheko ile omapataneko okudja kuvamwe, nokuli okudja kookaume nosho yo koilyo youkwaneumbo. Jesus okwa londwela ta ti: “Ndele novaneumbo vomunhu mwene otava ningi ovatondi vaye.” — Mateus 10:36.

3. Ngeenge oukwaneumbo woye ile ookaume koye tava pataneke okulongela Kalunga kwoye, oto ka ninga shike?

³ Ngeenge eshi otashi ku ningilwa, mbela oto ke linyenga ngahelipi? Ovanhu vahapu ove shi shii kutya onghedi yavo yokulongela Kalunga oya puka, ndelenee otava ongaonga okumanguluka ko kuyo. Otava diladila kutya oku shi ninga otashi ka kala oku he na oudiinini komaukwaneumbo avo. Mbela eshi oshi li tuu pandunge? Ngeenge ou shii kutya oilyo youkwaneumbo otai longifa oingangamifi ya nyika oshiponga, mbela ito ke i londwela kutya oingangamifi oyo otai ke va etela oshiponga? Ove ito ke limbwanga nande mumwe navo moku i longifa, hasho mbela?

4. Josua okwa popya shike kOvaisrael shi na sha nelongelokalunga pomafiku aye?

⁴ Josua okwa ladipika Ovaisrael va efe eenghedi domalongelokalunga a puka nosho yo eenghulunghedi dooxekululwa. Okwa ti: “Tileni hano paife Omwene noku mu longela mouyuki nomoshili ndee ekeleishi ookalunga ava ooxo yeni va longela kombada yaEufrat nomuEgipti, ndele longeleni Omwene.” (Josua 24:14) Josua okwa li omudiinini kuKalunga, na Jehova okwe mu nangeka noupuna. Ngeenge otu li ovadiinini kuJehova, ote ke tu nangeka yo noupuna. — 2 Samuel 22:26.

Omahongo opalongelokalunga oshili naao oipupulu

Oukwatatu: Omalongelokalunga mahapu otaa hongo kutya Kalunga Omukwatatu. Otaa ti kutya “Xe oKalunga, Omona [Jesus] oKalunga nosho yo Omhepo Iyapuki oKalunga, ndele kape na ooKalunga vatatu ndelenee oKalunga umwe.”

Ombibeli itai tumbula nokuli oshitya “Oukwatatu,” noitai hongo kutya Jehova ovanhu vatatu muumwe. Jehova oye aeke Kalunga. Ovakorinto votete 8:6 otava ti: “Ndele fye otu na Kalunga umwe, oTate.” Jehova oye Munenenene. Jesus ke fi Kalunga ndelenee “Omona waKalunga.” (1 Johannes 4:15) Sha faafana, omhepo iyapuki kai fi Kalunga. Omhepo iyapuki kai fi nokuli omunhu. Oyo eenghono daKalunga tadi longo. — Oilonga 1:8; Ovaefeso 5:18.
Omwenyo: Omalongelokalunga mahapu otaa hongo kutya omwenyo oo oshinima osho shi li meni lomunhu osho ihashi dulu nande okufya. Ombibeli otai hongo kutya omwenyo oo omunhu mwene noshoshili kutya omunhu oha dulu okufya. — Genesis 2:7; Hesekiel 18:4.
Omundilo woheli: Omalongelokalunga oipupulu otaa hongo kutya eemwenyo dovanhu vai otadi hepekwa moheli fiyo alushe. Ombibeli otai ti kutya ovafi “inava shiiva nande sha.” (Omuudifi 9:5) Ombibeli otai hongo yo kutya “Kalunga Oye ohole.” (1 Johannes 4:8) Jehova, Kalunga omunahole, ita ka hepeka nande ovanhu nomundilo.

Oshimhungu: Ombibeli otai hongo shike shi na sha nOukwatatu, omwenyo nosho yo omundilo woheli?

Ekelashi oinima oyo hai longifwa momalongelokalunga oipupulu

Omukainhu ta xwike po oinima yaye oyo i na ekwatafano noumhulile

5. Omolwashike tu na okweekelashi oinima youmhulile?

⁵ Okumanguluka ko komalongelokalunga oipupulu otaku ti yo kutya otu na okuhanauna po oshinima keshe shoumhulile osho tashi dulika tu na, ngaashi oiketi nosho yo oinima ya fa opo. Eshi osha fimana molwaashi otashi ulike kutya otwe lineekela muJehova filufilu.

6. Ovakriste vonale ova ninga shike shi na sha nomambo avo kombinga youmhulile?

⁶ Tala osho Ovakriste vonale va ninga eshi va tokola okukufa ombinga melongelokalunga lashili. Ombibeli otai ti: “Vahapu vomuava va li va longifa oupule wavo, ova eta omishangwa davo doupule da ndubilwa onduba, ndele ve di xwika po moipafi yovanhu.” — Oilonga 19:19.

7. Oshike hatu dulu okuninga ngeenge eendemoni otadi tu hepeke?

⁷ Vamwe ovo va tameka okulongela Jehova ndele ova kala nale va kufa ombinga sha yukilila moulodi ile moumhulile otashi dulika tava hepekwa keendemoni. Ngeenge otashi ku ningilwa, ifana Jehova mokule meilikano, to longifa edina laye. Ote ke ku kwafela. — Omayeletumbulo 18:10; Jakob 4:7.

8. Ovakriste ohava tale ko ngahelipi oihongwafano nomafano oo taa longifwa momalongelokalunga oipupulu?

⁸ Ovo va hala okulongela Jehova kave na okukala ile okulongifa oshihongwafano ile efano keshe olo li li oshitukulwa shomalongelokalunga oipupulu. Ovakriste vashili ‘otava ende meitavelo, hamokumona.’ (2 Ovakorinto 5:7) Ohava fimaneke omhango yaKalunga oyo tai kelele elongifo lomafano oludi keshe meilikano. — Exodus 20:4, 5.

Endafana noshiwana shaJehova

9. Ombibeli otai yandje omayele elipi kombinga yokuninga ovanaendunge?

⁹ Ombibeli otai ti: “Kala nokweenda novanongo, opo nee naave yo u ninge omunongo.” (Omayeletumbulo 13:20) Ngeenge otwa hala okukala ovanaendunge, otwa pumbwa okweenda ile okweendafana nEendombwedi daJehova. Do odi li ovanhu ovo tava ende mondjila oyo tai twala komwenyo. — Mateus 7:14.

10. Ongahelipi Eendombwedi daJehova tadi dulu oku ku kwafela u longele Kalunga?

¹⁰ Eendombwedi odi na ko nasha shili novanhu. Oilonga yado oyo okukwafela ovanamitima diwa va ude ko oshili yOmbibeli oyo tai twala komwenyo waalushe. Otadi dulu oku ku kwafela u konakone Ombibeli oshali. Otadi ka nyamukula omapulo oye noku ku ulikila nghee u na okutula moilonga eshiivo lOmbibeli monghalamwenyo yoye. — Johannes 17:3.

11. Ongahelipi okwoongala kwopaKriste taku ke ku kwafela?

¹¹ Pokwoongala kwado, oko haku ningilwa unene tuu pOlupale lOuhamba, oto ke lihonga shihapu kombinga yeenghedi daJehova. Ehalo loye otali ka pamekwa u kale melongelokalunga lashili. Noto ka mona yo edeulo nghee to dulu okukwafela vamwe ve lihonge oshili yOmbibeli. — Ovaheberi 10:24, 25.

12. Ongahelipi eilikano tali dulu oku ku kwafela u longele Kalunga?

¹² Eshi to lihongo shihapu kombinga yehalo nelalakano laJehova, olupandu loye lokupandula eenghedi daye dopahole otali ka hapupala. Ehalo loye lokuninga osho tashi mu hafifa nokuhenuka osho tashi mu nyematifa otali ka kula yo. Dimbuluka kutya oto dulu okupopya naJehova meilikano u mu pule e ku kwafele u longe eshi sha yuka nokuhenuka osho sha puka. — 1 Ovakorinto 6:9, 10; Ovafilippi 4:6.

Oukwaneumbo tau lesha Ombiibeli pamwe — Ongahelipi to dulu okukala melongelokalunga lashili?

13. Ongahelipi to dulu okuhafifa omutima waJehova?

¹³ Konima yefimbo, eshi wa kula pamhepo, nope he na omalimbililo oto ka mona omhumbwe yokukala Ondombwedi yaJehova ye mu liyapulila noya ninginifwa. Mokulimbwanga mumwe nongudu yoshiwana shaJehova, oto ka hafifa omutima waYe. (Omayeletumbulo 27:11) Oto ka kala mokati koshiwana shi na elao osho Kalunga a popya ta ti: “Ame nda hala okukala muvo, nokweenda mokati kavo, Ame ohandi kala Kalunga kavo, ovo notava ningi oshiwana shange.” — 2 Ovakorinto 6:16.

Onda manguluka ko keendemoni

Onguloshi imwe manga ame nomushamane wange twa li mombete twa kofa, onda uda ewi tali ifana edina lange oikando itatu. Opo nee onda mona oshihokohoko tashi tauka pokati, netanga la fa omundilo ola kupulwa medimo lange. Doshili, omushamane wange ka li a dula okumona nande oshimwe shomoinima ei. Ndelenee, onda li ndi udite oupyu utilifa oo wa kala oule weemwedi dihapu.

Konima yeemwedi hamano, ewi ola ufana nge vali. Divadiva eumbo alishe ola li la fa li li koshi yomeva mahapu. Ombome ya kula oya dja momeva ndele tai lidingile eke lange. Onda kendabala oku i linipa. Onda li nda tila neenghono adishe. Opo nee omeva neyoka oya kana po nonda li nda dengwa pedu neenghono. Onda kala ndi he shii apa ndi li oule weevili. Opo nee ondaka oya lombwela nge ndi shune kotembeli yomomukunda yokuvelula noumhulile. Eshi nda pula ondemoni edina layo, oya lombwela nge edina tali ti “mwene woupuna ndele hawounona.” Oya udanekela nge okuninga nge oshipuna okupitila meenghono dokuvelula.

Ovanaudu ove uya kwaame okudja keshe pamwe. Fimbo inava fika peumbo lange, okwa li hava holoka moshitengelelo shange she likalekelwa. Opo nee, eshi omunhu a fika, ondi na okudenga eke lange keke laye, noukwatya womukifi waye ile oupyakadi waye pamwe noshihakulifo ohandi i hololelwa divadiva. Ondemoni oya lombwela nge yo kutya ovanhu ove na okufuta oimaliwa i fike peni.

Onda mona oimaliwa neeshali dihapu omolwokupondola okuvelula. Onda ninga “mwene woupuna,” ndelenee onde lihonga yo eityo leendjovo “hawounona.” Efimbo keshe hai mono okaana, oko ka li omukulu wako ohaka fi. Eshi osha li unene shinyikifa oluhodi. Pefimbo lomido 12 odo nda longela ondemoni ei, ounona vange vahamano ova fya.

Onda tameka okwiilikana kuKalunga omolwekwafo. Onda ilikana nda mana mo. Efiku limwe Eendombwedi daJehova oda konghola pomuvelo wange. Nonande onda kala hai di taataa shito, efiku olo onda tokola okupwilikina. Meenghundafana da ka landula ko, onda shiiva kutya ohandi longele ondemoni. Onda tokola toko okweefa po oumhulile.

Eshi nda lombwela ondemoni, oya londwela nge tai kondjifa etokolo lange. Ndelenee onda ti: “Nghi na vali ekwatafano naave.”

Onda xwika po oinima aishe oyo nda kala handi longifa mokunyanekela. Onda konakona Ombibeli nEendombwedi, onda ninga omupiya waJehova nonda li nda ninginifwa mo 1973. Paife ondi na ounona vatano ve na oukolele. Omushamane wange naye okwa ninga Ondombwedi ya ninginifwa. — Ngaashi sha hokololwa kuJosephine Ikezu.

Oshimhungu: Omukainhu umwe okwa manguluka ko ngahelipi keendemoni?