Onghundana iwa momalaka 500

ESHI oita yopashiwana moRwanda ya li metifa, okangudu kanini kovatoloki oka li ka ya onhapo ka fiya po omaumbo avo nosho yo oiniwe yavo. Ndele ovatoloki ovo ova li va dula okuvakula eekombiyuta davo (eelaptop), ndele tava i nado keekamba deenhauki. Omolwashike mbela? Opo va dule okutwikila nokutoloka oishangomwa ya kanghamena kOmbibeli mOshikinyarwanda.

Omukainhu umwe omunyasha wokOushilolukadi laAsia okwa li ha topaatopa oufiku kokombiyuta yaye, te lididimikile eloloko, oupyu nosho yo olusheno olo la li hali uko omafimbo mahapu, osho sha li hashi piyaaneke oilonga yaye yokutoloka. Elalakano laye ola li lashike? Opo a dule okumana okutoloka pefimbo oishangomwa i ka nyanyangidwe.

Ovatoloki ovo ove li oshitukulwa shetanga lovaliyambi 2 300 lwaapo, ovo hava longele meenhele di dule 190 mounyuni aushe. Ove na omido okudja po 20 fiyo 90 lwaapo, nohava longo noudiinini nonehalo liwa opo ovanhu va dule okuhekelekwa ketumwalaka lOmbibeli momalaka 500. — Ehololo 7:9.

Onghundana iwa tai fiki kovanhu vomalaka e lili noku lili

Omido opo da di ko, oilonga yokutoloka yEendombwedi daJehova oya tamunuka mo neenghono inashi monika nale. Pashihopaenenwa, mo 1985, Oshungonangelo oya li hai nyanyangidwa pefimbo limwe momalaka 23, naasho osha li omupondo munene pefimbo opo. Kunena, Oshungonangelo oi li momalaka 176, nohai nyanyangidwa pefimbo limwe opo ovaleshi mounyuni aushe va dule okukonakona ouyelele wa faafana pefimbo limwe.

Oshungonangelo oyo aike oshifo hashi piti pandjikilile momalaka 50 lwaapo. Omolwashike? Omolwaashi omahangano opangeshefa okupilinda kae na lela ondjungu okunyanyangida oishangomwa momalaka omoitukulwa. Ashike Eendombwedi daJehova mounyuni aushe ohadi yandje omayambidido nehalo liwa pa kale oimaliwa ya wana opo Eendjovo daKalunga nosho yo oishangomwa oyo ya kanghamena kOmbibeli i dule okumonika keshe apa pe na omhumbwe. — 2 Ovakorinto 8:14.

Ovanhu ohava kala va lenga neenghono etumwalaka lOmbibeli ngeenge li li momalaka avo. Pashihopaenenwa, mefimbo opo la di ko, opa kala tapa nyanyangidwa oishangomwa ya kanghamena kOmbibeli mOshimiskito, elaka olo hali popiwa kovanhu 200 000 lwaapo muNicaragua. Omukainhu umwe okwa li a pula a etelwe Embo lange lomahokololo Ombibelia mOshimiskito, nopefimbo opo la etwa, omukainhu oo okwa hangwa e li nomufita umwe womoshitukulwa shavo. Eshi omufita oo a mona embo olo liwa, okwa li a hala li ninge po laye. Ndele omukulukadi oo okwa li a anya oku li mu pa, nokuli naashi omufita a li ta ti kutya nava kumaane embo olo nokashako komakunde omo hamu longwa okoofi keekilograma 20.

Omido omulongo da pita, muMeksiko omwa kala tamu tolokwa oishangomwa ya kanghamena kOmbibeli momalaka oshidalelwamo e dule po 12, mwa kwatelwa Oshimaya, Oshinahautl nosho yo Oshitzotzil. Moule womido inadi konda pomulongo, omaongalo omuMeksiko Eendombwedi daJehova oo haa popi omalaka oshidalelwamo nosho yo elaka lokuudika okwa hapupala okudja po 72 nokwa konda pe 1 200. Eendombwedi daJehova ohadi kunu etumwalaka lOmbibeli momitima dovanhu, ndele ohadi efa Kalunga oye a menife eembuto doshili. — 1 Ovakorinto 3:5-7.

Etoloko lOmbibeli loshinanena momalaka 80

Omido opo da di ko, Eendombwedi daJehova oda longa noudiinini opo ku nyanyangidwe o-New World Translation of the Holy Scriptures, ye lixwa po ile moitukulwa yayo, momalaka 80. Osho osha etifa oidjemo ilipi? Ondombwedi imwe moSouth Africa oya popya shi na sha nOmbibeli yOshisawana ya ti: “Kai fi tuu oshilongifo shiwa. Otai ka kulika olupandu lange li na sha nEendjovo daKalunga. Elaka olo la longifwa mo olipu okulesha nolihafifa.” Omuleshi umwe wOshitsonga a dja koMosambike okwa shanga a ti: “Nonande otwa kala tu na oishangomwa imwe ya kanghamena kOmbibeli, eshi twa kala tuhe na Ombibeli osha li ashike ngaashi keulu ku na omingungumo noushelu ndele odula itai loko. Ndele odula osho ya loko eshi twa mona o-New World Translation mOshitsonga.”

Ovo hava toloka nohava tandavelifa onghundana iwa yOmbibeli otava wanifa po exunganeko lonale monghedi ididilikwedi. Jesus Kristus okwa ti: “Evangeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.” — Mateus 24:14.

[Eshangelo lopedu]

[Efano li na sha nepambafano lomivalu pepandja 30]

(Opo u mone nghee ouyelele wa unganekwa, tala oshishangomwa sho vene)

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

OMUVALU WOMALAKA

[Omafano pepandja 30]

Ope na ovaliyambi 2 300 lwaapo hava toloka oishangomwa ya kanghamena kOmbibeli momalaka 500

BENIN

SLOVENIA

ETIOPIA

BRITANIA