7 Kalunga ota ka pwilikina ngoo nokunyamukula omailikano etu?

EPULO olo la pulwa metetekelo ola pendula ohokwe inene nola ningifa ovanhu va kale va halelela okumona enyamukulo. Ashike Ombibeli otai ulike kutya Jehova oha pwilikine komailikano ovanhu kunena. Ndele kutya nee oha pwilikine komailikano etu ile hasho, osho oshe likolelela kufye vene.

Jesus okwa li a tokola ovawiliki vomalongelokalunga vopefimbo laye ovo va li hava ilikana ve na oihelele; va li ashike have shi ningi opo ve limonikife kutya ovayuki. Jesus okwa ti kutya ovanhu va tya ngaho otava ka pewa “ondjabi yavo,” sha hala okutya, otava ka pewa ashike efimano kovanhu olo va li va halelela neenghono, ndelenee itava ka pewa osho va pumbwa, sha hala okutya, Kalunga ita ka pwilikina komailikano avo. (Mateus 6:5) Nokunena, ovanhu vahapu ihava ilikana metwokumwe nehalo laKalunga, ndelenee ohave shi ningi metwokumwe nehalo lavo vene. Ngeenge omunhu te lipwililikile omafinamhango Ombibeli oo twa kundafana, Kalunga ita ka pwilikina komailikano aye.

Ndele mbela ongahelipi shi na sha naave? Mbela Kalunga ota ka pwilikina ngoo nokunyamukula omailikano oye? Kalunga iha nyamukula omailikano ovanhu she likolelela komihoko davo, koukwashiwana ile keendodo davo moulikumwe wovanhu. Ombibeli otai tu shilipaleke tai ti: “Kalunga iha tale omunhu kombada. Ndele moshiwana keshe, keshe ou he mu tila ndee ta diinine ouyuki, ote mu wapalele.” (Oilonga 10:34, 35) Mbela naave oho wanifa po ngoo oiteelelwa oyo ya popiwa meendjovo odo? Ngeenge oho tila Kalunga, ou na okukala we mu tumbaleka neenghono nou na okukala wa tila okuninga osho tashi mu nyemateke. Ngeenge oho longo ouyuki, kungaho oto kendabala okulonga osho Kalunga ta ti osha yuka, ndele ito longo ehalo loye ile osho vamwe va hala u ninge. Mbela owa hala ngoo shili Kalunga a kale ha pwilikine komailikano oye? Ombibeli otai ku ulikile nghee u na okwiilikana opo Kalunga a pwilikine komailikano oye.a

Oshoshili kutya ovanhu vahapu ova hala Kalunga a kale ha nyamukula omailikano avo pashikumwifilonga. Ndele nokuli nopefimbo lOmbibeli, Kalunga ka li naanaa ha nyamukula omailikano ovanhu pashikumwifilonga. Efimbo limwe okwa li hapa piti omafelemido eshi kwa shangwa oshikumwifilonga shonhumba opo ku ningwe shikwao vali. Shimwe vali, Ombibeli otai ulike kutya oikumwifilonga oya xula po nale konima eshi ovayapostoli va fya. (1 Ovakorinto 13:8-10) Ndele mbela osho osha hala okutya Kalunga iha nyamukula omailikano ovanhu kunena? Hasho nandenande! Natu ka taleni komailikano amwe oo Kalunga ha nyamukula.

Kalunga ohe tu pe ounongo. Jehova oye Odjo ya shiya ko younongo washili. Oha yandje ounongo nehalo liwa kwaavo va hala ewiliko laye nohava kendabala okukala ovanongo. — Jakob 1:5.

Kalunga ohe tu pe omhepo yaye iyapuki oyo hai tu etele omauwa mahapu. Omhepo iyapuki oyo eenghono daKalunga tadi longo. Kape na vali eenghono dimwe dinene di dule omhepo yaKalunga. Omhepo iyapuki otai dulu oku tu kwafela tu lididimikile omayeleko. Otai dulu oku tu kwafela tu kale tu na ombili ngeenge hatu mono oixuna. Otai dulu yo oku tu kwafela tu kulike omaukwatya makwao mawa. (Ovagalati 5:22) Jesus okwa li a shilipaleka ovashikuli vaye kutya Kalunga oha yandje omhepo yaye nehalo liwa. — Lukas 11:13.

Kalunga oha yandje eshiivo kwaavo tave mu kongo va mana mo. (Oilonga 17:26, 27) Mounyuni aushe omu na ovanhu ovo tava kongo oshili va mana mo. Ova hala okushiiva shihapu kombinga yaKalunga, ngaashi edina laye, elalakano laye li na sha nedu nosho yo ovanhu, nonghee tava dulu okweehena popepi naye. (Jakob 4:8) Eendombwedi daJehova ohadi shakene luhapu novanhu ovo va hala okushiiva oshili nohadi nyamukula nehafo omapulo a tya ngaho tadi longifa Ombibeli.

Mbela naave osho osho she ku linyengifa opo u tambule ko oshifo eshi? Mbela naave oto kongo Kalunga? Otashi dulika ei oyo onghedi omo Kalunga a nyamukula eilikano loye.

[Eshangelo lopedu]