Eilikano

6 Ohali kwafa ngoo shili?

MBELA eilikano ohali tu etele ngoo shili ouwa? Ombibeli otai ulike kutya omailikano ovapiya vaKalunga ovadiinini ohae va etele shili ouwa. (Lukas 22:40; Jakob 5:13) Doshili, eilikano otali dulu oku tu kwafela pamhepo, pamaliudo nokuli nopalutu. Ngahelipi mbela?

Natu tye nee ngeno okaana koye oka pewa oshali yonhumba. Mbela oto ke ka honga kutya osha wana shimha ashike ke udite kutya oka pandula? Ile oto ke ka honga ka kale haka ulike olupandu? Ngeenge hatu popi omaliudo etu a fimana, ohatu ka holola kutya otu udite ngahelipi, navamwe otava ka shiiva kutya otu udite ngahelipi. Mbela osho osho shi li ngaho shi na sha nongeenge hatu popi naKalunga okupitila meilikano? Heeno! Natu ka taleni koihopaenenwa imwe.

Omailikano olupandu. Ngeenge hatu pandula Tate yetu omolwomauwa oo hatu mono, kungaho ohatu yandje elitulemo komanangeko noupuna oo twa pewa. Oshidjemo, ohatu dulu okukala tu udite olupandu linene, twa hafa neenghono notu na etaleko liwa. — Ovafilippi 4:6.

Pashihopaenenwa: Jesus okwa li a ulika olupandu laye omolwonghedi omo Xe a li a pwilikina nokwa nyamukula omailikano aye. — Johannes 11:41.

Omailikano e na sha nokudiminwa po. Ngeenge hatu pula Kalunga e tu diminine po, ohashi tu kwafele tu kale tu na eliudo liwa, tu ulike kutya otwe livela ombedi shili nohashi tu dimbulukifa kutya oulunde oshinima sha kwata moiti. Navali, itatu ka kala twa wililwa po keliudo li udite etimba.

Pashihopaenenwa: David okwa li a ilikana kuJehova ta ulike kutya okwe livela ombedi nokwa nyika oluhodi. — Epsalme 51.

Okwiilikana tu pewe ewiliko nounongo. Ngeenge otwa kala hatu ilikana kuJehova e tu pe ewiliko ile e tu pe ounongo oo twa pumbwa opo tu dule okuninga omatokolo mawa, otashi ke tu kwafela tu kale twe lininipika shili. Otashi ke tu dimbulukifa yo kutya otu na omangabeko noku tu kwafela tu kale twe lineekela muTate yetu womeulu. — Omayeletumbulo 3:5, 6.

Pashihopaenenwa: Salomo okwa li a indila nelininipiko a pewe ewiliko nounongo opo a dule okupangela Ovaisrael. — 1 Eehamba 3:5-12.

Okwiilikana ngeenge tu li momaudjuu. Ngeenge otwa mbubulile Kalunga omitima detu shimha twa wililwa po pamaliudo, omitima detu otadi ka kala da pepelelwa nohatu ka kala twe lineekela muJehova ponhele yokukala twe lineekela mufye vene. — Epsalme 62:9.

Pashihopaenenwa: Ohamba Asa oya li ya ilikana eshi ya li ya taalela ovatondi ovanaenghono. — 2 Omafimbo 14:11.

Okwiilikanena ovo ve na omhumbwe. Omailikano a tya ngaho ohae tu kwafele tu kondjife oikala yokuliholamwene notu kale tu uditile vamwe olukeno nosho yo oukwao wananghali.

Pashihopaenenwa: Jesus okwa li a ilikanena ovashikuli vaye. — Johannes 17:9-17.

Omailikano omahambelelo. Ngeenge hatu hambelele Jehova omolwoinenelonga nomolwomaukwatya aye, ohatu ka kala twe mu fimaneka nokukala tu na olupandu linene. Omailikano a tya ngaho otaa dulu yo oku tu kwafela tu ehene popepi elela naKalunga Tate yetu.

Pashihopaenenwa: David okwa li a hambelela Kalunga nohamu omolweshito laye. — Epsalme 8.

Enangeko noupuna vali limwe olo hatu dulu okumona okupitila meilikano olo okukala tu “nombili yaKalunga ei i dule eendunge adishe.” (Ovafilippi 4:7) Okukala tu na ombili mounyuni ou wa piyaana oshi li enangeko noupuna olo la pumba shili. Ohashi etele nokuli omunhu omauwa opalutu. (Omayeletumbulo 14:30) Ndele mbela ohatu dulu ashike okumona omauwa a tya ngaho omolweenghendabala detu vene? Ile ope na vali oshinima shimwe sha fimanenena osho sha kwatelwa mo?

[Eendjovo dididilikwedi pepandja 10]

Eilikano ohali etele omunhu omauwa mahapu, ngaashi palutu, pamaliudo naunene tuu pamhepo