Ehokololo Longhalamwenyo
Otwe lihonga oshilihongomwa sha fimanenena moilonga iyapuki
La hokololwa ku-Olivier Randriamora
‘Ondi shii okukala noluhepo nondi shii okukala nehepuluko, onda ika aishe nokukala akushe, okukuta nokufya ondjala. Aishe ohandi i dulu omolwaau ta pameke nge.’ — Fil. 4:12, 13.
EENDJOVO odo domuyapostoli Paulus oda kala etwomukumo linene kwaame nomukulukadi wange Oly. Ngaashi Paulus, nafye otwe lihonga okukala twe lineekela filufilu muJehova eshi hatu mu longele muMadagascar.
Eshi Eendombwedi daJehova da li da hovela okukonakona Ombibeli nameme waOly mo 1982, fye naOly otwa hangwa nale twe likonga. Ame naame onda li nda hovela okukonakona Ombibeli, nokonima yefimbo, Oly naye okwa ka ninga sha faafana. Opo nee, otwa li twa hombola mo 1983, hatu ninginifwa mo 1985 notwa li twa hovela oukwafelikokolindjila diva konima yaasho. MuJuli 1986, otwa li twa ninga ovakokolindjila vondjikilile.
MuSeptemba 1987, otwa li twa ninga ovakokolindjila ve likalekelwa. Tete, otwa li twa tumwa tu ka longele kokadoolopa kamwe kanini ke li kouningininolundume waMadagascar nokakwa li ku na eongalo nandenande. Oku na omihoko 18 lwaapo edi da kula nosho yo dihapu dinini nomifyuululwakalo dado oda yoolokafana filufilu. Nonande konhunhu oyo ohaku popiwa omalaka amwe e lili, elaka lopambelewa ohali ifanwa Oshimalagasi. Onghee hano, otwa li twa hovela okulihonga imwe yomeenyapilaka odo, naasho oshe tu kwafela tu tambulwe ko diva kovanhu vomoshitukulwa.
Potete, onda li handi yandje oshipopiwa shomoipafi Osoondaxa keshe, nokonima yoshipopiwa, Oly okwa li ha pandulile nge omake nehafo. Pokwoongala oko ofye atuke twa li hatu kala po. Otwa li yo hatu ningi Ofikola yOkudeula Ovaudifi ye lixwa po, nongeenge Oly ta yandje oshipopiwa, okwa li he lipopile onga ta popi nomuneumbo. Ndele otwa ka pandula neenghono eshi omupashukilishikandjo umwe a li e tu talela po, ndele te tu pe eetepo lopahole kutya natu lundulule onghedi omo hatu ningi okwoongala kwetu.
Molwaashi opoosa kaya li hai yandje eyakulo liwa, efimbo limwe katwa li hatu mono oumaliwa vokulikwafa ovo hatu tuminwa omwedi keshe. Osho oshe tu honga okukala noluhepo. Pashihopaenenwa, efiku limwe otwa li twa hala okuya koshoongalele shoshikandjo osho sha li tashi ka ningilwa konhele i li kokule oshinano sheekilometa 130 lwaapo, ndele katwa li tu na oimaliwa ya wana okufuta obesa. Otwa li twa dimbuluka omayele amwe twa pewelwe kOndombwedi imwe, ya ti: “Lombweleni Jehova kombinga youpyakadi weni, molwaashi oilonga ei tamu longo oyaye.” Onghee hano, otwa li twa ilikana kuJehova notwa tokola okuya koshoongalele kolupadi. Ndele fimbo twa li pokuya, omumwatate umwe okwa li e uya oku tu talela po inatu shi teelela nokwe tu pa omaano opashimaliwa, oimaliwa ya wana naanaa okufuta obesa.
OUPASHUKILISHIKANDJO
MuFebruali 1991, onda li nda nangekwa po ndi li omupashukilishikandjo. Pefimbo opo, okangudu ketu oka hangwa ka kula ke na ovaudifi 9 navatatu vomuvo ova ninginifwa, novanhu 50 lwaapo ohava kala pokwoongala. Konima eshi nda deulwa, otwa li twa tumwa tu ka longele koshilandopangelo Antananarivo ndi li omupashukilishikandjo. Mo 1993, otwa li twa ka longa natango oilonga youpashukilishikandjo koshitukulwa shokoushilo woshilongo. Eenghalo dako oda li da yooloka ko neenghono kwaadi domoshilando.
Ndele opo tu dule okufika komaongalo nokeengudu dokokule, otwa li tu na okweenda kolupadi; fimbo limwe otwa li hatu ende eekilometa 145 hatu tavakana ofuka i yadi eemhunda. Otwa li hatu kendabala alushe okukaleka omitwalo detu dinini. Ndele ngeenge oshipopiwa shovapashukilishikandjo osha kwatela mo okuulika ofilima yonhumba ngaashi sha li hashi ningwa nale, osha li hashi ningifa omitwalo detu di kale didjuu nai. Oly oye kwa li ha humbata eshina lokuulika omafano, ofimbo ame handi humbata opatilii yohauto.
Luhapu otwa li hatu ende oshinano sheekilometa 40 lwaapo efiku keshe, hatu di keongalo limwe twa finda kulikwao. Otwa li hatu ende twa landula eendjila hatu londo nokukuluka keemhunda, hatu tauluka omilonga nohatu ende monhopo. Omafimbo amwe, otwa li hatu nangala pominghulo deendjila, ashike luhapu otwa li hatu kendabala okuya momukunda wonhumba omo tu ka konge omulele. Ndele omafimbo amwe otwa li nokuli hatu pula ovanhu ovo tuhe shii nandenande ve tu pe omulele. Shimha twa mono onhele yokunangala, ohatu hovele okulongekida oikulya yetu. Oly oha ehela ombiya yokutelekela ndele ta ka teka omeva momulonga ile metale lopopepi. Ofimbo ame handi ehela ekuva opo ndi ka pande oikuni yokutelekifa. Oilonga aishe oyo oya li hai kwata olule. Peemhito dimwe otwa li hatu lande oxuxwa i na omwenyo ndele hatu ke i dipaa noku i pushula.
Shimha twa mane okulya otwa li hatu ka teka omeva okulikosha. Omafimbo amwe otwa li hatu nangala mokombifa. Ngeenge taku lokwa, otwa li hatu nangala twa yaamena kekuma opo tuha lokwe eshi monduda tamu lokwa eenhongo.
Otwa li twe litulila po elalakano lokuudifila alushe ovaneumbo ovo tave tu nangeke. Ngeenge otwa fiki, ohatu kala twa tunhukwa eshi Ovakriste vakwetu tava ungaunga nafye nolune noku tu yakula pahole. Ndele molwaashi ovamwatate ova li have tu pandula tashi di komutima eshi twe va talela po, ihatu dimbuluka vali eenghalo didjuu odo twa shakeneka mondjila.
Ngeenge twa idililwa kOvakriste vakwetu otwa li hatu va kwafele noilonga yavo yomeumbo opo va mone efimbo loku ka longa pamwe nafye moukalele. Katwa li hatu kala twa teelela ovaidilili vetu ve tu nangeke meenduda doudjeko ile ve tu telekele oitendele nonande itave shi dulu.
OKUTALELA PO EENGUDU ODO DE LIHEPA
Otwa li hatu kala twa hafa ngeenge hatu talele po eengudu odo de lihepa, molwaashi ovamwatate ovo ohave tu tambula ko nohamu nohatu kala lela twe lipyakidila. Katwa li hatu mono efimbo ‘lokutulumukwa po kanini.’ (Mark. 6:31) Pashihopaenenwa, ovalihomboli vamwe Ovakriste ova li va shiva ovakonakonimbibeli vavo 40 ve uye keumbo lavo opo tu konakone navo Ombibeli. Oly nomumwameme oo ova li va ninga omakonakonombibeli 20 lwaapo, ofimbo fye nomumwatate twa ninga makwao 20. Shimha twa mane okukonakona nomukonakoni umwe, ye mukwao ota shikula ko diva. Mokati komutenya, otwa li twa kufa okafudo nokuninga okwoongala kweongalo, nokonima yaasho, otwa li twa twikila nokuninga omakonakonombibeli. Luhapu otwa li hatu kala twe lipyakidila fiyo opohetatu yokonguloshi.
Shimha twa talele po ongudu yonhumba, atushe otwa li hatu penduka ongula pohetatu tu ye vali komukunda mukwao. Otwa li hatu djala oikutu ei ikulu. Ngeenge otwa tavakana eefuka diledile, ohatu ka fika komukunda mukwao moshanga shomutenya. Opo nee, ohatu djala oikutu ei i yela nokuhovela okuyandja oundombwedi meendelelo hatu ende eumbo neumbo. Omaumbo okwa li haa kala manini molwaashi ovaudifi ovahapu. Omolwetomheno olo, oshitukulwa okwa li hashi puko ashike meni lominute 30 lwaapo. Konima yaasho, otwa li hatu ka udifila komukunda wa shikula ko. Opo nee, ohatu lidenge vali edimo londjila twa finda keumbo. Potete, osho osha li hashi tu teya omukumo kanini. Otwa li hatu longifa efimbo lihapu nohatu ningi eenghendabala da mana mo okuya keenhele oko, ndele xuuninwa ohatu ka longa ashike eumbo neumbo oule wovili imwe lwaapo. Ashike Eendombwedi domoshitukulwa kada li di na oupyakadi nasho. Okwa li hadi kala lela da xwama.
Ongudu imwe yovaudifi vomuTaviranambo oya li popepi noxulo yomhunda. Otwa li twa hanga ko oukwaneumbo hau kala meumbo londuda imwe. Ohava ongalele mokatungo kamwe kanini ke li popepi neumbo lavo. Opo tu li po, omuneumbo oo okwa hovela okwiingida mokule ta ti: “Vamwatate!” Opo nee, otwa uda ewi limwe tali dilile lwokoxulo yomhunda tali ti: “Yee!” Omuneumbo okwa ingida vali ta ti: “Omupashukilishikandjo okwa fika!” Opo nee, mukwao okwa nyamukula ta ti: “Eewa!” Vati etumwalaka osho ashike la enda tali litambekidwa ngaho fiyo okwaavo vokoitukulwa yokokule. Ovanhu ova li va hovela okuuya diva, naashi okwoongala kwa ka hovela, ovanhu va konda pe 100 ova hangwa va fika nale.
OUPYAKADI WOYEENDIFO
Mo 1996, otwa li twa tumwa vali tu ka longe oilonga youpashukilishikandjo koshitukulwa shimwe shi li pokati koikulundudu yopopepi elela naAntananarivo. Koshitukulwa oko nako okwa li ku na omashongo ako. Kapa li oyeendifo yaaveshe hai i luhapu keenhele odo dokomikandi. Oshikando shimwe, otwa li twa ninga elongekido lokuya tu ka talele po ongudu imwe i li kuBeankàna (ile Besakay), pe na eekilometa 240 okudja muAntananarivo. Konima eshi twa kundafana nomushingi wokaloli kamwe kanini kombinga yofuto, otwa li twa pewa olefa. Meni lokaloli omo twa londa otwa hanga mo nale ovatwaalelwa vamwe 30 lwaapo, ofimbo pe na vamwe va nangala kombada yokaloli navamwe ove li omutumba va endjelelifa omaulu avo.
Ngaashi hashi tu ningilwa luhapu, inapa pita efimbo eshi okaloli ka teka notu na okutwikila olweendo letu kolupadi. Konima eshi twa enda oule weevili donhumba, okwa ka dja eloli limwe la kula. Omushingi weloli olo okwa li a fikama eshi twa mbilika, nokuli nonande meloli omu yadi nale ovanhu neendongelwa. Otwa londa notwa enda ashike twa fikama, molwaashi itatu dulu okukala omutumba. Otwa ka hanga po omulonga umwe, ashike inatu dula okutwikila nolweendo shaashi otwa hanga onhopa tai longwa. Okudja opo, otwe lidenga vali ondjila kolupadi notwa ka hanga po okamukunda kamwe kanini omo mwa li mu na ovakokolindjila vonhumba ve likalekelwa. Nonande inatu hangwa twa ninga elongekido komesho yefimbo, otwa kala hatu udifa pamwe navo ofimbo twa teelela onhopa i pwe okulongwa nokumona osheendifo shimwe.
Otwa ka mona ashike olefa konima yoshivike, nokudja opo otwa twikila vali nolweendo letu. Mupya munene, ondjila oya li i yadi omalambo makula neenghono. Natango, otwa li tu na okufikama lwoikando tu undule ohauto i tauluke omeva twa ya mo fiyo eengolo, naluhapu otwa kala nokupundauka eshi hatu undula ohauto. Xuuninwa, otwa ka fika efimbo longula yomanwanghoshi pokamukunda kanini apa twa helukila. Eshi twa dja ko kopate ei yakula, otwa li twa tavakana momapya olwishi e yadi omeva onhata omo twa ya mo fiyo oiya notwa ka fika ngoo nee komukunda oko twa finda.
Molwaashi osha li oshikando shetu shotete hatu talele po oshitukulwa osho, otwa li twa tokola okuyandja oundombwedi kovanailonga vamwe ovo hatu hange tava longo momapya olwishi noku tu udikila kutya openi hatu ka hanga Eendombwedi. Ndele katwa li tuu twa shambukwa neenghono eshi twa mona kutya mboli ovanailonga ovo ova li ashike ovamwatate vopamhepo!
HATU LADIPIKE VAMWE VA YE MOILONGA YEFIMBO LI YADI
Oshe tu etela ehafo linene okumona oidjemo yaashi twa kala hatu ladipike ovanhu oule womido va ye moilonga yefimbo li yadi. Fimbo twa li hatu talele po eongalo lonhumba omo twa hanga mu na ovakokolindjila vondjikilile omuwoi, otwa li twa ladipika omukokolindjila keshe a kwafele omuudifi umwe naye a ye moukokolindjila. Eshi twa ka talela po vali eongalo olo konima yeemwedi hamano, omuvalu vovakokolindjila vondjikilile otwa hanga wa londa pombada ve li 22. Ovamwameme vavali ovakokolindjila ova li va ladipika ooxe, ovo ve li ovakulunhuongalo, navo va ye moukokolindjila wondjikilile. Ovakulunhuongalo ovo navo ova li yo va ladipika omukulunhuongalo omutitatu naye a ye moukokolindjila. Konima yokafimbo, omukulunhuongalo oo omutitatu okwa ka nangekwa po e li omukokolindjila e likalekelwa. Lwanima, omumwatate oo nomukulukadi waye ova ka ya moilonga youpashukilishikandjo. Ndele mbela ongahelipi shi na sha novakulunhuongalo vakwao venya vavali? Umwe ota longo e li omupashukilishikandjo, ofimbo mukwao e liyamba okulonga oilonga yokutunga Omalupale Ouhamba.
Ohatu pandula Jehova efiku keshe eshi he tu kwafele notwa mona kutya itatu dulu okuninga sha keenghono detu vene. Oshoshili kutya omafimbo amwe ohatu kala twa loloka nohatu kwatwa komikifi, ndele nande ongaho, ohatu kala twa hafa ngeenge hatu dilonga koidjemo youkalele wetu. Jehova ota yambidida oilonga yaye notwa hafa eshi hatu kufa mo ombinga muyo nonande oinini. Paife ohatu longo tu li ovakokolindjila ve likalekelwa. Onghee hano, otwe lihonga oshilihongomwa sha fimanenena shokukala twe lineekela muJehova oo ‘he tu pameke.’
[Ouyelele u li pepandja 6]
Otwe lihonga oshilihongomwa sha fimanenena shokukala twe lineekela muJehova
[Okaalita/Omafano pepandja 4]
Madagascar oyo onhunhu onhine mounene keenhunhu domounyuni aushe, nohai ifanwa Onhunhu Inene Itilyana. Edu layo olitilyana noku na omaludi mahapu oishitwa ye likalekelwa
[Efano pepandja 5]
Okuya momalweendo okwa li eshongo linenenene kufye
[Omafano pepandja 5]
Ohatu tyapula okuninga omakonakonombibeli pamwe novamwatate