Omunaendunge oha kongo ‘omadiladilo opandunge’

Onghalamwenyo otai dulu okufaafanifwa nolweendo loshikepa. Ndele ounongo wopanhu haalushe hau kwafele ovanhu va pondole monghalamwenyo. Vahapu ova li va shakeneka omaupyakadi a fa oshikepa ya tekela mefuta la pindjala. (Eps. 107:23, 27) Omolwashike efaafanifo olo la yukila ko?

Pefimbo lonale, omunhu okwa li a pumbwa okukala e na owino opo a dule okuungaunga nomashongo oo haa shakenekwa molweendo lomefuta. Ovanhu ova li ve na okulihonga kovaendifuta vakulu, naunene tuu ovashingi veeshikepa. (Oil. 27:9-11) Momafano mahapu opefimbo lonale omwa li hamu kala mwa fanekwa efano lomushingishikepa la nenepekwa li dule avakwao opo ku divilikwe onghandangala oyo ta dana. Ovaendifuta ova li ve na okulihonga kombinga yeenyofi, onghalo yomhepo nosho yo oinima imwe vali opo va dule okuya molweendo lomefuta. Ombibeli oya ti kutya ovaendifuta vamwe ova li “ovanongo.” — Hes. 27:8.

Okuungaunga nomaupyakadi omonghalamwenyo yokunena otaku faafanifwa nokuungaunga nomaudjuu oo a li haa shakenekwa kovaendifuta vopefimbo lonale. Ndele mbela oshike tashi ke tu kwafela opo tu dule okupita muo?

ONGAHELIPI HATU DULU OKUMONA ‘OMADILADILO OPANDUNGE’?

Tu na momadiladilo efaafanifo longhalamwenyo nolweendo loshikepa, natu taleni kOmushangwa ou tau ti: ‘Omunongo na pwilikine opo a hapupalife eendunge, nomunaendunge ta ka pewa omadiladilo opandunge.’ (Omayel. 1:5, 6) Oshitya shOshiheberi osho sha tolokwa ‘omadiladilo opandunge’ otashi dulu yo okuyukifwa keenghatu odo kwa li hadi katukwa komukulunhu woshikepa wopefimbo lonale. Otashi yandje ediladilo lokuwilika nokukwatela komesho neendunge.

Otu na okuninga eenghendabala opo tu mone ‘omadiladilo opandunge’ nokulihonga okutauluka nomupondo omaupyakadi omokukalamwenyo. Ngaashi Omayeletumbulo taa popi, otu na okweefa “ounongo,” ‘omayele’ ‘neendunge’ di kale tadi tu wilike. (Omayel. 1:2-6; 2:1-9) Otu na okukala hatu kongo ewiliko kuKalunga, molwaashi nokuli novakolokoshi ove na ewiliko lavo nonande itali kwafa sha. — Omayel. 12:5.

Onghee hano, osha fimanenena okukala hatu konakona Eendjovo daKalunga moule. Ekonakono la tya ngaho otali dulu oku tu kwafela tu mone omauyelele a fimanenena kombinga yaJehova nosho yo yaJesus Kristus, oo a li ha hopaenene Xe filufilu. (Joh. 14:9) Ohatu pewa yo omayele mahapu opandunge pokwoongala kwopaKriste. Kakele kaasho, ohatu lihongo koimoniwa yavamwe, mwa kwatelwa yovadali vetu. — Omayel. 23:22.

OKUNONGELA OINIMA NOKUNINGA EEMHANGELA

‘Omadiladilo opandunge’ okwa fimana unene tuu pefimbo opo tu li momayeleko oo taa faafanifwa nefuta la pindjala. Ndele okukala tuhe shii kutya natu ninge po shike ngeenge tu li meenghalo odo da kitakana otaku dulu oku tu findila poshi, naasho otashi ka etifa oilanduliko inyikifa oluhodi. — Jak. 1:5, 6.

Shihokwifa, oshitya osho sha tolokwa ‘omadiladilo opandunge’ otashi dulu yo okulongifwa moinima oyo ya pamba oita. Ombibeli oya ti: “Molwokudiladila nawa to dulu okushinga oita, nouhapu wovapukululi tau eta efindano.” — Omayel. 20:18; 24:6.

Ngaashi ondjai onghulungu tai unganeke oita, nafye otwa pumbwa okunongela oinima oyo tai dulu okunyona po oupamhepo wetu. (Omayel. 22:3) Pashihopaenenwa, otashi dulika wa pumbwa okuninga etokolo li na sha nokutambula ko oilonga yonhumba ile okuyelwa moilonga. Nopehe na omalimbililo, oto ke lipula shi na sha nondjabi, efimbo lokuya nokwaaluka koilonga nosho tuu. Kakele kaasho, ope na oinima imwe vali oyo u na okukaleka momadiladilo. Pashihopaenenwa, lipula kutya, Mbela oilonga oyo oi li ngoo metwokumwe nomafinamhango Ombibeli? Mbela omalipyakidilo ange opaKriste otaa ka kumwa ngahelipi keevili doilonga, ngaashi ngeenge otai pula ndi ka longe pomafimbo a yoolokafana? — Luk. 14:28-30.

Ondombwedi yaJehova imwe yedina Loretta oya li ya mona oilonga iwa mofeema yonhumba yoikulya. Eshi ofeema yavo ya li pokutembukila konhele imwe, Loretta okwa li a udanekelwa kutya ota ka pewa ondodo iwa ngeenge ova i konhele oko. Ovakulunhu voilonga ova li ve mu lombwela tava ti: “Omhito ei oya denga mbada neenghono noito i pewa luvali. Otwa mona nale nokuli kutya Olupale leni lOuhamba oko li li.” Ashike Loretta okwa li a hala okukala nonghalamwenyo i li paunafangwa opo a dule okulongela Omushiti waye pauyadi. Okwa li a mona kutya ondodo oyo ipe itai ke mu pa efimbo la wana lokuwanifa po omalipyakidilo aye opaKriste. Nonande omukulunhu woilonga okwa li ta kendabala okuheka Loretta kutya oye aeke omunailonga oo inava hala okukanifa, okwa li a efa po oilonga oyo. Loretta oo paife a kala ta kokola ondjila oule womido 20 lwaapo, okwa mona kutya okuninga eemhangela to ‘diladila pandunge’ oko kwa li kwe mu etela oidjemo iwa molwaashi okwa li ku li metwokumwe nomayele oo taa hangwa mEendjovo daKalunga. Osho oshe mu kwafela a pameke ekwatafano laye naJehova nokukala e na oufembanghenda wokukwafela vahapu va tambule ko oshili yOmbibeli.

‘Okudiladila pandunge’ okwa pumbiwa yo momaukwaneumbo. Okutekula ounona ohaku kwata olule nomatokolo oo ovadali hava ningi e na sha noinima yopamhepo ile yopamaliko ohaa kumu onakwiiwa youkwaneumbo aushe. (Omayel. 22:6) Pashihopaenenwa, ovadali Ovakriste ove na okulipula kutya: ‘Mbela ohatu kwafele ngoo ounona vetu va kale ve na ekwatafano liwa naJehova okupitila meendjovo nomoshihopaenenwa shetu osho tashi ke va kwafela va dule okuninga omatokolo opandunge shimha va kulu? Mbela onghedi yetu yokukalamwenyo otai hongo ngoo ovana vetu okukala nonghalamwenyo i li paunafangwa nokuyandja elitulemo koukalele wavo wopaKriste?’ — 1 Tim. 6:6-10, 18, 19.

Okupondola kwashili monghalamwenyo ihaku ufwa kouhapu womaliko ile komalalakano oo haa lalakanenwa kovakwaunyuni vahapu. Ohamba Salomo oya li ya uda ko nawa oshinima osho, nomolwaasho ya li ya nwefwa mo i shange tai ti: “Ava hava tila Kalunga, otava ka ningilwa nawa, shaashi tava tila koshipala shaye.” (Omuud. 8:12) Osho otashi ulike kutya osha fimanenena ‘okudiladila pandunge’ twe likolelela kEendjovo daKalunga nokukala metwokumwe nado. — 2 Tim. 3:16, 17.

[Efano pepandja 30]

Luhapu ovashingishikepa okwa li hava nenepekwa momafano ve dule ovaendifuta vakwao opo ku divilikwe onghandangala oyo tava dana

[Odjo yefano]

Su concessione del Ministero per i Beni e le Attività Culturali. Osha dilikwa okuninga okopi yefano eli monghedi yonhumba ile yongadi