Mbela ope na oo ha udu omailikano?

PATRICIAa WOKOIRELAND okwa ti: “Onda kala nda limbililwa ngeenge Kalunga oko ngoo e li shili. Ndele nande ongaho, omafimbo amwe onda kala handi ilikana. Kanda li ndi na oushili kutya ope na oo ha udu omailikano ange, ndele onda li nde lineekela kutya ope na umwe ta pwilikine. Kanda li nda hafa nokanda li ndi na elalakano lasha monghalamwenyo. Onda kala ndi na oumbada wokwiitavela muKalunga molwaashi onda li handi diladila kutya ovanhu vongaho ovo ashike va itavela muKalunga.”

MBELA naave oho kala u udite ngaashi Patricia efimbo limwe? Mbela oho ilikana nonande owa limbililwa kutya Kalunga oko e li ile hasho? Ngeenge osho, shiiva kutya haave auke. Natu ka tale koihopaenenwa tai landula.

◼ Ovanhu 2 200 vomoBritania ovo va li va pulwapulwa ova popya kutya eepersenda ashike 22 da itavela kutya oku na Kalunga oo a shita ounyuni noha pwilikine komailikano ovanhu. Ashike eepersenda 55 daavo va pulwapulwa ohadi ilikana omafimbo amwe.

◼ Omakonakono amwe otaa ulike kutya eepersenda 30 lwaapo dovanhu 10 000 vomomanenedu anhe ovo va ti kutya inava itavela muKalunga ohadi ilikana.

Omolwashike ovanhu ve li momalimbililo?

Allan wokuEngland okwa ti: “Onda li handi popi kutya inandi itavela muKalunga molwaashi onda li handi diladila kutya omalongelokalunga okwa totwa po nelalakano lokupangela ovanhu nokukonga oimaliwa. Natango, ngeno okwa li ku na Kalunga, ngeno okuhenouyuki inaku hapupala neenghono. Ashike fimbo limwe ohandi kala nda mwena ndi li omutumba ndele handi popi naumwe oo ndihe shii. Ohandi lipula yo kutya: ‘Onda holoka po ngahelipi?’”

Omunhu keshe oo ha diladila ngaho oku na omatomheno okukala a limbililwa ngeenge omailikano aye ohaa udika ngoo ile hasho. Peemhito dihapu, ovanhu ovo ve na omalimbililo otashi dulika a etifwa kokukala ve na omapulo inaa nyamukulwa, ngaashi aa taa shikula apa:

◼ Mbela oku na ngoo Omushiti?

◼ Omolwashike omalongelokalunga luhapu haa nwefa mo ovanhu va longe owii?

◼ Omolwashike Kalunga a efa okumona oixuna ku kale po?

Ngeenge owa mono omanyamukulo omapulo oo, mbela oto ka kala to ilikana u na omukumo shi dulife nale?

[Eshangelo lopedu]