OSHIPALANYOLE SHOKOMBADA: OMOLWASHIKE PE NA OKUMONA OIXUNA KUHAPU? NOTAKU KA XULA PO NAINI?
Efyo lovanhu vahapu vehe na ondjo!
Noelle okwa li okaana kawa ke hole okufaneka. Ndele pokulombo komatango efiku limwe okwa li taka ende moluumbo lavo ashike ombadilila oka wila mondama youkwaneumbo yokuyowa. Noelle okwa fya omeva eshi kwa li ku na ashike oivike ivali a wanife omido 4.
Charlotte, Daniel, Olivia, Josephine . . . oo omadina avamwe vomounona 20 ovo ve li pomido 6 ile 7 ovo va kwatelwa movanhu 26 ovo va ninga oihakanwa yedipao loshiponokela olo la li la ningwa pofikola yedina Connecticut mo-U.S.A., momafiku 14 Desemba 2012. Poshiviloxupulifo, Omupresidende Obama okwa li a tumbula omadina ounona nokwa lombwela ovapwilikini ovo va li va nyika oluhodi a ti: “Oiponga ei oi na okuxula.”
Bano oo a li e na eedula 18 okwa fiya po Iraq mo 1996 nokwa li a tembukila koNorway pamwe noukwaneumbo wavo. Ookaume kaye ova li ve mu luka oshilukadina Sun Rays (eenhe detango). Ndele shi nyikifa oluhodi, momafiku 22 Juli 2011, Bano okwa li a kwatelwa movanhu 77 ovo va li va dipawa komuhayavala, oo a li a popya te litade ta ti: “Ovanhu vahapu ova dja kelao . . . ngeno apeshe opo omulape ashike.”
Omahokololo a faafana ta yahameke omutima ohaa udika lwoikando mounyuni aushe. Diladila koluhodi nouyahame oo hau etifwa koiponga yoihauto, kekaulonyanga, koita, koukulo, koiponga yopaushitwe nosho yo koiponga imwe vali. Ovanhu vahapu ova kanifa eemwenyo omolwoiponga ya tya ngaho navahapu otava mono oixuna neenghono shihe li pauyuki.
Ovanhu vamwe ohava pe Kalunga ombedi, tava diladila kutya Omushiti wetu ke na ko nasha novanhu. Vamwe ova fika pexulifodiladilo kutya Kalunga oku wete okumona oixuna kwetu ndele ina hala ashike okuninga po sha shi na sha nako. Ofimbo vamwe tava ti kutya oiponga ya tya ngaho oya nunwa kuKalunga. Osho otashi ulike kutya ovanhu ove na omadiladilo e lili noku lili shi na sha naasho. Ndele mbela openi hatu dulu okuhanga omanyamukulo e shii okulineekelwa notaa mbilipaleke? Moitukulwa tai landula, ohatu ka mona omanyamukulo okudja mEendjovo daKalunga, Ombibeli, komapulo oo kutya oshike hashi etifa okumona oixuna nonokutya otaku ka xulifwa po ngahelipi.