Omolwashike pe na okumona oixuna kuhapu?

OILANDULIKO YEPANGELO LII

Ombibeli oya ti: “Ovahenakalunga ngenge tava pangele, ovanhu tava keme.” — Omayeletumbulo 29:2.

Ope na omahokololo mahapu mondjokonona e na sha novapangeli ookanyamukulwa ovo va li va pangela nonyanya, naasho osha li sha etela ovapangelwa vavo okumona oixuna kuhapu. Ashike osho inashi hala kutya ovapangeli aveshe ookanyamukulwa. Vamwe otashi dulika ve na ko nasha novanhu vakwao, ndele ngeenge tava pangele, luhapu eenghendabala davo ohadi i wa moshipala kwaavo tava kondjele eenghonopangelo nove na omhepo yefiyafanepo. Ile tashi dulika va longife nai eenghonopangelo davo omolwouwa wavo vene, osho hashi yahameke ovanhu vakwao. Henry Kissinger oo a li nale oministeri yoikwapondje mOilongo ya Hangana, okwa ti: “Ondjokonona oyo ehokololo li na sha neenghendabala da ponya nosho yo omalalakano oo inaa wanifwa.”

Natango Ombibeli oya ti: “Ondjila yomunhu ihai kala mepangelo laye mwene, ile mepangelo lomulumenhu, nhumbi ta ende, nhumbi ta yukifa eenghatu daye.” (Jeremia 10:23) Ovanhu inava wanenena kave na ounongo nowino wokuunganeka oinima yavo aishe monghedi tai pondola. Ngeenge omunhu ita dulu okuyukifa eenghatu daye mwene, ongahelipi ta dulu okuyukifa eenghatu doshiwana? Mbela ou wete kutya omolwashike ovapangeli vopanhu itava dulu okuxulifa po okumona oixuna? Nopehe na omalimbililo, luhapu epangelo lii olo hali etifa okumona oixuna!

ENWEFEMO LOMALONGELOKALUNGA OIPUPULU

Jesus okwa ti: “Opo tuu opo aveshe tave mu koneke kutya, nye ovalongwa vange, ngenge mu holafane.” — Johannes 13:35.

Ovawiliki veengeleka adishe ohava udifa kombinga yohole noukumwe. Oushili oyoo kutya omalongelokalunga okwa dopa okuhonga oilyo yao i kale i na ohole yashili oyo tai dulu okuxulifa po okatongo. Ponhele yokukwafela ovanhu va kulike ohole, omalongelokalunga luhapu ohaa xwaxwameke etukauko, okatongo nomashilafano mokati kovanhu. Omuteologi wedina Hans Küng okwa shanga pexulilo lembo laye ledina Christianity and the World Religions (Oukwakriste nosho yo omalongelokalunga omounyuni) a ti: “Omashilafano manene oo haa kala pokati kovanapolotika ohaa xwaxwamekwa komalongelokalunga.”

Ovafita vomalongelokalunga mahapu ohave lipwililikile okuya momilele komesho yohombo, okunyona ohombo nosho yo oushenge woilyo yao. Osho osha etifa etandavelo lomikifi, okulikufa omadimo, okuninga omadimo inashi teelelwa nosho yo okuteka kweehombo nomaukwaneumbo, noshidjemo ouyahame noluhodi linene.

OKUHAWANENENA NOKULIHOLAMWENE KWOVANHU

Ombibeli oya ti: “Keshe umwe ota hongaulwa kokahalu kaye mwene, oko hake mu shili notake mu heke; nokahalu ngenge ka fimbapala, otaka dala oulunde, noulunde eshi owa wanifwa, otau dala efyo.” — Jakob 1:14, 15.

Molwaashi atusheni otwa fyuulula oulunde, ohatu ningi omapuko notu na okulwifa “ouhalu wombelela.” (Ovaefeso 2:3) Oshidjuu okukondjifa omahalo mai unene tuu ngeenge ohatu tale nokupwilikina alushe koinima oyo tai pendula omahalo a tya ngaho. Ngeenge otwe liyandje komahalo mai, ohatu ka mona oidjemo inyikifa oluhodi.

Omushangi woitevo wedina P. D. Mehta okwa ti: “Okumona oixuna kuhapu okwa etifwa komahalo etu mai, kokukufa ombinga momalihafifo nopehe na elipangelo nosho yo kolwisho.” Okupikwa koinima ngaashi, oikunwa yoalkoholi, oingangamifi, okundombola, oluhaelo nosho tuu, okwa nyona po okukalamwenyo kwovanhu vahapu ovo va talwa ko va fimana momidingonoko davo nokwa etela omaukwaneumbo, ookaume nosho yo vamwe okumona oixuna. Mokutala kokuhawanenena kwovanhu, otu na okudimina eendjovo dOmbibeli edi tadi ti: “Otu shi shii oishitwa aishe ohai keme kumwe ndele oi nefeto lokudala fiyo paife.” — Ovaroma 8:22.

EENGHONO DEEMHEPO DOWII

Ombibeli otai holola kutya Satana ‘okalunga kefimbo lounyuni eli,’ ile tu tye kalunga kounyuni ou nonokutya okwa waiminwa kovaengeli ovanaenghono ovanashibofa hava ifanwa eendemoni. — 2 Ovakorinto 4:4; Ehololo 12:9.

Ngaashi Satana, eendemoni nado ode lipyakidila tadi pangele nokupukifa ovanhu. Omuyapostoli Paulus okwa dimina oushili oo eshi a ti: “Ekondjo letu kali fi okukondjifa ombelela nohonde, ndelenee otu nokulwifa oovene novanaenghono, novapangeli vounyuni ou womilaulu, neemhepo dowii [mevalelwa].” — Ovaefeso 6:12.

Nonande eendemoni ohadi hafele okumonifa ovanhu oixuna, olo halo elalakano lado la fimanenena. Oda lalakanena okwaamuna ko ovanhu kuKalunga Omukombadambada. (Epsalme 83:19) Oinima ngaashi okunyanekela neenyofi, oumhulile nosho yo oulodi oimwe yomoinima oyo eendemoni hadi longifa opo di pukife nokupangela ovanhu. Nomolwaasho Jehova te tu londwele opo tu angale oinima ya tya ngaho nota amene aveshe ovo tava kondjifa Satana neendemoni daye. — Jakob 4:7.

OTU LI ‘MOMAFIKU AXUUNINWA’

Ombibeli oya xunganeka pa pita paife omido omayovi avali lwaapo ya ti: “Kala u shi shii, omomafiku axuuninwa otape ke uya omafimbo madjuu.”

Oya popya kutya oshike sha ningifa omafimbo madjuu ya ti: ‘Ovanhu otava kala nokulihola vo vene, ovanalwisho voimaliwa, ovalitangi, novalinenepeki, vehe nohole, vehe nombili, ovalundili, ovahenalidiliko, ovakwanyanya, ovatondi vouwa, ovakengeleledi, ovahayavala, ovafulalali, ohole yavo yokuhola ouhalu mwii i dule ei yokuhola Kalunga.’ Nopehe na omalimbililo, etomheno la fimanenena kutya omolwashike pe na okumona oixuna akushe oko tu wete kunena ololo kutya otu li ‘momafiku axuuninwa.’ — 2 Timoteus 3:1-4.

Oushili oo twa konakona mbela itau ulike monghedi ya yela kutya omolwashike ovanhu tava nyengwa okuxulifa po okumona oixuna, nonande ove na omalinyengotomheno mawa? Ndele mbela openi hatu dulu okukonga ekwafo? Otu na okukonga ekwafo kOmushiti wetu oo a udaneka kutya ota ka ‘hanauna po oilonga yaSatana’ novashikuli vaye. (1 Johannes 3:8) Oshitukulwa tashi landula ko otashi ka kundafana kutya Kalunga ota ka ninga po shike opo a xulife po oyeetifi aishe yokumona oixuna.