Osho Kalunga e ku ningila

Oo omushangwa umwe womwaado di shiivike nawa nohadi tofwa mo luhapu mOmbibeli aishe. Odjo imwe oya ti, kape na vali ovelishe “ya yelifa nawa ngaashi oyo ekwatafano pokati kaKalunga novanhu nosho yo ondjila yexupifo.” Nomolwaasho moilongo imwe, omushangwa oo ile eyelifo lao, luhapu oto hange la tulikwa meenhele omo hamu ningilwa oiningwanima yaaveshe, la natekwa koihauto, komashangelo okekuma nopeenhele di lili naku lili.

Ovanhu aveshe ovo hava longifa ovelishe oyo monghedi ya tya ngaho, ohava kala va tomhwa kutya molwaashi Kalunga oku na ohole, ote ke va xupifa ashike. Ongahelipi shi na sha naave? Mbela ohole yaKalunga otai ti shike kwoove? Oshike osho to diladila Kalunga e ku ningila tashi ulike kutya oku ku hole?

‘KALUNGA OKWA KALA E HOLE OUNYUNI’

Ovanhu vahapu ohava kala va hala okupandula Kalunga molwaashi okwa shita ewangandjo, oushitwe novanhu. Oinamwenyo, oimeno novanhu oya shitwa monghedi ya kitakana noya shitwa nounghulungu tashi ulike kutya ope na omunaendunge a shiya ko oo e i shita. Ovanhu vahapu ohava pandula Kalunga efiku keshe omolwoshali yomwenyo. Ove shii yo kutya opo va dule okutwikila okukala nomwenyo nokuhafela oilonga yavo ove likolelela komafiloshisho aeshe aKalunga ngaashi omhepo, omeva, oikulya nomadingonoko opaushitwe.

Ohatu ningi nawa eshi hatu pandula Kalunga omolwoinima aishe oyo, molwaashi oye Omushiti nOmufilishisho wetu. (Epsalme 104:10-28; 145:15, 16; Oilonga 4:24) Ohatu dulu okukala tu na olupandu omolwohole yaKalunga ngeenge otwa dilonga kombinga ya keshe osho ta ningi opo tu dule okukala nomwenyo. Omuyapostoli Paulus okwa ti: “Ou [Kalunga] ha yandjele ovanhu aveshe omwenyo nomufudo noinima aishe.” — Oilonga 17:25, 28.

Kalunga ohe tu ulikile ohole yaye meenghedi dihapu shihe fi ashike oku tu fila oshisho palutu. Ndele okwe tu shita yo monghedi i dule yoinamwenyo nokwe tu lenga e shi e tu shita tu na omhumbwe yopamhepo nohe tu kwafele tu i wanife po. (Mateus 5:3) Kungaho, ovanhu ovaduliki ove na eteelelo loku ka kala oshitukulwa shoukwaneumbo waKalunga, sha hala kutya ‘ovana’ vaye. — Ovaroma 8:19-21.

Ngaashi Johannes 3:16 a dja noku shi popya, Kalunga okwe tu ulikila ohole yaye eshi a tuma Omona waye, Jesus, kombada yedu opo e tu honge kombinga ya Kalunga, Xe yaye noku tu fila. Ashike nande ongaho, vahapu ova dimina kutya kave udite ko lelalela kutya omolwashike kwa li sha fimana opo Jesus a fye ponhele yovanhu nongahelipi efyo laye li li euliko lohole yaKalunga yoku tu hola. Natu ka taleni nghee Ombibeli ya yelifa etomheno nongushu yefyo laJesus.

‘OKWA YA YANDJA OMONA WAYE EWIFA’

Ovanhu aveshe ohava fi, hava vele nohava kulupa. Ashike osho hasho sha li elalakano laJehova Kalunga lopehovelo. Okwa li a pa ovanhu votete omhito yokukala nomwenyo fiyo alushe moparadisa kombada yedu. Ndele ova li ashike tava ka kala nomwenyo ngeenge tava dulika. Kalunga okwa ti ngeenge ova hoolola okuhadulika, otava ka fya. (Genesis 2:17) Omunhu wotete okwa li a tukululila oshibofa ounamapangelo waKalunga, nokwe lietela efyo nosho yo oludalo laye. Omuyapostoli Paulus okwa ti: “Oulunde wa etwa mounyuni komunhu umwe, nefyo okoulunde, osho nee efyo ole uya movanhu aveshe, shaashi aveshe va nyona.” — Ovaroma 5:12.

Ashike, Kalunga “oku hole ouyuki.” (Epsalme 37:28) Nokuli nonande Kalunga ka li ta dulu okulipwililikila okunyonena owina kwovanhu votete, ita ka efa ovanhu aveshe va kale tava mono oixuna nokufya fiyo alushe omolwokuhadulika kwomunhu umwe. Mepingafano naasho, Kalunga okwa tula moilonga efinamhango lopaveta olo tali ti “omwenyo [nau] yandjelwe omwenyo,” nokwa futila po omwenyo wa wanenena oo wa kanifwa kuAdam nosha pa ovanhu ovaduliki omhito va dule oku ka kala nomwenyo fiyo alushe. (Exodus 21:23) Epulo oli li apa kutya, ongahelipi omwenyo wawanenena oo wa kanifwa kuAdam tau dulu oku ka monika vali? Enyamukulo: Omunhu umwe okwa li e na okuyamba po omwenyo waye, omwenyo u na ongushu i fike pamwe nau waAdam, omwenyo womunhu a wanenena.

Okudja moludalo lAdam kapa li omunhu a wanenena oo a li ta dulu okufutila po omwenyo wa tya ngaho, ashike Jesus okwa li ta dulu. (Epsalme 49:7-10) Jesus okwa li a wanenena, ina fyuulula oulunde, ngaashi ashike Adam a li. Jesus okwa mangulula ovanhu moupika woulunde eshi a yandja omwenyo waye. Mokuninga ngaho, okwa pa oludalo lovadali votete omhito yoku ka hafela omwenyo wa wanenena oo Adam naEva va li ve na. (Ovaroma 3:23, 24; 6:23) Mbela ope na osho twa pumbwa okuninga opo tu mone ouwa mohole inenenene ya tya ngaho?

“KESHE OU TE MU ITAVELE”

Ngeenge otwa tale vali komushangwa waJohannes 3:16, otu wete eendjovo odo tadi ti “keshe ou te mu itavele [Jesus] a ha kane, ndelenee a kale e nomwenyo waalushe.” Osho osha hala kutya opo tu mone oshali yomwenyo waalushe ope na osho tu na okuwanifa po. Opo tu ka mone ‘omwenyo waalushe,’ otu na okwiitavela muJesus nokudulika kuye.

Otashi dulika u lipule kutya ‘ongahelipi okudulika kwa kwatelwa mo? Hamba Jesus ina tya kutya, “keshe ou te mu itavele” ota ka mona ‘omwenyo waalushe?’ Heeno, eitavelo ola pumbiwa, ndele okwiitavela ashike kutya Jesus oko e li inashi wana. Osha fimana okudimbuluka kutya outumbulilo eitavelo oo u li mOmbibeli owa kwatela mo shihapu. Opo tu kale twa hokiwa kuKalunga, inatu pumbwa ashike okukala tu shii kutya Jesus Omuxupifi, ndele otu na okukendabala shili okutula moilonga omahongo aye. Ngeenge kape na oilonga, eitavelo olongaho. Ombibeli oya ti ‘eitavelo li he noilonga, ola fya.’ (Jakob 2:26) Oku shi popya noitya imwe, omwiitaveli oku na okuulika eitavelo muJesus okupitila moilonga, sha hala kutya oku na okukala metwokumwe neitavelo laye.

Paulus okwa ti: ‘Ohole yaKristus tai tu fininike ofye ava twa tokola ngaha: umwe [Jesus] okwa fya omolwaaveshe. Ndele Oye okwa fya ponhele yaaveshe, opo ovo ve nomwenyo ve he likalele vali vo vene, ndelenee Oye tuu ou e va fila nokwe va nyumukila.’ (2 Ovakorinto 5:14, 15) Olupandu lashili li na sha nekuliloyambo laJesus oli na oku tu linyengifa tu ninge omalunduluko monghalamwenyo yetu, tuha kale vali nokuliholamwene ndele tu kalele Jesus, oo e tu fila. Osho osha hala kutya, otu na okupitifa komesho monghalamwenyo yetu okutula moilonga omahongo aJesus. Omalunduluko oo otaa ka nwefa mo eenghedi detu, omahoololo etu nakeshe osho hatu ningi. Ovo va itavela muJesus nohava kala metwokumwe neitavelo lavo otava ka mona ondjabi ya shike?

“A HA KANE, NDELENEE A KALE E NOMWENYO WAALUSHE”

Oshitukulwa shaxuuninwa shaJohannes 3:16 osha popya osho Kalunga a udanekela ovo ve na eitavelo mekuliloyambo nohava kala metwokumwe nomifikamhango dopakalunga. Kalunga okwa ti ovadiinini va tya ngaho, ‘itava ka kana, ndelenee otava ka kala nomwenyo waalushe.’ Ashike, oohandimwe ovo hava mono ouwa mohole yaKalunga ove na omateelelo opavali.

Jesus okwa udanekela ongudu imwe omwenyo waalushe meulu. Okwa li a lombwela ovahongwa vaye ovadiinini kutya ote ke va longekidila onhele opo va dule oku ka pangela pamwe naye meulu. (Johannes 14:2, 3; Ovafilippi 3:20, 21) Ovo tava ka nyumukila omwenyo womeulu “otava ka ninga ovapristeri vaKalunga novaKristus, ndele tava ka pangela pamwe naye ngaashi eehamba omido eyovi limwe.”— Ehololo 20:6.

Omuvalu ashike wa ngabekwa wovashikuli va Jesus tava ka mona oufembanghenda oo. Jesus okwa ti: ‘Ino tila, okangudu ove, osheshi Xo a hala oku mu pa ouhamba.’ (Lukas 12:32) Mbela “okangudu” oko oka li taka ka kala ke fike peni? Ehololo 14:1, 4 ola ti: ‘Ndele nda mona, ndee tala, Odjona [omunyumunwa Jesus Kristus] ya kala ofika komhunda yaSion [meulu] pamwe nomayovi efele nomilongo nhe nanhe ava va shangelwa edina layo nedina laXe moipala yavo. Ovo va kulilwa movanhu, va ninga votete vaKalunga novOdjona.’ Okuyelekanifa nomabiliyona mahapu oo a li ko, oohandimwe ovo 144 000 ove li “okangudu” kanini. Otava ifanwa eehamba, ndele mbela otava ka pangela oolyelye?

Jesus okwa popya yo kombinga yongudu onhivali yovadiinini ovo tava ka mona ouwa oo tau ka etwa kOuhamba womeulu. Ngaashi sha ulikwa muJohannes 10:16, Jesus okwa ti: “Ondi na yo eedi [dimwe, NW] di he fi domoshiunda eshi; nadinya ondi noku di eta mo, ndee tadi udu ondaka yange, ndee tapa ka kala oshiunda shimwe, nomufita umwe. “Eedi” odo odi na eteelelo loku ka mona omwenyo waalushe kombada yedu ngaashi naanaa Adam naEva va li ve li na pehovelo. Otu shi shii ngahelipi kutya eteelelo lavo oloku ka kala kombada yedu fiyo alushe?

Ombibeli oya popya lwoikando shi na sha nanghee eenghalo tadi ka kala moparadisa kombada yedu. Opo u shi mone, oto indilwa opo u leshe mOmbibeli yoye eevelishe tadi landula: Epsalme 37:9-11; 46:9, 10; 72:7, 8, 16; Jesaja 35:5, 6; 65:21-23; Mateus 5:5; Johannes 5:28, 29; Ehololo 21:4. Eevelishe odo oda xunganeka okuxulifwa po kwoita, ondjala, omikifi nefyo. Oda popya shi na sha nefimbo olo ovanhu ovaduliki tava ka hafela okutunga omaumbo avo, tava ka lima omapya avo nokutekula ounona vavo momidingonoko di na ombili.a Mbela eteelelo olo ka li hokwifa kwoove? Otu na omatomheno mawa okwiitavela kutya mafiku omaudaneko oo otaa ka wanifwa.

KALUNGA OKWA NINGA SHIHAPU

Ngeenge owa diladila kwaashishe osho Kalunga e ku ningila pauhandimwe nosho yo ovanhu aveshe, oto ka mona kutya okwa ninga nale shihapu. Okwe tu pa omwenyo, eendunge, oukolele woshiyeleke nakeshe osho twa pumbwa opo tu kale nomwenyo. Kakele kaasho, ngaashi twe lihonga muJohannes 3:16, oshali yaKalunga yekuliloyambo okupitila muJesus, oo e tu fila, otai dulu oku tu etela omanangeko noupuna mahapu.

Okukala nomwenyo waalushe, meenghalo diwa dihe na oumbada womikifi, oita, ondjala, ile efyo, otaku ka eta ehafo linene nomanangeko noupuna aalushe. Opo u ka mone omanangeko noupuna oo oshe likolelela ashike kwoove. Epulo olo u na okulipula ole li kutya, mbela Kalunga ohandi mu ningile shike?