Ovadali—findileni eenghedi diwa mounona veni
1 Eenghedi diwa ihadi uya ashike paushitwe ile di monike mokupapala. Kakele kaasho, okufindila eenghedi diwa mounona otashi kufa efimbo. “Okufindila mo” otashi ti “okunwefa mo kanini nakanini” ile “okuningifa sha shi ye mo eta neta.” Okuhalunduluka okwa fimana kovadali opo “va [tekule ounona vavo] meduliko nomekumaido lOmwene.”—Ef. 6:4.
2 Tameka okudja kouhanana: Eendunge dokulihonga dounona vanini nokuninga oinima ipe odikumwifi. Nonande ovakulunhu luhapu ohava mono shidjuu okulihonga elaka lipe, ounona ovo inava tameka ofikola ohava dulu okulihonga omalaka avali ile atatu oshita. Ino diladila nande kutya okaana koye okanini unene okukulika eenghedi diwa. Ngeenge elongo loshili yOmbibeli ola tameke diva nola twikila, pefimbo eshi okaana taka ka kala ke na eedula dopokati, omadiladilo ako otaa ka kala a yadifwa neshiivo olo tali ka pe ‘eendunge opo ka xupifwe.’—2 Tim. 3:15.
3 Ninga oilonga yomomapya onghedindjikilile: Eenghedi diwa odo di na okufindilwa mo fimbo okaana ke li peedula dokuvyulwa ododo dokuudifa alushe onghundana iwa yOuhamba waKalunga. Ovadali vahapu eshi ohave shi tameke mokuya nounona vavo moukalele weumbo neumbo fimbo ounona ve li ouhanana. Ekufombinga lovadali ihali faula moilonga youndombwedi otali kwafele ounona vavo va kulike olupandu nosho yo ouladi woukalele. Ovadali otava dulu okuulikila ounona nghee ve na okukufa ombinga mokuyandja oundombwedi monghalo keshe yoilonga yomomapya.
4 Okukala ve lishangifa mOfikola yOukalele woPauteokratika nasho otashi kwafele ounona. Otashi va hongo eenghedi diwa dokukonakona nosho yo nghee ve na okulesha neudeko. Otave lihongo okukundafana kombinga yOmbibeli, okuninga omalishuneko nosho yo okuninga omakonakonombibeli. Edeulo la tya ngaha otali dulu oku va nwefa mo va ka ninge ovakokolindjila nokuhanga omaufembanghenda oilonga e likalekelwa. Ovabetel vahapu nosho yo ovatumwa otava dimbuluka nohokwe eedula davo odo va tameka okukala mofikola ei noku di diladila di li ngaashi efiloshisho olo le va kwafela va kulike eenghedi diwa.
5 Atusheni otwa fa elova momake Omuhongi Munene, Jehova. (Jes. 64:8, OB-1986) Apa ngoo pe fike okututa kwelova opo ngoo pe fike oupu wokulima. Apa ngoo pe fike efimbo lokukuta kwalo, opo ngoo pe fike tali ningi likukutu. Hano osho yo shi li ngaho shi na sha novanhu. Ngeenge ve li ounona, ohava kala vapu unene—pokukala kwako kanini ope na oidjemo iwa. Eedula davo dounyasha odi li eedula dokuvyulwa, kutya nee evyulo otali ningwa molwouwa ile molwowii. U li omudali omufilishisho, tameka diva okufindila eenghedi diwa mounona voye moukalele wopaKriste.