Oshimhungu shomapulo

◼ Ovakonakonimbibeli ove na okukonakona omambo avali elipi?

Ombibeli otai hongo olo embo la fimanenena olo tu na okuhovela nalo omakonakonombibeli opeumbo. Nonande otwa manguluka okulongifa oshishangomwa keshe opo tu hovele omakonakonombibeli, pashihopaenenwa, nande okatraktate, otu na okuninga eenghendabala tu taulukile diva membo Ombibeli otai hongo. Okuhovela omakonakonombibeli nembo Ombibeli otai hongo okwa etifa oidjemo itunhula neenghono.

Ngeenge omwa mane ko embo Ombibeli otai hongo, ndele omukonakonimbibeli ota ningi exumokomesho, omu na okukonakona naye embo etivali, Longela Kalunga. (Kol. 2:7) Embo olo ola yelifa pepandja eti-2 kutya ola nyanyangidwa nelalakano lashike, la ti: “Ombibeli otai kumaida aveshe ovo ve hole Kalunga va ‘koneke oule woposhi noule wopombada’ womaushili aye e na ondilo. (Ovaefeso 3:18) Opo osho shi ningwe, okwa longekidwa embo eli. Otwe lineekela kutya otali ke mu kwafela mu kule pamhepo nopo mu kale mwa longekidwa nawa okweenda mondjila ya finana oyo tai twala komwenyo waalushe mounyuni mupe wouyuki waKalunga.”

Nonande omukonakonimbibeli oku ninginifwe, omu na okutwikila nekonakono fiyo osheshi embo etivali la pwa ko. Kutya nee omukonakonimbibeli oku ninginifwe, omuudifi ota dulu okulopota eevili daye, omalishuneko nosho yo ekonakonombibeli olo. Ngeenge omuudifi oo okwa i pamwe nomuudifi mukwao komukonakonimbibeli oo, omuudifi oo va ya naye ota dulu yo okuvalula eevili odo.