‘Aishe i ninga omolwevangeli’
1. Omuudifi wOuhamba oku na ehalo okuningila shike ovanhu vakwao, nomolwashike?
1 Omuyapostoli Paulus okwa li e udite e na oshinakuwanifwa shokuudifila vamwe onghundana iwa. (1 Kor. 9:16, 19, 23) Sha faafana, ngeenge otu na ko nasha nonakwiiwa yaalushe yovanhu vakwetu, otashi ke tu linyengifa tu va udifile onghundana iwa.
2. Otu na okukala tu na ehalo okuninga omalunduluko elipi ngeenge hatu udifa, nomolwashike?
2 Udifila peenhele opo to dulu okuhanga ovanhu nopefimbo opo tava dulu okumonika: Omuyuli weeshi omunekeka oha tele eendjolo daye pefimbo noponhele opo e wete kutya ota dulu okukwata eeshi dihapu, ndele hapefimbo noponhele opo a hala. Onghee hano, tu li “ovayuli vovanhu,” otashi dulika nafye twa pumbwa okuninga omalunduluko opo tu dule okumona ovanhu moshitukulwa shetu nopo tu dule okuhafela pauyadi oufembanghenda wokwoongela “eeshi doludi keshe.” (Mat. 4:19; 13:47) Itatu dulu mbela oku ka talela po ovanhu komaumbo avo efimbo lokomatango ile tu yandje oundombwedi mepandavanda ongula inene? Paulus okwa li e litulila po elalakano ‘lokuhepaulula nawanawa evangeli,’ nokwa li ha kongo eemhito opo a dule okuhanga elalakano laye. — Oil. 17:17; 20:20, 24, yelekanifa NW.
3, 4. Omeenghedi dilipi hatu dulu okulundulula omatwalemo etu ofimbo tu li moukalele, noidjemo ilipi hatu ka mona?
3 Kala ho lundulula omatwalemo oye she likolelela keemhumbwe dovanhu vomoshitukulwa sheni: Ovayuli veeshi luhapu ohava lundulula eenghedi davo dokuyula eeshi opo va dule okukwata eeshi doludi lonhumba. Ongahelipi hatu dulu okuudifa onghundana iwa yOuhamba monghedi oyo tai hokwifa ovanhu moshitukulwa shetu? Otu na okulongifa nelungi oshikundafanwa shonhumba osho sha kuma ovanhu vahapu moshitukulwa shetu ndele hatu pwilikine nawa eshi ovanhu tava popi omadiladilo avo shi na sha noshikundafanwa osho. (Jak. 1:19) Ohatu dulu okupula ovanhu omapulo oo tae va ningifa va popye omataleko avo shi na sha noshikundafanwa osho. (Omayel. 20:5) Mokuninga ngaho, ohatu ka dula okulundulula omatwalemo etu e na sha nonghundana iwa opo tu dule okuhanga omitima dovanhu. Paulus okwa li a “ninga omukwao waaveshe muaishe.” (1 Kor. 9:22) Osha fimanenena okukala hatu tifuka opo tu dule okuhanga omitima dovanhu.
4 Kashi hafifa tuu okuudifila ovanhu “ondaka iwa”! (Jes. 52:7) Natu kaleni hatu ‘ningi aishe omolwevangeli’ opo tu dule okuudifila ovanhu vahapu ngaashi tashi dulika. — 1 Kor. 9:23.