Ou na ngoo ehalo okuninga omalunduluko?
1. Omolwomalunduluko oo taa ningwa mounyuni, otwa pumbwa okuninga omalunduluko elipi?
1 Ombibeli oya popya mo 1 Ovakorinto 7:31, kutya olupe lounyuni ou otali [lunduluka, NW]. Omolwomalunduluko oo taa ningwa mounyuni efimbo nefimbo, nafye otwa pumbwa okulundulula eenghedi detu dokuudifa, elandulafano letu nosho yo omatwalemo etu. Mbela ou na ngoo ehalo okuninga omalunduluko?
2. Omolwashike tu na okuninga omalunduluko opo tu endele pamwe nehangano?
2 Eenghedi doye dokuudifa: Eongalo lopaKriste ohali ningi alushe omalunduluko. Eshi Jesus a li a tuma ovahongwa vaye oshikando shotete, okwa li e va lombwela opo vaha ende noikulya ile noimaliwa meendjato davo. (Mat. 10:9, 10) Ndele lwanima okwa li a lundulula omalombwelo oo omolwoutondwe oo wa li tau ka hanga ovahongwa vaye monakwiiwa nosho yo okutandavela kwoilonga yokuudifa moitukulwa ikwao. (Luk. 22:36) Oule womido efele da pita, ehangano laJehova ola li la longifa eenghedi dokuudifa di lili noku lili she likolelela keemhumbwe dopefimbo opo, pashihopaenenwa ola li la longifa oukalata vokuyandja oundombwedi, oihauto i na omambako nosho yo okupopya meeradio. Molwaashi kunena ovanhu moitukulwa ihapu ihava kala lela momaumbo, ponhele yokuudifa eumbo neumbo, otwa ladipikwa tu udifile keshe opo hatu hange ovanhu nokuyandja oundombwedi wohangelela. Otwa ladipikwa yo tu kale hatu udifa eumbo neumbo efimbo lokomatango ngeenge ovanhu ohava kala koilonga momukokomoko wefiku. Mbela oto endele ngoo pamwe netemba laJehova eshi tali ningi omalunduluko? — Hes. 1:20, 21.
3. Ongahelipi okuninga omalunduluko taku dulu oku tu kwafela opo tu pondole moshitukulwa shetu?
3 Etwalemo loye: Ovanhu moshitukulwa sheni otave lipula kombinga yashike? Mbela okombinga youxupilo, oukwaneumbo ile ominyonena? Otashi ka kala shiwa ngeenge otwa kala tu shii omaupyakadi oo e li ko kunena neenghalo odo tadi dana onghandangala moshitukulwa shetu opo tu dule okulongekida omatwalemo taa wapalele. (1 Kor. 9:20-23) Ngeenge owa mono kutya omuneumbo ote lipula nashike, otashi ka kala shiwa okulundulula etwalemo loye nokuyandja elitulemo kwaasho omuneumbo te lipula nasho ponhele yokutwikila naasho we uya we lilongekida.
4. Omolwashike tu na okuninga omalunduluko meendelelo?
4 Mafiku omalunduluko ounyuni ou otaa ka xula po, noudjuu munene otau ka hovela. Ombibeli oya ti: “Efimbo olo la xupa ko olixupi.” (1 Kor. 7:29, NW) Inashi fimana tuu okukala hatu ningi omalunduluko nopehe na okwoongaonga opo tu wanife po shihapu moule wefimbo la ngabekwa olo la xupa ko!