Osho u na okuninga opo u dule oku ka kala mounyuni mupe

Moitukulwa ya tetekela, otwa mona kutya Kalunga ota ka xulifa po mafiku ounyuni ou woukolokoshi nomaupyakadi ao aeshe. Otu na oushili kutya osho otashi ka ningwa shili. Omolwashike mbela? Omolwaashi Eendjovo daKalunga, Ombiibeli, oda udaneka da ti:

“Ounyuni otau xulu po.” — 1 JOHANNES 2:17.

Otu na oushili kutya ope na ovanhu ovo tava ka xupa molwaashi ovelishe yOmbiibeli oyo ya tumbulwa metetekelo oya udaneka tai ti:

“Ou ta longo ehalo laKalunga ota kala fiyo alushe.”

Onghee hano, ngeenge otwa hala oku ka xupa, otu na okukala hatu longo ehalo laKalunga. Opo tu mone kutya ehalo laKalunga olilipi, otwa pumbwa tete oku mu shiiva.

OPO U KA XUPE PEXULILO, OU NA “OKUSHIIVA” KALUNGA

Efano: 1. Omupangi e li omutumba pofulula yoshipangelo, a loloka nokwa wililwa po. 2. Ta fuda po monhele yokulila nokwa didilika omunailonga mukwao a hafa ta lesha oshifo. 3. Omunailonga mukwao te mu leshele ovelishe yOmbiibeli, noku mu pa okakalata kokuya ko jw.org.

Jesus okwa ti kutya: “Opo ovanhu va ka mone omwenyo waalushe, ove na okushiiva kutya oove auke Kalunga kashili.” (Johannes 17:3) Opo tu xupe pexulilo lounyuni noku ka kala fiyo alushe, otwa pumbwa “okushiiva” Kalunga. Osho inashi hala kutya okukala ashike twa itavela muKalunga ngahenya, ile okushiiva ashike oinima inini i na sha naye. Ndele otwa pumbwa okupanga oukaume naye. Ngeenge otwa hala oukaume wetu naumwe u kale wa kola, otwa pumbwa okukala hatu kala nakaume a tya ngaho efimbo lihapu. Osho osha faafana nokukala noukaume naKalunga. Natu ka tale keeshili dimwe da fimanenena odo hatu lihongo okudja mOmbiibeli, notadi dulu oku tu kwafela tu pange oukaume naKalunga noku u kaleka po

Oshili oyo hatu lihongo okudja mOmbiibeli

Otwe lihonga kutya Kalunga okwa hala tu ka kale mOparadisa.

Eshi a shita ovanhu votete, Adam naEva, okwa li e va tula monhele iwa, oshikunino shaEden. Ova li va wanenena, na Kalunga okwa li e va pa oinima aishe oyo va li va pumbwa opo va dule okuhafela onghalamwenyo. Ova li tava dulu okukala nomwenyo fiyo alushe. Ngeno ova kalele ovadiinini kuKalunga, ngeno inava fya. Ndele ponhele yaasho, ova hoolola okuhadulika koshipango shaKalunga shi li paunafangwa osho a li e va pa.

Otwe lihonga kutya omolwashike hatu mono oixuna kunena.

Eshi omunhu wotete, Adam, a li ina dulika kuKalunga, okwe likanifila omhito yokukala nomwenyo fiyo alushe, nokwe i kanifila yo ovanhu aveshe. Ombiibeli oya ti: “Oulunde owe uya mounyuni okupitila momunhu umwe, nefyo ole uya omolwoulunde, onghee ovanhu aveshe ohava fi.” (Ovaroma 5:12) Ngaashi ashike omunhu ta dulu okufyuulula omukifi kovadali vaye, oludalo laAdam alishe ola fyuulula okuhawanenena kuye. Onghee, ohatu kulupa nohatu fi.

Otwe lihonga osho Kalunga a ninga po nale opo e tu kwafele.

Ombiibeli oya ti: “Kalunga oku hole ounyuni neenghono, okwa yandja Omona waye ewifa, opo keshe ou te mu itavele aha hanaunwe po ndele a ka mone omwenyo waalushe.” (Johannes 3:16) Kalunga okwa li a tuma Jesus kombada yedu opo e uye a yandje omwenyo waye omolwetu. Omulumenhu umwe wokoIndia womido 86 wedina Prabhakar, okwa popya shi na sha neuliko lohole ya tya ngaho, a ti: “Otashi ulike kutya Jehovaa oku hole nge neenghono. Omolwohole yaye, ondi na eteelelo loku ka mona omwenyo waalushe.”

Otwe lihonga nghee hatu dulu okuulika olupandu li na sha naasho Kalunga e tu ningila.

Ombiibeli oya ti kutya ohatu dulu okuulika olupandu li na sha naasho Kalunga e tu ningila ‘mokudiinina oipango yaye.’ (1 Johannes 2:3) Jehova Kalunga okwe tu ulikila pahole osho tu na okuninga opo tu dule okuhafela onghalamwenyo paife. (Jesaja 48:17, 18) Kalunga ina hala tu mone oixuna. Okwa udaneka kutya, ngeenge otwa dulika koipango yaye, itatu ka hafela ashike onghalamwenyo paife, ndele ohatu kala yo tu na omhito yoku ka kala nomwenyo fiyo alushe.

KALA HO LESHA EENDJVO DAKALUNGA, OMBIIBELI, KESHE EFIKU

Omupangi ta tale keulu konima eshi a lesha Ombiibeli pefimbo lomusha, e li pondje. — Oto dulu okuxupa pexulilo lounyuni mokwiilikana kuKalunga e ku kwafele nokukala to longo ehalo laye

Ohatu li pandjikilile opo tu kale nomwenyo. Ashike Jesus okwa ti: “‘Omunhu ita kala nomwenyo komungome auke, ndele okondjovo keshe tai di mokanya kaJehova.’” — Mateus 4:4.

Kunena, otu na eendjovo daJehova, Ombiibeli. Ngeenge owa konakona embo olo liyapuki, oto ke lihonga kombinga yaasho Kalunga a ninga monakudiwa, yaasho ta ningi paife nosho yo osho ta ka ninga monakwiiwa.

ILIKANA KUKALUNGA E KU KWAFELE

Ou na okuninga po shike ngeenge owa hala okudulika kewiliko laKalunga, ndele kashipu kwoove okweefa po okuninga oinima oyo ta ti kutya oya puka? Monghalo ya tya ngaho, okukala u shii nawa Kalunga otashi ke ku kwafela.

Natu ka tale koshimoniwa shomukainhu wedina Sakura, oo a li e na onghalamwenyo inai koshoka. Eshi a hovela okukonakona Ombiibeli, okwe lihonga kombinga yoshipango shaKalunga osho tashi ti “indeni onhapo oluhaelo.” (1 Ovakorinto 6:18) Sakura okwa li a ilikana kuKalunga e mu pe eenghono nokwa li a dula okweefa po onghedindjikilile oyo inai koshoka. Ashike natango oha kondjifa omayeleko. Okwa ti: “Ngeenge oinima inai koshoka tai uya momadiladilo ange, ohandi lombwele Jehova oshili meilikano, molwaashi ondi shii kutya itandi dulu okukondjifa onghalo ya tya ngaho kwaame mwene. Eilikano ola ehenifa nge popepi elela naJehova.” Ngaashi Sakura, ovanhu omamiliyona otave lihongo kombinga yaKalunga. Ohe va pe eenghono odo va pumbwa opo va dule okuninga omalunduluko monghalamwenyo yavo, nova kale nonghedi yokukalamwenyo oyo a hokwa. — Ovafilippi 4:13.

Ngeenge owa shiiva nawa Kalunga, naye ote ke ku ‘shiiva’ nawa u li kaume kaye kopofingo. (Ovagalati 4:9; Epsalme 25:14) Opo nee oto ka dula okuxupa nokuya mounyuni mupe waKalunga. Ndele mbela ounyuni mupe oo otau ka kala wa tya ngahelipi? Oshitukulwa tashi landula otashi ka yandja enyamukulo.

a Jehova edina laKalunga ngaashi tali hangwa mOmbiibeli