Jehova okwe tu kwafela tu tambule ko omalunduluko notu kale twa hafa keshe apa tu li

Omumwatate nomumwameme Kassholms ova li va ya kofikola yaGilead mo 1979. Oule womido dihapu, ova li va tumwa va ka longele koIran, Mauritius, Myanmar, Tanzania, Uganda nosho yo Zaire. Jack Redford, oo a li omuhongi kofikola yaGilead, okwa li a yandja omayele oo a li e va kwafela peemhito dihapu, efimbo keshe va li tava pewa oshinakuwanifwa shipe. Natu va pitike ve shi yelife.

Mats, alikana tu lombweleni nghee mwa mona oshili.

Mats: Tate okwa li ha di moPoland pefimbo lOita Itivali yOunyuni, nokwa li a mona oihelele ihapu oyo ya li hai ningwa mongeleka yaKatolika. Natango, tate okwa kala ha popi luhapu kutya, “Oku na elongelokalunga lashili!” Mokweendela ko kwefimbo, onda li nda dula okumona kutya tate okwa popya oshili. Onda li nda landa omambo mahapu oo a longifwa nale. Limwe lomulo ola li litwimeulu, ledina Eshiivo olo tali twala komwenyo waalushe. Oshipalanyole osho osha li sha kuma nge neenghono, nonda li nda lesha embo alishe moufiku oo nde li landa. Ongula eshi kwasha, onda li nda mona kutya onda mona oshili!

Okudja muAprili 1972, onda kala handi lesha oishangomwa ihapu yEendombwedi daJehova, nonda mona omanyamukulo omapulo ange mOmbiibeli. Onda li ndi udite nda fa omushingifi oo a popiwa mefaneko laJesus oo, konima eshi a mona okawe kondilo, a landifa po oinima aishe oyo a li e na, opo e ka lande. Onda “landifa po,” oku shi popya pafaneko, elalakano lange lokuya kounivesiti ndi lilongele oundokotola, opo ndi dule okulanda “okawe” koshili oyo nda mona. (Mat. 13:​45, 46) Onda ninginifwa mo 10 Desemba 1972.

Moule ashike wodula imwe, ovadali vange nosho yo omumwamememati ova li va tambula ko oshili nova ninginifwa. Onda li nda hovela oilonga yefimbo liyadi muJuli 1973. Meongalo letu omwa li mu na omumwameme muwa, omukokolindjila omuladi, wedina Ann-Catrin. Otwa hovela okweendelafana, notwa hombola mo 1975. Otwa kala oule womido nhee modoolopa iwa yedina Strömsund moSweden, omo mwa li mu na ovanhu vahapu va hala okulihonga Ombiibeli.

Ann-Catrin: Tate okwe lihonga oshili eshi a li kounivesiti moStockholm. Pefimbo opo, onda li ashike ndi na omido nhatu, ashike tate okwa li ha i naame kokwoongala nomoukalele. Meme ka li e shi hafela, nokwa li a hala okuulika kutya Eendombwedi oda puka. Ashike ka li a pondola, nomokweendela ko kwefimbo okwa li a ninginifwa. Onda ninginifwa ndi na omido 13, nonda hovela okukokola ondjila eshi nda li ndi na omido 16. Lwanima eshi nda longela moUmeå, oko kwa li ku na omhumbwe inene yovaudifi vOuhamba, onda ka ninga omukokolindjila e likalekelwa.

Konima eshi ame naMats twa hombola otwa li twa hafa unene eshi twa dula okukwafela ovanhu vahapu ve lihonge oshili. Umwe womuvo okwa li Maivor, okakadona okanyasha oko ka li ka efa po okudana omaudano noka kala haka kokola ondjila pamwe nokamwainakadona kange. Ova li va ya kofikola yaGilead mo 1984 notava longo ve li ovatumwa moEcuador.

Omwa dula ngahelipi okushikula omayele e na sha nokutambula ko oinakuwanifwa keshe apa mu li moilonga yeni youtumwa?

Mats: Otwa li luhapu hatu pewa oinakuwanifwa ipe. Oshinima shimwe osho she tu kwafela, opo tu dule okutambula ko omalunduluko oo, okuhopaenena oshihopaenenwa shaJesus, unene tuu elininipiko laye. (Kol. 2:​6, 7) Pashihopaenenwa, ponhele yokukala twa hala ovamwatate vomoshitukulwa va ninge oinima monghedi omo hatu i ningi, otwa li twa kendabala okulihonga kutya omolwashike hava ningi oinima monghedi yonhumba. Otwa li twa hala okuuda ko onghedi yavo yokudiladila nosho yo eputuko lavo. Eshi twa hopaenena Jesus, osha li shipu kufye okutambula ko omalunduluko nokukala twa hafa keshe apa tu li, twa li tu udite twa fa “omuti wa twikwa pomatondokelo omeva.” — Eps. 1:​2, 3.

Ann-Catrin: Omuti ngeenge wa twikululwa, ohau kala wa pumbwa omundjene wetango, opo u dule okukula nawa. Jehova okwa kala alushe e li onga “etango” kufye. (Eps. 84:11) Okwe tu pa oumwainafana wopahole wovamwatate novamwameme. Pashihopaenenwa, meongalo letu linini moTehran, Iran, otwa li twa yakulwa mo nawa, ngaashi ashike sha li hashi ningwa kuvamwe ovo va popiwa mOmbiibeli. Otwa li twa hala okukala moIran, ashike muJuli 1980, Eendombwedi daJehova oda li da shilikwa pambelewa moshilongo osho, notwa li twa pewa elombwelo tu shi fiye po moule weevili 48. Otwa li twa tuminwa koZaire (osho paife sha shiivika nawa Congo) muAfrica.

Eshi nda uda tete kutya otwa tuminwa kuAfrica, onda lila. Omahokololo oo nda uda kombinga yomayoka nosho yo omikifi di li moAfrica okwa li a tilifa nge. Ashike ovalihomboli vamwe ovo va li ookaume ketu nova longela ko oule wefimbo, ove tu lombwela va ti: “Inamu enda ko nale! Kendabaleni ashike okuya ko, otamu ka kala mu hole ko.” Otwa mona kutya ova popya oshili! Ovamwatate novamwameme ovanahole. Konima eshi twa kala muZaire oule womido hamano otwa li tu na okuya, molwaashi oilonga oya li ya shilikwa. Onda li nde liyola, molwaashi paife onda li handi ilikana kuJehova handi ti: “Alikana Jehova tu pitika tu kale moAfrica.”

Oimoniwa ilipi mwa hafela momukokomoko womido adishe odo?

Mats: Otwa panga oukaume navamwe ovo navo ve li moiIonga youtumwa, va dja moiwana nomomaputuko a yoolokafana. Natango, moinakuwanifwa yetu imwe, otwa li twa mona mo ehafo linene, olo hali di mokuninga omakonakonombiibeli mahapu, nomafimbo amwe keshe umwe okwa li ha kala e na ovakonakonimbiibeli 20 lwaapo! Kandi na efiku ndi dimbwe eshi ovamwatate novamwameme vokoAfrica ve tu ulikila ohole nove tu yakula. Otwa li hatu nangala motuwa yetu, ngeenge hatu ka talela po omaongalo oo e li koTanzania. Ovamwatate novamwameme ova li hava shilipaleke kutya otu na ashishe osho twa pumbwa, nonande kava li ve na shihapu. (2 Kor. 8:3) Otwa li tu hole unene okuhokololelafana omahokololo. Pexulilo lefiku keshe, ame naAnn-Catrin ohatu kala omutumba hatu hokolola osho sha ningwa mefiku olo, nokupandula Jehova eshi alushe ha kala pamwe nafye.

Ann-Catrin: Ehafo olo nda mona ololo kutya otwa shiivafana novamwatate novamwameme mounyuni aushe. Otwe lihonga omalaka ape, ngaashi Oshifarsi, Oshifrench, Oshiluganda nOshiswahili, notwe lihonga kombinga yomaputuko avo. Otwa li yo twa tuwa omukumo kovahongwa vape, notwa ‘longa navo twa hangana’ moilonga yaJehova. — Sef. 3:9.

Otwa li yo hatu mono oinima ihokwifa meshito laJehova. Alushe ngeenge hatu tambula ko oshinakuwanifwa shipe moilonga yaJehova, otwa li hatu kala tu udite twa fa hatu ende naJehova te tu udikile ondjila oyo tu na okweenda. Okwe tu honga oinima oyo twa li itatu dulu okulihonga kufye vene.

Omashongo elipi mwa li mwa taalela, nomwa ungaunga nao ngahelipi?

Mats: Omafimbo amwe, otwa li hatu kwatwa komikifi dihapu, mwa kwatelwa omalaria. Ann-Catrin okwa li a tandwa omatando ombaadilila. Otwa li yo hatu lipula kombinga yovadali vetu ovo tava kulupa. Ashike otwa pandula oundenge vetu ovo va li have va file oshisho. Ova kala nokufila oshisho ovadali vetu nelididimiko, nehafo nove shi ninga pahole. (1 Tim. 5:4) Nonande otwa li hatu ningi ngaashi hatu dulu, opo tu va kwafele tu li kokule, omafimbo amwe otwa li hatu kala tu udite ondjo notwa hala okuninga shihapu tu va kwafele.

Ann-Catrin: Mo 1983, eshi twa li hatu longele moZaire, onda li nda kwatwa koudu woshimela. Ndokotola okwa li a lombwela Mats a ti: “Mu kufa mo moshilongo eshi nena e li!” Ngomongula, otwa ya nodila oyo ihe fi yovatwaalelwa, molwaashi oyo ashike ya li ya u ka koSweden.

Mats: Otwa li hatu diladila kutya oilonga yetu youtumwa opo tai xulile apa, onghee otwa li twa lila. Ann-Catrin okwa li a tya po xwepo, nonande ndokotola okwa li ta diladila kutya ita ti po xwepo. Konima yomudo, otwa li twa dula okushuna koZaire, ashike pomhito oyo otwa li twa ya meongalo linini lOshiswahili moLubumbashi.

Ann-Catrin: Eshi twa li moLubumbashi, onda li nda ninga eteelelo olo la li la pita po. Nonande katwa li tu na ediladilo lokumona ounona, osha li sha udifa nge nai neenghono, eshi okaana ketu ka pita po. Pefimbo olo la li lidjuu, Jehova okwa li e tu pa oshali oyo twa li inatu teelela. Otwa li twa hovela omakonakonombiibeli mahapu shi dulife nale. Momukokomoko weemwedi donhumba, ovaudifi ova li va hapupala okudja po 35 fiyo 70, naavo hava kala pokwoongala ova li va hapupala okudja po 40 fiyo 220. Otwa kala twe lipyakidila neenghono moukalele, na Jehova okwa li a nangeka noupuna eenghendabala detu, osho sha li sha hekeleka nge neenghono. Natango ohatu diladila luhapu kombinga yokaana ketu nokupopya kombinga yako. Otwa teelela nodjuulufi okumona nghee Jehova ta ka kufa po oluhodi filufilu.

Mats: Pomhito imwe, Ann-Catrin okwa li ha kala a loloka neenghono. Nopefimbo opo tuu opo, onda li nda monika okankera mendjadja eli la kula, i li ponghatu onhine, nonda li nda pumbwa etando linene. Ashike paife ondi li po xwepo, na Ann-Catrin ota ningi ngaashi ta dulu.

Otwa li twa didilika kutya, hafye atuke hatu ungaunga nomashongo. Konima yomadipaafano oukwamuhoko mo 1994 moRwanda, otwa li twa ka talela po ookaume ketu vahapu ovo va li meekamba deenhauki. Eshi twa mona eitavelo nelididimiko lavo nosho yo onghedi yavo yokuyakula vamwe, otwa li twa mona kutya Jehova oku na eenghono dokukwafela oshiwana shaye meshongo keshe. — Eps. 55:22.

Ann-Catrin: Otwa li vali twa shakeneka eshongo limwe, eshi twa li peyapulo loshitaimbelewa moUganda mo 2007. Konima yoprograma, otwa li hatu i koNairobi moKenya pamwe novatumwa nOvabetel, tu li 25 lwaapo. Ofimbo inatu hanga eengaba daKenya, komesho yetu okwa li kwa dja eloli olo la li le lidenga omutwe nomutwe nobesa yetu. Omushingi nosho yo ookaume ketu vatano, opo va xulifila poshiponga opo, nolwanima omumwameme umwe okwa ka xulifila koshipangelo. Otwa teelela nodjuulufi oku ka mona ookaume ketu vali! — Job 14:​13-15.

Onda li nda tya po xwepo kouyahame oo wa li wa etifwa koshiponga shohauto. Ashike ame naMats otwa li vamwe vomwaavo va li va kumwa koshiponga osho pamadiladilo. Kombinga yange, onda li handi kwatwa koshisho sha pitilila oufiku, handi penduka ndi na omadidiliko a fa omunhu ta kwatwa koudu womutima. Osho osha li shitilifa neenghono. Ashike okwiilikana twa mana mo kuJehova, okulesha nokudilonga komishangwa dimwe odo tu hole, oshe tu kwafela tu kale twa ngungumana. Otwa li yo twa mona ekwafo keendokotola. Paife katu na vali oisho ihapu, nohatu pula Jehova e tu kwafele tu hekeleke ovo tava kondjo nouyahame wa fa wetu.

Eshi mwa popya nghee mwa li mwa ungaunga noisho yonghalamwenyo, omwa popya kutya Jehova okwa li e mu humbata “ngaashi omai inaa pya.” Omwa hala okutya ngahelipi?

Mats: Outumbulilo oo owa dja kOshiswahili tau ti: “Tumebebwa kama mayai mabichi,” ile “Otwa li twa humbatwa ngaashi omai inaa pya.” Ngaashi ashike omunhu ha humbata noukeka omai inaa pya, opo aha tatuke, Jehova okwe tu yambidida pahole moshinakuwanifwa shetu keshe. Otwa li alushe hatu kala tu na shihapu, shi dulife nokuli pwaasho twa pumbwa. Otwa mona nghee Jehova e tu ulikila ohole nokwe tu yambidida okupitila molukeno olo twa li twa ulikilwa kOlutuwiliki.

Ann-Catrin: Nandi mu ku file ko koshihopaenenwa shi na sha nanghee Jehova a li e tu yambidida. Efiku limwe onda li nda dengelwa ongodi kutya tate ota ehama neenghono moSweden. Mats opo ashike a hangika a veluka koudu womalaria. Katwa li hatu dulu okulanda outekete tu ye keumbo, onghee otwa li twa tokola okulandifa po ohauto yetu. Opo nee otwa li twa dengelwa kovanhu ve dulife pu vavali, vamwe ova li ovalihomboli ovo va li va uda kombinga yonghalo yetu, nova li va hala oku tu landela okatekete kamwe. Otwa li yo twa dengelwa komumwameme omunamido, oo a li a tuvikila oimaliwa, opo a kwafele ovo ve li momhumbwe. Moule ashike wominute dinini, Jehova okwa li e tu yambidida! — Heb. 13:6.

Okutala komido 50 odo mwa kala moilonga yefimbo liyadi, oshike mwe lihonga?

Ann-Catrin: Onde lihonga kutya, eenghono detu ohadi di ‘mokukala twa ngungumana notu na elineekelo.’ Jehova ota ka lwa ponhele yetu, ngeenge otwe lineekela muye. (Jes. 30:15; 2 Omaf. 20:​15, 17) Molwaashi otwa longela Jehova ngaashi hatu dulu moshinakuwanifwa keshe, otwa mona omanangeko noupuna mahapu kuhe na vali.

Mats: Onde lihonga okukala nde lineekela muJehova monghalo keshe, nokumona nghee ha katuka ponhele yange. (Eps. 37:5) Ke na efiku a dopele okuwanifa po osho a undaneka. Natango Jehova ota twikile noku tu kwafela moshinakuwanifwa shetu osho tu na paife mObetel moMyanmar.

Otu na elineekelo kutya ovanyasha vahapu ovo va hala okutamununa mo oukalele wavo, otava ka mona ohole ina oudiinini ngaashi oyo Jehova e tu ulikila. Ohole ya tya ngaho otava ka dula oku i mona, ngeenge ova pitike Jehova e va kwafele va ninge omalunduluko nova hafele oinakuwanifwa yavo keshe apa tava tuminwa.