Etukulwa 26

Jesus ta shuna keumbo kuKapernaum

OVANHU keshe pamwe ova li va lenga Jesus, novanhu vahapu ova li hava di keenhele neenhele tava i kuye. Konima yomafiku onhumba, Jesus okwa li a alukila kuKapernaum a pitila mefuta laGalilea. Diva onghundana kutya Jesus okwa alukila keumbo oya li ye lihanena oshilando ashishe, novanhu vahapu ova li ve uya keumbo oko a li. Ovafarisai novalongi vOmhango ova li va dja keenhele dokokule ngaashi kuJerusalem opo ve uye kuJesus.

Eemhunga dovanhu oda li de uya kuJesus noda li da fitika ondjila, onghee kapa li vali oo ta dulu okuya meumbo omo mwa li Jesus. Opa li tapa ka ningwa oshinima shididilikwedi neenghono. Oshinima osho sha li sha ningwa pomhito oyo osha fimanenena, molwaashi otashi tu kwafele tu kale tu shii kutya Jesus oku na eenghono okuxulifa po oinima aishe oyo tai etele ovanhu okumona oixuna nosho yo okuvelula aveshe ovo a hala.

Fimbo Jesus a li ta hongo eemhunga dovanhu, peumbo opo opa li pe uya ovalumenhu vane va humbata omulumenhu kolutala a vela ombada. Ovalumenhu ovo ova li va hala Jesus a velule kaume kavo oo, ndele kava li tava dulu okuya meumbo omo mu na Jesus molwaashi omwa li mu yadi ovanhu. Osho kasha li tuu shinyemateka! Ndele nande ongaho, ovalumenhu ovo kava li va sholola. Ova li va londa kombada yeumbo oyo ya li ya lalakana, ndele tava ningi ko ombululu, nova li va pitifila omulumenhu oo a nangala kolutala pombululu oyo fiyo a fika puJesus.

Mbela Jesus okwa li a handuka eshi ovalumenhu ovo va li ve mu piyaaneka? Hasho nandenande! Ponhele yaasho, okwa li a kumwa neenghono omolweitavelo lavo. Jesus okwa li a lombwela omulumenhu oo a li a vela ombada a ti: “Omatimba oye otaa dimwa po.” Mbela Jesus ota dulu ngoo shili okudima po omatimba? Ovanongo vomishangwa nOvafarisai ova li tava diladila kutya Jesus ita dulu okudima po omatimba. Onghee hano, ova li ve lipopila momitima davo va ti: “Ota popi ngahelipi ngaho? Ota sheke Kalunga. Olyelye ta dulu okudima po omatimba, ke fi umwe aeke, Kalunga?”

Eshi Jesus a mona kutya osho va li tava diladila ngaho, okwa li e va pula a ti: “Oshike tamu diladilile eshi momitima deni? Eshi shipu shi dule shikwao oshilipi po, okulombwela oshingudu: Omatimba oye a dimwa po, ile oku mu lombwela: Fikama, kufa po olutala loye u ende?”

Opo nee Jesus okwa li a ninga oshinima shonhumba shididilikwedi osho sha li tashi ka ulikila eemhunga dovanhu odo da li da ongala puye, mwa kwatelwa yo novapataneki vaye ovo, di mone kutya oku na eenghonopangelo dokudima po omatimba ovanhu kombada yedu nosho yo kutya oye omunhu munenenene oo a kala ko nale. Jesus okwa li a pungulukila komulumenhu oo ta vele ndele te mu lombwele ta ti: “Fikama, kufa po olutala loye ove uye keumbo leni.” Diva omulumenhu oo okwa li a fikama, ndele ta i nolutala laye moipafi yovanhu aveshe ovo va li po. Ovanhu ova li va kumwa nova li va hambelela Kalunga ndele tava ti: “Oinima i fike apa inatu i mona nale.”

Mbela owa didilika ngoo kutya Jesus okwa li a popya kutya omatimba oku na ekwatafano nomikifi, nonokutya okudiminwa po omatimba okwa pambafana nokuveluka palutu? Ombibeli oya yelifa kutya omudali wetu wotete, Adam, okwa nyona nonokutya atusheni otwa fyuulula oilanduliko youlunde, efyo nosho yo omikifi. Ndele koshi yepangelo lOuhamba waKalunga, Jesus ota ka dima po omatimba ovanhu aveshe ovo ve hole Kalunga nohave mu longele, nopo nee omikifi adishe itadi ka kala po vali. Osho itashi ka kala tuu shiwa! Markus 2:1-12; Lukas 5:17-26; Mateus 9:1-8; Ovaroma 5:12, 17-19.

▪ Osha li sha enda ngahelipi opo pa ningwe oshiningwanima shikumwifi meumbo omo mwa li Jesus?

▪ Omulumenhu oo kwa li a vela ombada okwa li e uya ngahelipi kuJesus?

▪ Omolwashike atusheni inatu wanenena, nongahelipi Jesus a li a ulika kutya omatimba etu otaa ka dimwa po nohatu ka dula okukala tu na oukolele muwa?