Etukulwa 29

Jesus ta longo oilonga iwa mEshabata

OSHA li omudo 31 O.P., muNisan lwaapo, nopa li ashike pa pita eemwedi dinini okudja eshi Jesus a li a popya nomukainhu Omusamaria oo a li e mu hanga pondungu eshi a li molweendo okudja kuJudea a finda kuGalilea.

Eshi Jesus a li a mana oshikonga shinene shokuudifa muGalilea ashishe, okwa li a ya kuJudea oko a li a udifa moshinagoga. Okuyelekanifa osho Ombibeli ya popya shi na sha noukalele waJesus womuGalilea, Ombibeli inai popya shihapu shi na sha noukalele waJesus womuJudea pomhito oyo nosho yo momukokomoko weemwedi odo a kala muJudea okudja pOpaasa yomo 3O O.P. Osha yela kutya ovanhu muJudea kava li ve linyenga nawa ketumwalaka laJesus ngaashi ovo vomuGalilea.

Diva, Jesus okwa li a ya molweendo a yuka koshilandopangelo shaJudea, Jerusalem, opo a ka dane Opaasa yomo 31 O.P. Popepi naJerusalem opa li pe na oshivelo sheedi opo pa li pe na etale hali ifanwa Betesda, novanaudu vahapu, ovapofi nosho yo oingudu ova li have uya ketale olo, molwaashi ova li va itavela kutya ngeenge omeva oo okwa hovele okulinyenga ndele omunhu ta i mo, ota veluka.

MEshabata limwe, Jesus okwa li a hanga petale olo omulumenhu umwe oo a kala ta vele oule womido 38. Molwaashi Jesus okwa li e shii kutya omulumenhu oo okwa kala ta vele efimbo lile, okwa li e mu pula a ti: ‘Owa hala okuveluka?’

Omulumenhu oo okwa li e mu nyamukula a ti: “Omwene, ame nghi nomunhu ta twala nge metale, omeva ngenge taa nyengaanyengifwa; ndele fimbo handi i ko, umwe ta piti komesho yange.”

Jesus okwa li a lombwela omulumenhu oo a ti: “Fikama, kufa olutala loye u ende.” Diva omulumenhu oo okwa li a veluka, nokwa li a kufa po olutala laye ndele ta i.

Ndele eshi Ovajuda va li va mona omulumenhu oo, ova li va tya kuye: “Oku neshabata, itashi dulika okuhumbata olutala.”

Omulumenhu oo okwa li e va nyamukula ti: “Ou a velula nge, ye okwa lombwela nge: kufa olutala loye u ende.”

Ovajuda ovo ova li ve mu pula va ti: “Omulumenhu ou olyelye, e ku lombwela, kufa olutala loye u ende?” Pefimbo opo, Jesus okwa hangwa a ya nale omolweemhunga dovanhu, ye omulumenhu oo a li a velulwa ka li e shii edina laJesus. Lwanima, omulumenhu oo okwa ka shakena naJesus motembeli, nomulumenhu oo okwa li a shiiva kutya olyelye oo a li e mu velula.

Onghee hano, omulumenhu oo a velulwa okwa li a ya kOvajuda e ke va lombwele kutya omunhu oo e mu velula oJesus. Eshi Ovajuda ovo va li ve shi uda, ova li va ya kuJesus. Mbela omolwashike va li va ya kuJesus? Mbela ova li va hala okuuda kutya Jesus okwa pewa eenghono kulyelye opo a longe oikumwifilonga? Hasho nandenande. Ova li va ya kuye opo ve ke mu lombwele kutya okwa ninga epuko eshi a longa oshilonga shiwa sha tya ngaho mEshabata. Ova li nokuli va hovela oku mu hepeka. Lukas 4:44; Johannes 5:1-16.

▪ Opa li pa pita efimbo li fike peni okudja eshi Jesus a li a talela po Judea oshikando shaxuuninwa?

▪ Omolwashike ovanhu vahapu va li ve hole petale olo hali ifanwa Betesda?

▪ Jesus okwa li a longa oshikumwifilonga shilipi petale olo, nOvajuda ova li ve linyenga ngahelipi?