Etukulwa 97

Ovalongi vomoshikokola shomiviinyu

JESUS okwa ti kutya: “Votete vahapu otava ningi vaxuuninwa novahauxuuninwa vahapu otava ningi votete.” Opo nee okwa li a yelifa eendjovo odo mokuhokolola ehokololo, a ti: “Ouhamba wokeulu wa fa omushamane, a meneka a ka shivile epya laye lomiviinyu ovalongi.”

Jesus okwa li a twikila ko a ti: “Ndele eshi [omushamane] va udafana novalongi odenari imwe efiku limwe, okwe va tuma kepya laye lomiviinyu. Ndele ye okwa pita mo pokafimbo okatitatu, nokwa hanga ko vamwe ve li ofika ashike pomalandelo; nokwa tya kuvo: Nanye yo indeni kepya lange lomiviinyu, ndee handi mu pe osho, she mu yeleka. Ndele ovo va ya ko. Oye kwa pita mo vali potundi onhi-6 nonhi-9 ndee ta ningi ngaashi a ningile. Ndele eshi a pita mo potundi onhimulongo noyotete, okwa hanga po vamwe ve li ofika, ndee ta ti kuvo: Oshike tamu kala ofika apa ashike omutenya aushe? Ovo tava ti kuye: osheshi kaku na ou e tu shiva. Oye ta ti kuvo: nanye yo indeni kepya lange lomiviinyu.”

Omushamane ile mwene woshikokola shomiviinyu oJehova Kalunga, ofimbo oshikokola shimiviinyu osho oshiwana shaIsrael. Ovalongi vomoshikokola shomiviinyu ovo ovanhu ovo va tulwa mehangano lOmhango, Ovajuda ovo va li ko pefimbo lovayapostoli. Ovanailonga ova li va ningwa navo eudafano kutya otava ka futwa ashike ngeenge ova longo oule wefiku li yadi. Ondjabi yavo oya li ondenari imwe mefiku. Molwaashi ‘okafimbo okatitatu’ oko 9:00 wongula, ovo va li va ifanwa ve uye koilonga potundi onhi-3, onhi-6, onhi-9 nosho yo po-11, ova longa ashike eevili 9, 6, 3 nosho yo ovili 1.

Ovanailonga ovo va li hava longo eevili 12 ile efiku li yadi otava faneke Ovawiliki vOvajuda ovo va li ve litula moilonga yopalongelokalunga. Kava li ngaashi ovahongwa vaJesus ovo onghalamwenyo yavo ihapu va li ovanailonga vokuyula eeshi ile va li hava longo momaifano amwe e lili. Pexulilo lo 29 O.P., “omwene” okwa li a tuma Jesus Kristus a ka ongele ovanhu va tya ngaho va ninge ovahongwa vaye. Kungaho, ova li va ninga “vaxuuninwa” ile ovalongi vomoshikokola shomiviinyu vopotundi onhi-11.

Xuuninwa, efiku loilonga lopafaneko ola li la xula po pefyo laJesus, nefimbo lokufuta ovanailonga ola li la fika. Ovanailonga ovo ova li va futwa okudja kwaao a li e uya lwaxuuninwa, oshinima osho inashi monika nale, ngaashi sha yelifwa taku ti: “Ndele onguloshi eshi ye uya, omwene wepya lomiviinyu okwa lombwela elenga laye: Ifana ovalongi ove u va fute ondjabi yavo, hovela [kwaava] vaxuuninwa fiyo kuava votete. Ndele ava kwa li ve uya potundi onhimulongo naimwe eshi ve uya, ova pewa keshe tuu umwe odenari imwe. Hano venya votete eshi ve uya, ovo va li ve shii tava pewa shihapu ve dule venya; ndele keshe tuu womuvo a pewa odenari imwe. Ndele eshi ve i pewa, ova ngongotela omushamane ndee tava ti: [Ava] vaxuuninwa ova longa otundi imwe aike, ndele ove we va yeleka nafye ava twa humbata oudjuu womutenya noupyu. Ndelenee ye okwa nyamukula umwe waava ndee ta ti: Kaume, inandi ku kotokela; ofye naave, hamba, inatu udafana odenari imwe? Kufa po ei yoye, ove u ye. Ndele ame onda hala okupa ou omuxuuninwa ifike [pwaai] yoye. Hamba nda kelelwa okulongifa oinima yange ngaashi ame mwene nda hala. Ile eisho loye olii, shaashi aame omuwa?” Xuuninwa, Jesus okwa li a endulula oshitwa osho a li a popya nale a ti: “Hano osho ovaxuuninwa otava ningi votete, [novotete] vaxuuninwa.”

Okutambula eendenari kakwa li kwa ningwa pefyo laJesus, ndele okwa li kwa ningwa pOpentekoste 33 O.P., eshi Kristus, “elenga,” a li a tilila ovahongwa vaye omhepo iyapuki. Ovahongwa vaJesus ovo ova li va fa “vaxuuninwa” ile ovanailonga vopotundi onhi-11. Eendenari kada li tadi faneke oshali yomhepo iyapuki yo vene. Eendenari oda li di na okulongifwa kovahongwa kombada yedu. Oda li tadi ti okukalamwenyo kwavo, ile omwenyo wavo waalushe. Odo oufembanghenda wokukala kwavo Israel shopamhepo, sha vaekwa shi udife kombinga yOuhamba waKalunga.

Diva, ovanailonga ovo va li va kongwa tete ova li va mona kutya ovahongwa vaJesus ova futwa, nova li ve va mona tava longifa eendenari dopafaneko. Ovanailonga ovo kava li ashike va hala omhepo iyapuki nosho yo omaufembanghenda Ouhamba, ndele ova li yo va ngongota nokupatana mokuhepeka ovahongwa vaKristus, ovanailonga voshikokola shomiviinyu “vaxuuninwa.”

Mbela ewanifo lefaneko laJesus olo ola ningwa ashike mefelemudo lotete? Hasho nandenande, ovawiliki vopamhepo vOukwakriste vopefimbo letu ovo ve na eendodo noinakuwanifwa, ovo va li va kongwa ‘tete’ va kale ovanailonga moshikokola shomiviinyu shaKalunga shopafaneko. Ohava tale ko ovaudifi ovo ve liyapulila Kalunga, ovo hava endafana nEongalo lopaKriste lEendombwedi daJehova, ve li “vaxuuninwa” okutambulilwa moilonga yaKalunga. Ndele paushili, ovanhu ovo va dinika kovawiliki vopamhepo, ova pewa eendenari, sha hala okutya, oufembanghenda wokulonga ve li ovakalelipo ovavaekwa vOuhamba waKalunga womeulu. Mateus 19:30–20:16.

▪ Oshikokola shomiviinyu otashi faneke shike? Mwene woshikokola shomiviinyu, ovanailonga ovo va longa eevili 12 nosho yo ovo va longa ovili imwe otava faneke shike?

▪ Efiku loilonga lopafaneko ola li la xula po naini, nonaini ovanailonga va li va pewa eendjabi davo?

▪ Oshike tashi fanekwa kofuto yeendenari?