Etukulwa 106
Jesus ta nyaneke pomutenya ovawiliki vomalongelokalunga
JESUS okwa li a ya kotembeli. Okwa li ashike a hangwa opo a ngwangwaneke ovawiliki vomalongelokalunga ovo va li tave mu pula kutya oha longo keenghono dalyelye. Fimbo va li natango mengwangwano, Jesus okwa li e va pula a ti: “Otamu ti ngahelipi?” Opo nee okwa li a longifa efaneko opo e va ulikile kutya vo ovanhu va tya ngahelipi lela.
Jesus okwa ti: “Okwa li ku nomunhu e novana ovamati vavali; okwa ya komutete ndee ta ti: Omumwange, inda u ka longe nena mepya lange lomiviinyu. Ndele ye okwa nyamukula: Inandi hala. Ndele komesho okwe lidilulula ndele ta i ko. Okwa ya komukwao ndele okwe mu lombwela yo eendjovo tuu odo. Oye kwa nyamukula: Heeno, omwene. Ndele ina ya ko.” Opo nee Jesus okwa li e va pula a ti: “Elipi po puava vavali a wanifa ehalo laxe?”
Ovapataneki vaye ova li va nyamukula va ti: “Oye winya wotete.”
Opo nee, Jesus okwa li a yelifa a ti: “Oshili handi mu lombwele: ovafendelifi neembwada otave mu tetekele okuya mouhamba waKalunga.” Ovafendelifi neembwada ova li tete inava hala okulongela Kalunga. Ndele ngaashi omona oo wotete, ove ke lidilulula ndele tava longele Kalunga. Mepingafano naasho, ovawiliki vomalongelokalunga, ovo have liningifa kutya otava longele Kalunga, ova fa omona omutivali. Ndele ngaashi Jesus a popya, ‘Johannes [Omuninginifi] okwa li a ya kuvo nondjila youyuki, vo inave mu itavela; ndele ovafutifi neembwada ove mu itavela; ndele nande ove shi mona, nokomesho inave lidilulula ngeno ve mu itavele.’
Jesus okwa li a ulika yo kutya ovawiliki vomalongelokalunga ovo inava nyona ashike molwaashi inava hala okulongela Kalunga, ndele ova li yo ovakolokoshi. Jesus okwa ti: “Okwa li ku nomushamane, a twika epya lomiviinyu, ndele te li umbile ongubu, ndee ta longele mo oshikolelo sheeviinyu, okwa tungila mo oshungo, nokwa nangeka mo ovalongi vepya, ndele okwa ya koilongo yokokule. Ndele eeviinyu eshi da hola, okwa tuma ko ovapiya vaye kovalongi vepya va ka tambule oiimati ei e nokupewa. Ndele ovalongi vepya ova kwata ovapiya vaye, umwe ove mu denga, nomukwao ove mu dipaa, nomutitatu ove mu kupula nomamanya. Ndele okwa tumununa ko ovapiya vamwe ve dule venya votete mouhapu; ndele ovo ve va ninga ngaashi venya votete.”
“Ovapiya” ovo ovo ovaprofeti ovo ‘omushamane,’ Jehova Kalunga, a li a tuma “kovalongi” ‘vepya lomiviinyu.’ Ovalongi ovo ovo ovakalelipo vovakwatelikomesho voshiwana shaIsrael, osho sha popiwa kOmbibeli kutya oshi li ‘oshikokola shomiviinyu’ shaKalunga.
Molwaashi ‘ovalongi’ ova li va ungaunga nai ‘novapiya’ noku va dipaa, Jesus okwa ti: “Hauxuuninwa [mwene woshikokola shomiviinyu] okwe va tumina omona omumati, ta ti: Omona wange tave mu tila. Ndelenee ovalongi vepya eshi va mona omona, ova kundafana ndee tava ti: Ou omufyuululi, tu yeni, tu ke mu dipaeni, fye tu mone efyuululo laye. Ndele ovo ve mu kwata ndele tave mu ekeleshi mo mepya ndee tave mu dipaa.”
Opo nee Jesus okwa li a pula ovawiliki vomalongelokalunga a ti: “Omwene wepya ngenge ta aluka, ota ningi ngahelipi novalongi ava vepya?”
Ovawiliki vomalongelokalunga ova li va nyamukula va ti: “Ovakolokoshi ovo ote va nyonauna po nai nepya lomiviinyu ote li pe ovalongi vamwe, ovo tave mu pe oiimati opefimbo tuu layo.”
Ovawiliki ovo ova li ve litokola vo vene nopehe na oku shi shiiva, molwaashi ova kwatelwa mokati “kovalongi” ‘voshikokola shomiviinyu’ shaJehova, oshiwana shaIsrael. Jehova okwa li a teelela ovalongi ovo va imike oiimati, sha hala okutya, va itavele Omona waye, Messias washili. Molwaashi kava li va imika oiimati oyo, Jesus okwa li e va londwela a ti: “Inamu lesha hamba nande lumwe momishangwa [mEpsalme 118:22, 23]: Emanya olo ovatungi ve li ekelashi, olo la ninga omutwe wokolonela: Eshi osha dja mOmwene, noshikumifi momesho etu. Onghee handi mu lombwele: Ouhamba waKalunga otau mu kufwa ndele tau pewa ovanhu, hava imike oiimati yawo. Ndele keshe tuu ou ta pundukile kemanya olo, oye ta teka, naau ta wilwa kemanya olo, oye ta nyanyaulwa.”
Ovanongo vomishangwa novapristeri ovakulunhu ova li va didilika kutya Jesus ota popi kombinga yavo, nova li va hala oku mu dipaa, e li “omufyuululi” washili. Onghee hano, ova li tava ka kufwa oufembanghenda woku ka pangela mOuhamba waKalunga ve li oshiwana, nopa li tapa ka etwa oshiwana shipe, ‘ovalongi vepya lomiviinyu,’ ovo va li tava ka imika oiimati iwa.
Ovawiliki vomalongelokalunga kava li va kendabala okudipaa Jesus pomhito oyo molwaashi ova li va tila eemhunga dovanhu odo da li da tala ko Jesus e li omuprofeti. Mateus 21:28-46; Markus 12:1-12; Lukas 20:9-19; Jesaja 5:1-7.
▪ Ovana ovo va tumbulwa mefaneko laJesus lotete otava faneke oolyelye?
▪ Olyelye ta fanekwa ‘komushamane,’ ‘koshikokola shomiviinyu,’ “kovalongi vepya,” ‘kovapiya’ nosho yo ‘komufyuululi’ ovo va tumbulwa mefaneko laJesus etivali?
▪ Oshike sha li tashi ka ningilwa ‘ovalongi vepya lomiviinyu,’ noolyelye va li tave ke va pingena po?