Etukulwa 105

Ehovelo lefiku la fimanenena

ESHI Jesus a li a dja muJerusalem Omaandaxa konguloshi, okwa li a shuna kuBetania kefilu lokoushilo wOmhunda yEemono. Okwa li a mana ko omafiku avali axuuninwa oukalele waye muJerusalem. Osha yela kutya natango Jesus okwa li a nangala keumbo lakaume kaye Lasarus. Okwa li a ninga omafiku ane muBetania molwaashi okwa li a fika mo mEtitano okudja kuJeriko.

Ongula inene yEtivali, 11 aNisan, Jesus novahongwa vaye ova li va ya molweendo natango. Efiku olo ola li efiku loukalele waJesus la fimanenena, efiku lomalipyakidilo. Efiku olo olo yo a li e lixula motembeli nola li yo efiku laxuuninwa loukalele waye womoipafi fimbo ina ka pangulwa nokudipawa.

Jesus novahongwa vaye ova li va ya nondjila oyo ya pita pOmhunda yEemono va yuka kuJerusalem. Fimbo va li mondjila okudja kuBetania, Petrus okwa li a mona omukwiyu oo wa li wa fingwa kuJesus ongula yefiku la tetekela. Petrus okwa li a lombwela Jesus a ti: “Rabbi, tala, omukwiyu ou wa finga, owa kukuta.”

Mbela omolwashike Jesus a li a kukutika omukwiyu oo? Okwa li a popya kutya omolwashike eshi a ti: “Oshili handi mu lombwele: ngeno mu neitavelo, nye itamu limbililwa, ngeno otamu dulu hasheshi ashike, omukwiyu eshi wa ningwa, ndele ngeno otamu lombwele omhunda ei [Omhunda yEemono oko va li ofika]: Iitumba po, ove u liundulile mefuta, ngeno otashi ningwa. Nakeshe eshi tamu shi indile meilikano nokwiitavela, otamu shi pewa.”

Onghee hano, eshi Jesus a li a kukutika omukwiyu oo, okwa li ta hongo ovahongwa vaye oshilihongomwa sha fimana kutya ova pumbwa okukala va itavela Kalunga. Okwa ti: “Ashishe eshi tamu [shi indile] mokwiilikana kweni, itaveleni kutya, omwe shi pewa, ndele otamu ke shi pewa.” Kashi fi tuu oshilihongomwa sha fimana kovahongwa, unene tuu eshi va li ve li pokuhangwa komayeleko manene! Ashike opa li natango ekwatafano limwe pokati kokukuta kwomukwiyu nosho yo oukwatya weitavelo.

Oshiwana shaIsrael osha li shi na eholokepo tali pukifa, ngaashi omukwiyu oo. Nonande oshiwana osho osha li sha ninga ehangano naKalunga, notashi dulika sha li tashi monika sha fa tashi dulika komaufomhango, osha li sha ulika kutya kashi na eitavelo, sha hala okutya, ihashi imike oiimati iwa. Molwaashi kasha li shi na eitavelo, osha li nokuli shi li pokweekelashi Omona waKalunga. Onghee hano, eshi Jesus a li a kukutika omukwiyu oo ihau ima, okwa li ta ulike sha yela kutya oshiwana osho ihashi imike oiimati noshihe na eitavelo osho tashi ka ningwa ngaho.

Diva Jesus novahongwa vaye ova li va fika muJerusalem, nova li va ya kotembeli ngaashi va li hava ningi shito, na Jesus okwa li a hovela okuhonga ovanhu. Molwaashi ovapristeri ovakulunhu nosho yo ovakulunhu voshiwana ova li tava dimbuluka natango osho Jesus a li a ningila ovakumaani voimaliwa efiku la tetekela, ova li ve mu pula va ti: “Okeenghono dilipi po ho longo ei? Olyelye e ku pa epangelo eli?”

Jesus okwa li e va nyamukula a ti: ‘Naame yo ohandi mu pula ondjovo imwe; ngeenge tamu i lombwele nge, opo nee naame yo ohandi mu lombwele okepangelo lilipi handi longo ei. [Eninginifo, NW] laJohannes ola dile peni? Omeulu ile omovanhu?’

Ovapristeri novakulunhu ova li va hovela okukundafana kutya otava nyamukula ngahelipi, va ti: “Ngenge hatu ti: omeulu, opo nee Oye ta ti: oshike hano inamu mu itavela? Ndele ngenge hatu ti: omovanhu, opo otu nokutila ovanhu, osheshi aveshe va tala Johannes oye omuprofeti.”

Ovawiliki ovo kava li ve shii kutya nava nyamukule ngahelipi. Onghee hano, ova li va nyamukula Jesus va ti: “Katu shi shii.”

Jesus naye okwa li e va lombwela a ti: “Hano naame yo itandi mu lombwele okepangelo lilipi handi longo ngaha.” Mateus 21:19-27; Markus 11:19-33; Lukas 20:1-8.

▪ Oshike sha li shididilikwedi shi na sha nEtivali, 11 aNisan?

▪ Jesus okwa li a honga oshilihongomwa shilipi eshi a li a kukutika omukwiyu?

▪ Jesus okwa li a nyamukula ngahelipi ovanhu ovo va li tave mu pula kutya oha longo keenghono dalyelye?