Etukulwa 115
Ovayapostoli tava tu eemhata
KONGULOSHI yefiku olo, Jesus okwa li a honga ovayapostoli vaye oshilihongomwa shiwa shi na sha nokukala ovalininipiki eshi a li a kosha eemhadi davo. Konima yaasho okwa li a dika po Edimbuluko li na sha nefyo laye olo la li tali ehene popepi. Nonande Jesus okwa hangika opo a kosho eemhadi dovahongwa vaye, opa li pa ningwa oshinima shikumwifi. Ovayapostoli vaye ova li va hovela okutwa eemhata shi na sha naao a li munene mokati kavo. Otashi dulika va kala hava tu eemhata shi na sha naasho efimbo lile.
Dimbuluka kutya konima eshi Jesus a li a shituluka fimbo a li komhunda, ovayapostoli ova li tava tu eemhata shi na sha naao munene mokati kavo. Shimwe vali, eshi Jakob naJohannes va li va pula va pewe eendodo da tumbala mOuhamba, osha li sha etifa natango okuhaudafana mokati kovayapostoli vaye. Jesus ka li tuu a nyika oluhodi eshi e wete ovahongwa vaye natango tava tu eemhata moufiku waye waxuuninwa! Mbela Jesus okwa li a ninga po shike?
Ponhele yokutangunina ovayapostoli vaye shi na sha neenghedi davo, Jesus okwa li natango a tomhafana navo pahole a ti: “Eehamba doiwana ohadi i pangele, nomalenga ayo haa ifanwa ooxekulu. Ndele nye hangaha. . . . Osheshi olyelye e dule mukwao, ou ta kala omutumba poshililo ile ou ta yakula? Haau ta kala omutumba poshililo?” Opo nee okwa li e va dimbulukifa oshihopaenenwa shaye a ti: “Ndele Ame ondi li mokati keni ngaashi ou ta yakula.”
Nonande ovayapostoli kava li va wanenena, ova kala pamwe naJesus pefimbo lokuyelekwa kwaye. Onghee hano, Jesus okwa ti: “Ame ohandi ningi ehangano nanye, ngaashi tate a ninga ehangano louhamba naame.” Jesus okwa li a ninga ehangano novashikuli vaye ovadiinini li na sha noku ka pangela pamwe naye. Konahiya, ovanhu ashike ve li 144 000 va li tava ka kwatelwa mehangano li na sha nOuhamba.
Nonande ovayapostoli ova li ve na eteelelo olo likumwifi loku ka pangela pamwe naKristus mOuhamba waye, pefimbo opo eitavelo lavo ola li la nghundipala. Jesus okwa ti: “Oufiku ou wonena onye amushe otamu lidimbike nge.” Jesus okwa li a lombwela Petrus kutya okwe mu ilikanena ndele te mu kumaida ta ti: “Ndele ove ngenge wa aluka, pameka oovakweni.”
Jesus okwa ti: “Ovamwange, okafimbo kanini natango ndi li punye. Otamu ka konga nge, ndele ngaashi nde shi lombwelele Ovajuda: Oku Ame handi i, itamu dulu okuya ko, osho handi mu lombwele yo paife. Oshipango shipe handi shi mu pe: mu holafane ngaashi Ame nda kala ndi mu hole, osho nanye yo mu holafane. Opo tuu opo aveshe tave mu koneke kutya, nye ovalongwa vange, ngenge mu holafane.”
Petrus okwa li e mu pula a ti: “Omwene, oto i peni?”
Jesus okwa li e mu nyamukula a ti: “Apa handi i, ito dulu okushikula nge paife, ndelenee komesho oto ka shikula nge.”
Petrus okwa li e mu pula a ti: “Omwene oshike itandi dulu oku ku shikula paife? Omwenyo wange handi ke u yandja omolwoye.”
Jesus okwa li e mu pula a ti: “Omwenyo oto u yandje molwange? Oshili handi ku lombwele: [ekondobolo] fimbo inali kwena, ove we lidimbika nge lutatu.”
Petrus okwa li e shi anya a ti: “Nande ondi fye naave, itandi ku lidimbike nande.” Ofimbo ovahongwa vakwao navo va li tava ti kutya itave ke lidimbika Jesus, Petrus okwa li e litada a ti: “Nande aveshe nave ku lidimbike, haame.”
Jesus okwa li a hovela okupopya shi na sha naashi a li a tuma ovayapostoli vaye va ka udife muGalilea vehe na okakutu keembongo nekutu loikulya ndele te va pula ta ti: “Omwa hepa sha?”
Ova li va nyamukula tava ti: “Ahowe.”
Jesus okwa ti: “Ndele paife eshi ou e nokakutu keembongo ne ka kufe a kale nako nekutu osho yo, naau e he na, ye na lande po elwakani laye, ndele ne lilandele eongamukonda. Osheshi handi mu lombwele: Eshangelo eli oli nokuwanifilwa muame: Ye okwa valulilwa movakolokoshi, osheshi aishe inya ya shangelwa nge otai wanifwa.”
Jesus okwa li ta popi shi na sha nefimbo eshi a li ta ka valelwa pamwe novakolokoshi. Okwa li yo ta ulike kutya ovashikuli vaye konima yokufya kwaye ova li tava ka hepekwa neenghono. Ovahongwa ova li ve mu lombwela va ti: “Omwene, tala, ope nomaongamukonda avali.”
Jesus okwa li a nyamukula a ti: “Osha wana hano.” Eshi ovahongwa va li ve na omaongamukonda oo, osha li sha pa Jesus omhito e va honge va li oshilihongomwa shimwe sha fimanenena ngaashi hatu ke shi mona paife. Mateus 26:31-35; Markus 14:27-31; Lukas 22:24-38, yelekanifa NW; Johannes 13:31-38; Ehololo 14:1-3.
▪ Omolwashike sha li shikumwifi eshi ovayapostoli va li tava tu eemhata?
▪ Jesus okwa li a ungaunga ngahelipi novayapostoli vaye eshi va li tava tu eemhata?
▪ Ehangano olo Jesus a li a ninga novahongwa vaye ola li la ningifa shike tashi shiiva?
▪ Jesus okwa li a pa ovashikuli vaye oshipango shipe shilipi, nomolwashike sha fimana?
▪ Petrus okwa li te linomo ta ti ngahelipi, na Jesus okwa li a tya ngahelipi?
▪ Omolwashike omalombwelo oo Jesus a li a pa ovahongwa vaye e na sha nokuhumbata okakutu keembongo nosho yo ekutu loikulya a li a yooloka ko kwaao a li e va pa pehovelo?