Oshileshwa 11

Omahongo nEenghedi Odo Inadi Pandika kuKalunga

Omahongo neenghedi doludi lilipi da puka? (1)

Ovakriste ove na mbela okwiitavela kutya Kalunga Omukwatatu? (2)

Omolwashike Ovakriste vashili ihava dana Okrismesa, Opaasa ile omafiku omadalo? (3, 4)

Ovafi otava dulu mbela okweetela ovanamwenyo oshiponga? (5) Mbela Jesus okwa fila komushiyakano? (6)

Okuhafifa Kalunga osha fimana ngahelipi? (7)

1. Hamahongo neenghedi adishe dii. Ndelenee Kalunga ite a hokwa ngeenge okwa dja momalongelokalunga oipupulu ile taa kondjifa omahongo Ombibeli.—Mateus 15:6.

2. Oukwatatu: Jehova mbela Omukwatatu—ovanhu vatatu muKalunga umwe? Ahowe! Jehova, Xe, oye ‘aeke Kalunga kashili.’ (Johannes 17:3; Markus 12:29, yelekanifa NW.) Jesus oye Omona Waye omudalwa wotete, noku na okdulika kuKalunga. (1 Ovakorinto 11:3) Xe oku dule Omona. (Johannes 14:28) Omhepo iyapuki kai fi omunhu; oyo eenghono daKalunga tadi longo.—Genesis 1:2; Oilonga 2:18.

3. Okrismesa nOpaasa: Jesus ina dalwa muDesemba 25. Ye okwa dalwa lwomuKotoba 1, efimbo lomudo eshi ovafita hava kaleke omaufita avo moixwa oufiku. (Lukas 2:8-12) Jesus ina lombwela nande Ovakriste va dane edalo laye. Ponhele yaasho, ye okwa lombwela ovahongwa vaye va dimbulukwe efyo laye. (Lukas 22:19, 20) Okrismesa neenghedi dayo oda dja momalongelokalunga oipupulu onale. Omo yo mwa dja eenghedi dOpaasa, ngaashi elongifo lomai noondiba. Ovakriste vonale inava dana Okrismesa ile Opaasa, nOvakriste vashili nena ihave i dana yo.

4. Omafiku Omadalo: Omadano omafiku omadalo avali aeke a popiwa mOmbibeli a danwa kovanhu ovo va li ihava ilikana Jehova. (Genesis 40:20-22; Markus 6:21, 22, 24-27) Ovakriste vonale inava dana omafiku omadalo. Onghedi yokudana omafiku omadalo oya dja komalongelokalunga oipupulu onale. Ovakriste vashili ohava yandje omaano nohava tyapula okukala pamwe pomafimbo amwe momudo.

5. Okutila Oonakufya: Oonakufya ihava dulu okulonga sha ile va ude sha. Fye ihatu dulu oku va kwafela, navo itava dulu oku tu ehameka. (Epsalme 146:4; Omuudifi 9:5, 10) Omwenyo ohau fi; ihau kala nomwenyo konima yefyo. (Hesekiel 18:4) Ndelenee omafimbo amwe ovaengeli ovakolokoshi, hava ifanwa eendemoni, ohave lifefa eemhepo doonakufya. Eenghedi keshe odo di na ko nasha nokutila ile okwiilikana oonakufya oda puka.—Jesaja 8:19.

6. Omushiyakano: Jesus ina fila komushiyakano. Ye okwa fila kopaala ile koshiti. Oshitya shOshigreka sha lundululwa “omushiyakano” mEembibeli dihapu okwa li tashi ti ashike oshitetela shimwe shoshiti. Edidiliko lomushiyakano ola dja komalongelokalunga oipupulu onale. Omushiyakano inau longifwa ile u ilikanwe kOvakriste vonale. Onghee hano, oto diladila mbela kutya oshi li mondjila okulongifa omushiyakano meilikano?—Deuteronomion 7:26; 1 Ovakorinto 10:14.

7. Otashi dulika shi li shidjuu unene okweefa po amwe omomahongo neenghedi edi. Ovakwapata nookaume otashi dulika va kendabale oku ku itavelifa u ha lundulule omahongo oo wa itavela. Ndelenee okuhafifa Kalunga osha fimana unene shi dulife okuhafifa ovanhu.—Omayeletumbulo 29:25; Mateus 10:36, 37.

Kalunga ke fi Omukwatatu

Okrismesa nOpaasa oya dja komalongelokalunga oipupulu onale

Kape na etomheno okwiilikana oonakufya ile oku va tila