Oshileshwa 15

Kwafela Vamwe Va Longe Ehalo laKalunga

Omolwashike u na okulombwela vamwe kombinga yaasho to lihongo? (1)

Oolyelye to dulu okuhokololela onghundana iwa? (2)

Elihumbato loye otali dulu okunwefa mo vamwe ngahelipi? (2)

Onaini to dulu okuudifa pamwe neongalo? (3)

1. Paife ove owe lihonga oinima ihapu iwa mOmbibeli. Eshiivo eli oli na oku ku twala mokwiimika oukwatya wopaKriste. (Ovaefeso 4:22-24) Eshiivo la tya ngaha ola fimana opo u mone omwenyo waalushe. (Johannes 17:3) Ndelenee, vamwe ova pumbwa yo okuuda onghundana iwa opo va dule yo okuxupifwa. Ovakriste aveshe vashili ove na okuyandja oundombwedi kuvamwe. Osho elombwelo laKalunga.—Ovaroma 10:10; 1 Ovakorinto 9:16; 1 Timoteus 4:16.

2. Ove oto dulu okutameka okulombwela ovo ve li popepi naave oinima iwa oyo to lihongo. I lombwela ovakwanedimo loye, ookaume koye, ovanafikola vakweni novanailonga vakweni. Kala omunanghenda nomulididimiki eshi to shi ningi. (2 Timoteus 2:24, 25) Dimbuluka kutya ovanhu luhapu ohava tale kelihumbato lomunhu shi dulife okupwilikina osho ta popi. Onghee hano elihumbato loye liwa otashi dulika li nane vamwe va pwilikine etumwalaka olo to va lombwele.—Mateus 5:16; 1 Petrus 3:1, 2, 16.

3. Konima yefimbo, otashi dulika u kale wa wana okutameka okuudifa pamwe neongalo lopunye lEendombwedi daJehova. Ei oyo onghatu ya fimana mexumokomesho loye. (Mateus 24:14) Ehafo otali ka kala li fike peni ngeenge to dulu okukwafela omunhu umwe a ninge omupiya waJehova nokumona omwenyo waalushe!—1 Ovatessaloniki 2:19, 20.