‘Taleni nghee hamu pwilikine’

OKUPWILIKINA ohaku tu kwafele tu lihonge oinima. Ohaku kwafele yo ovanhu va xupe meenghalo da nyika oshiponga. Eshi Jehova a li pokumangulula mo oshiwana shaye moupika waEgipti, okwa li a pa Moses omalombwelo opo a lombwele ovakulunhu vomoshiwana shaIsrael osho va li ve na okuninga opo oiveli yavo iha dipawe komweengeli wefyo. (Ex. 12:21-23) Ovakulunhu ovo ova li va lombwela omaukwaneumbo Ovaisrael etumwalaka olo. Oshiwana osho osha li shi na okupwilikina nawa molwaashi osha li sha lombwelwa pakanya oinima aishe oyo ya li ya kwatelwa mo. Osha li mbela she linyenga ngahelipi? Ombibeli oya ti: “Novaisrael aveshe ve shi ninga. Ngaashi Omwene a lombwelele Moses naAron, osho va ninga.” (Ex. 12:28, 50, 51) Oshidjemo, Ovaisrael ova li va xupifwa monghedi ikumwifi.

Kunena, Jehova ote tu longekida opo tu ka xupe moudjuu munene oo inau kala ko nande onale. Onghee hano, otwa pumbwa filufilu okupwilikina komalombwelo oo te tu pe. Jehova ohe tu pe omalombwelo oo pokwoongala kweongalo. Mbela oho mono ngoo ouwa pauyadi pokwoongala kwa tya ngaho? Shihapu oshe likolelela kunghee ho pwilikine.

Oho koneke tuu oitwa ya fimana oyo hai divilikwa pokwoongala? Mbela oho ningi ngoo eenghendabala alushe okutula moilonga osho we lihonga pokwoongala ile oku shi lombwela vamwe?

Longekida omutima woye

Opo tu mone ouwa pauyadi mwaasho hatu hongwa pokwoongala, otwa pumbwa okulongekida omitima detu. Oshiningwanima shonhumba osho sha li sha ningwa pefimbo lokupangela kwohamba yaJuda Josafat osha divilika efimano lokulongekida omitima detu. Josafat okwa li ha yambidida nouladi elongelokalunga lashili. Okwa li a ‘hanauna po muJuda oikulundu yokuyambela nomiti domalupwelele,’ nokwa li a lombwela ovakulunhu vomuJuda, Ovalevi nosho yo ovapristeri va longe ovanhu moilando aishe yomuJuda Omhango yaJehova. Ashike ‘oikulundu yokuyambela kaya li ya hanaunwa po’ aishe. (2 Omaf. 17:6-9; 20:33) Oshiwana osho osha li shi na onghedindjikilile yokulongela oikalunga nokulongela Jehova monghedi oyo ina hokwa koikulundu yokuyambela yovapaani, nomolwaasho oinima oyo kaya li ya xula po lela muJuda.

Omolwashike Ovajuda va li inava twikila okudulika kwaasho Josafat a li e va lombwela? Ombibeli oya ti: ‘Ovanhu kava li va ameka natango omitima davo kuKalunga kooxe.’ Ova li va dopa okukatuka metwokumwe naasho va li va lombwelwa. Otashi dulika va li ve wete tashi pula oilonga ihapu okuya kuJerusalem va ka yambe omayambo. Kashi na nee mbudi kutya ova li ve udite ngahelipi, osha yela kutya omitima davo kada li di na eitavelo.

Opo tu henuke okutwalwaatwalwa ndele hatu shuna mounyuni waSatana, otu na okulongekida omitima detu opo di tambule ko omalombwelo oo Jehova he tu pe kunena. Mbela ongahelipi hatu dulu okulongekida omitima detu? Onghedi imwe omo hatu dulu oku shi ninga oyo okwiilikana opo Jehova e tu kwafele tu tambule ko omalombwelo aye nomitima di na olupandu. (Eps. 27:4; 95:2) Osho otashi ke tu kwafela tu pandule eenghendabala odo ovamwatate tava ningi, eshi hava efa va longifwe kuJehova opo va honge oshiwana shaye nonande inava wanenena. Osho otashi ke tu linyengifa yo tu pandule Jehova omolwoinima ipe oyo hatu lihongo nosho yo eshi tu na omhito yokuuda ko moule oinima oyo twe lihonga nale. Molwaashi otwa halelela okulonga ehalo laKalunga, ohatu dulu okwiilikana hatu ti: “Omwene, ulikile nge ondjila yoye . . . [Hanganifa omutima wange ndi tile edina loye, NW].” — Eps. 86:11.

Kala ho yandje elitulemo pokwoongala

Ope na oinima ihapu oyo tai dulu oku tu imba tu pwilikine nelitulemo pokwoongala. Otashi dulika omadiladilo etu a kale taa twalwaatwala molwaashi twa wililwa po koisho. Ile otashi dulika tu piyaanekwe komaweelelo nokomalinyengo ovapwilikini vakwetu ile omaweelelo oo taa dilile pondje. Ouyahame wopalutu nao otau dulu yo oku tu imba tu yandje elitulemo. Ovadali ovo ve na ounona vanini navo ohava imbwa va pwilikine nelitulemo. Ndele mbela oshike tashi dulu oku tu kwafela tu kale hatu yandje elitulemo pokwoongala?

Oko ngoo omesho etu taa tale, oko ngoo hatu ka yukifa elitulemo letu. Onghee hano, opo u pwilikine nelitulemo pokwoongala, kala wa tala komupopi. Landula mOmbibeli yoye ngeenge omupopi ta lesha omushangwa, nonande ou u shii nale. Henuka okukala to talaatala efimbo keshe koima oko ku na omalinyengo ile taku ningwa omaweelelo. Ngeenge owa kala wa yandja elitulemo koinima i lili noku lili, oto ka pitililwa po kwaasho tashi kundafanwa pokwoongala.

Ngeenge pe na ‘oshisho ile oudjuu’ oo tau ku imbi u kale to pwilikine pokwoongala, ilikana kuJehova a ngungumaneke omadiladilo oye nomutima woye, opo u dule okuyandja elitulemo. (Eps. 94:19; Fil. 4:6, 7) Kala ho ilikana lwoikando apa sha pumbiwa. (Mat. 7:7, 8) Okwoongala kwopaKriste oku li efiloshisho la dja kuJehova. Onghee hano, oto dulu okukala nelineekelo kutya Jehova okwa hala u mone ouwa mokwoongala kwa tya ngaho. — 1 Joh. 5:14, 15.

Kala ho pwilikine koipopiwa

Otashi dulika to dimbuluka oitwa ihokwifa oyo wa udile moipopiwa yonhumba. Ndele nande ongaho, okupwilikina okwa kwatela mo shihapu shihe fi ashike okudidilika oitwa oyo ya tongomana. Oshipopiwa osha fa olweendo. Ofimbo u li molweendo, otashi dulika u mone oinima ihokwifa mondjila, ndele osho sha fimanenena oufikilo. Sha faafana, omupopi otashi dulika a kendabale okukwafela ovapwilikini va fike pexulifodiladilo lonhumba ile va katuke eenghatu donhumba.

Pashihopaenenwa, konakona oshipopiwa osho Josua a li a pa oshiwana shaIsrael, osho shi li muJosua 24:1-15. Josua okwa li a lalakanena okukwafela Ovaisrael va kanyatele filufilu kelongelokalunga lashili mokuhenuka okulongela oikalunga yoiwana oyo ya li ye va dingilila. Omolwashike okuninga ngaho kwa li kwa fimanenena? Elongelokalunga loipupulu loishiindalongo oyo ola li tali dulu okunwefa mo Ovaisrael ndele tava nyono po ekwatafano lavo liwa naJehova. Ovaisrael ova li va nyamukula Josua va ti: “Nashi kale kokule nafye tu efe [Jehova], opo tu longele ookalunga vamwe. . . .Ohatu ka longela [Jehova].” Naasho osho naanaa va li va ninga. — Jos. 24:16, 18, 31, yelekanifa NW.

Ngeenge to pwilikine koshipopiwa, kendabala okumona enenediladilo lasho. Tala nghee oitwa oyo omupopi ta yelifa ya pambafana nenenediladilo. Lipula kutya oitwa ilipi wa pumbwa okutula moilonga.

Kala ho pwilikine koitukulwa yomapulo nomanyamukulo

Ekonakono lOshungonangelo, Ekonakonombibeli lEongalo nosho yo oitukulwa imwe oyo hai kala mOkwoongala kwoPailonga ohai kala eenghundafana domapulo nomanyamukulo da kanghamena koishangomwa yopaMbibeli.

Okupwilikina koitukulwa ya tya ngaho okwa fa omunhu to kufa ombinga meenghundafana. Kala ho pwilikine nawa keenghundafana da tya ngaho, ngeenge owa hala okumona ouwa pauyadi. Kendabala yo okumona kutya eenghundafana oda yuka peni. Yandja elitulemo kunghee oo ta kwatele komesho ta divilike enenediladilo nosho yo oitwa oyo ya fimanenena. Nyamukula momutima woye omapulo oo ta pula. Kala to pwilikine eshi vamwe tava yelifa oitwa nosho yo etulomoilonga louyelele oo tau kundafanwa. Okupwilikina komatyekosha avamwe otaku dulu oku ku kwafela u ude ko moule oinima oyo wa kala u shii nale ndele kwa li u i udite ko lelalela. Kufa yo ombinga meenghundafana da tya ngaho opo u tunge vamwe okupitila momatyekosha oye. — Rom. 1:12.

Ngeenge owa kala ho lilongekida komesho yefimbo, otashi ke ku kwafela u kufe ombinga noupu meenghundafana nokushikula nawa eshi vamwe tava ningi omatyekosha avo. Ngeenge eenghalo doye itadi ku pitike u lilongekide nawanawa, ninga eenghendabala u ende mo mouyelele oo tau ka kundafanwa opo ngoo u mone enenediladilo laasho tashi ka kundafanwa pokwoongala. Okuninga ngaho otashi ke ku kwafela u ka mone ouwa muhapu mwaasho tashi ka kundafanwa.

Kala ho pwilikine poyoongalele

Poyoongalele otashi dulika pa kale omapiyaaneko mahapu shi dulife pokwoongala kweongalo. Onghee ohashi kala shi li eshongo okupwilikina nelitulemo. Oshike tashi dulu oku tu kwafela tu kale hatu pwilikine nelitulemo poyoongalele?

Osha fimana okukofa sha wana konguloshi. Efiku keshe, fimbo oshoongalele inashi hovela, dilonga koshipalanyole shoshoongalele. Tala elandulafano loipopiwa oyo tai ka yandjwa opo u litimaumbwilife shi na sha naasho tashi ka kundafanwa. Kala to landula mOmbibeli yoye eshi oipopiwa tai yandjwa. Ovanhu vahapu ova mona kutya okuninga omadidilikoshango e li pauxupi ohashi va kwafele va yandje elitulemo poshoongalele. Didilika oitwa oyo wa hala oku ka tula moilonga monghalamwenyo yoye nosho yo moukalele. Eshi tamu i ile tamu di koshoongalele efiku keshe, kaleni hamu kundafana oitwa oyo mwe lihonga koshoongalele. Osho otashi ke mu kwafela mu findile momadiladilo eni osho mwe lihonga.

Kwafela ounona voye va kale hava pwilikine nelitulemo

Ovadali Ovakriste otava dulu okukwafela ovana vavo nokuli naavo vanini, va ninge ‘ovanaendunge opo va xupifwe’ mokukala hava i navo kokwoongala nosho yo koyoongalele. (2 Tim. 3:15) Molwaashi ounona ove na omaukwatya a yoolokafana nokudula kwavo okuyandja elitulemo okwa yooloka, omwa pumbwa okulongifa eendunge dokuyoolola opo mu va kwafele va kale hava pwilikine nelitulemo. Otashi dulika omaetepo aa taa landula apa e mu kwafele mu li ovadali.

Kaleni hamu unganeke ounona veni keumbo va kale hava kala omutumba va ngungumana pomafimbo onhumba opo va leshe ile va tale omafano moishangomwa yetu yopaKriste. Ngeenge mu li mokwoongala, inamu kala hamu pe ounona oudanaukifo opo va kale tava danauka. Ngaashi sha li muIsrael shonale, nokunena ounona ohava kala pokwoongala “opo va shiive okuuda nokulongwa.” (Deut. 31:12) Apa tashi shiiva, ovadali vamwe ohava pe nokuli nounona ovo vanini oshishangomwa osho tashi konakonwa. Eshi ounona tava ende tava kulu, va kwafeleni va kale have lilongekida oku ka yandja omanyamukulo pokwoongala.

Omishangwa otadi ulike kutya ope na ekwatafano pokati kokupwilikina kuJehova nokudulika kuye. Osho oshi liwetikile meendjovo odo Moses a li a lombwela Ovaisrael, eshi a ti: ‘Onde mu hololela omwenyo nefyo, enangeko noupuna netulomutima. Hoololeni hano omwenyo mokuhola Omwene Kalunga keni nokupwilikina kondaka yaye nokukanyatela kuye.’ (Deut. 30:19, 20) Kunena, ngeenge otwa hala okukala twa hokiwa kuJehova noku ka mona omwenyo waalushe, otu na okukala hatu pwilikine komalombwelo oo te tu pe noku a tula moilonga monghalamwenyo yetu. Onghee hano, inashi fimana tuu okudulika kekumaido laJesus olo tali ti: ‘Taleni nghee hamu pwilikine’! — Luk. 8:18, OB-1986.