Okupwilikina nokuhongwa
1. Omolwashike twa pumbwa okuninga eenghendabala da wedwa po opo tu pwilikine nokuhongwa poshoongalele shoshitukulwa?
1 Oshoongalele shoshitukulwa 2013 otashi ka hovela mafiku. Opa longwa oilonga ihapu yokulongekida oipopiwa oyo tai popi kombinga yeemhumbwe dovanhu kunena mounyuni aushe. Mbela owa ninga ngoo nale elongekido loku ka kala poshoongalele omafiku aeshe atatu? Oyoongalele yakula ohai kala i na omapiyaneko mahapu, otashi dulika twa pumbwa okuninga eenghendabala da wedwa po opo tu yandje elitulemo. Molwaashi omutumba woshoongalele ohau kwata efimbo lile li dule wokwoongala, otwa pumbwa okuyandja elitulemo efimbo lile. Kakele kaasho, olweendo nosho yo oinima imwe vali otashi dulika i tu lolokife. Oshike tashi ke tu kwafela tu kale oupafi opo tu pwilikine nokuhongwa? — Deut. 31:12.
2. Ongahelipi hatu dulu okulongekidila omitima detu oshoongalele shoshitukulwa?
2 Manga oshoongalele shoshitukulwa inashi hovela: Ko-Web site yetu yopambelewa, ko-www.pr418.com, ohaku kala ku na elandulafano loshoongalele shopaiwana (efimbo loyoongalele yomoshitukulwa ola ulikwa pedu), omo mwa kwatelwa oipalanyole yoipopiwa aishe nomushangwa umwe ile mbali denenediladilo loshipopiwa keshe. Ngeenge ohatu dulu okulongifa ointaneta, okutala ouyelele oo otaku ke tu kwafela tu longekidile omitima detu osho tashi ka kundafanwa po. (Esra 7:10) Mbela itamu dulu okukundafana elandulafano loshoongalele pekonakono loukwaneumbo weni, opo oukwaneumbo weni aushe u kale we lilongekidila oshoongalele?
3. Oshike tashi ke tu kwafela tu pwilikine nelitulemo?
3 Pefimbo lomutumba: Oto dulu okulongifa okandjuwo fimbo omutumba inau hovela. Dima ongodi yoye yopeke opo uha piyaanekwe kokudengelwa eengodi ile komatumwalaka ile u yelekwe u tumine vamwe omatumwalaka pefimbo lomutumba. Ngeenge ongodi yoye otai kala ya tema, i tula monghedi omo itai dulu okupiyaaneka vamwe eshi umwe te ke ku dengela. Ngeenge oto longifa oikwakombiyuta pefimbo lomutumba, shi ninga monghedi oyo itai dulu okupiyaaneka vamwe. Henuka okulya ile okunwa pefimbo lomutumba. (Omuud. 3:1) Kala wa tala komupopi nokulandula mOmbibeli yoye ngeenge taku leshwa omushangwa. Ninga omadidilikoshango e li pauxupi.
4. Ongahelipi ovadali tava dulu okukwafela ounona vavo opo vapwilikine nokuhongwa?
4 Otwa hala yo ounona vetu navo vapwilikine nokuhongwa. Omayeletumbulo 29:15 otaa ti: “Omumati e he noutekuduliko ta fifohoni ina.” Onghee hano, osha fimana komaukwaneumbo a kale omutumba pamwe opo ovadali va shilipaleke kutya ounona otava yandje ngoo elitulemo ponhele yokukala ashike tava popi, tava tumu omatumwalaka, ile tava endaenda. Nonande ovanini natango noitava dulu okuuda ko keshe shimwe tashi kundafanwa, otava dulu okudeulwa va kale oupafi nokukala omutumba va ngungumana.
5. Omolwashike sha fimana okweendulula osho sha li sha kundafanwa poshoongalele, nongahelipi hatu dulu oku shi ninga?
5 Konima yomutumba wefiku keshe: Ino nangala kwatoka, ka nangale diva opo u fuwe po nawa. Ngeenge omwa endulula osho mwa uda, otashi ke mu kwafela muhe shi dimbwe diva. Onghee hano, ohatu ka mona ouwa ngeenge otwa longifa ominute donhumba opo tu kundafane elandulafano loshoongalele konguloshi keshe tu li oukwaneumbo. Ngeenge oto i korestoulanda nookaume koye, omolwashike ito i nokambo koye komadidilikoshango nokukundafana oshitwa shimwe ile ivali osho wa hafela unene? Konima yoshoongalele, otamu dulu okulongifa efimbo lonhumba pekonakono lOukwaneumbo weni nokukundafana nghee tamu dulu okutula moilonga omayele oo a kundafanwa po mu li oukwaneumbo. Oto dulu yo okulongifa efimbo oshivike keshe u leshe oshitukulwa shonhumba moshishangomwa osho opo sha piti.
6. Mbela osha wana ashike shimha wa ya koshoongalele? Shi yelifa.
6 Oshivilo itashi ka etela ovanhu ouwa washa ngeenge eendja inadi tukulwa ndele tadi liwa. Osho osha faafana noikulya yopamhepo oyo hatu ka pewa poshoongalele shoshitukulwa. Ohatu ka mona ashike ouwa ngeenge otwa kala pomutumba keshe woshoongalele, hatu pwilikine nawa nokutula moilonga osho twe lihonga.