Owe lilongekidila ngoo oitendele yeendja dopamhepo?

1. Oshivilo ohashi pula omalilongekido a tya ngahelipi?

¹ Oshivilo ohashi pula omalilongekido mahapu. Ovanhu ove na okukonga oikulya noku i teleka nawanawa, opo nee tai tukulilwa ovaenda. Okutukulwa kwoikulya nako oku na okukala kwa unganekwa nawa. Kakele kaasho, ope na okulongekidwa onhele opo tapa ka lilwa. Ovaenda navo ove na okulilongekida, unene tuu ngeenge otava di kokule. Ndele nande okulilongekidila oshivilo ohashi pula oilonga ihapu, okulya pamwe nookaume nosho yo noukwaneumbo oikulya iwa notai tungu oshi na ouwa. Eendombwedi daJehova mounyuni aushe mafiku otadi ka ongala meengudu dinene ile dinini opo di hafele oshivilo shopamhepo osho da teelela nodjuulufi, sha hala okutya, oshoongalele shoshitukulwa shi na oshipalanyole: “Kaleni oupafi!” Opa longwa nale oilonga ihapu opo ku longekidwe oshoongalele osho nopo oinima aishe i kale i li peenhele. Atusheni otwa shivwa koshoongalele osho. Ndele opo tu ka kale po poshoongalele osho nokumona ouwa muhapu, nafye otwa pumbwa okulilongekida pauhandimwe. — Omayel. 21:5.

2. Otu na okuninga po shike opo tu dule oku ka kala poshoongalele omafiku aeshe?

² Nghee to dulu okumona ouwa muhapu poshoongalele: Mbela owa mana ngoo okuninga omalongekido opo u dule oku ka kala omafiku aeshe poshoongalele? Ngeenge osha pumbiwa, popya nomuyandji woilonga woye kutya oto ka kala pomitumba adishe doshoongalele, mwa kwatelwa nefiku lotete. Mbela owa mana nale okuninga omalongekido e na sha nosheendifo nosho yo onhele opo to ka nangala? Ovakulunhuongalo ove na okushilipaleka kutya ovo vehe na oukolele, ovanamido nosho yo vamwe ovo tashi dulika va pumbwa ekwafo, ova kwafelwa. — Jer. 23:4; Gal. 6:10.

3. Omolwashike tuhe na okuya koshoongalele shopaiwana ngeenge inatu shivwa?

³ Moilongo imwe otamu ka kala oyoongalele yopaiwana. Ndele dimbuluka kutya koyoongalele ya tya ngaho okwa shivwa ashike omaongalo okondadalunde nosho yo vamwe ovo tava di koilongo imwe. Eshi kwa ningwa omalongekido a tya ngaho, oshitaimbelewa osha valula nawa kutya ovanhu vangapi ve na okushivwa, sha tala komuvalu woipundi nosho yo weenhele dokunangala meehotela. Ndele oshi na oupu pa kale omuvalu wovanhu wa pitilila ngeenge ovaudifi ova i koshoongalele shopashiwana oko inava shivwa.

4. Omadimbulukifo elipi tae ke tu kwafela tu kale twe lilongekidila okuhovela kwomutumba woshoongalele efiku keshe?

⁴ Lilongekida opo u fike poshoongalele kuyele omafiku aeshe nokukala omutumba fimbo omutumba inau hovela. Lesha yo pauxupi elandulafano loshoongalele fimbo omutumba inau hovela. Osho otashi ke ku kwafela u longekide omutima woye omolwouyelele oo tau ka kundafanwa. (Esra 7:10, NW) Ngeenge omunashipundi womutumba a ningi etwalemo li na sha nomusika oyo hai danwa fimbo omutumba inau hovela, pwilikina komusika oyo nehafo nokulilongekida oku ka imba eimbilo olo tali hovelwa nalo nosho yo okupwilikina keilikano.

5. Ongahelipi omaukwaneumbo etu taa dulu okumona ouwa muhapu poshoongalele?

⁵ Ngeenge oilyo youkwaneumbo oya kala omutumba pamwe poshoongalele, ovadali otava ka dula okushilipaleka ngeenge ounona vavo otava pwilikine ngoo nawa. (Deut. 31:12) Ovapwilikini aveshe otava ladipikwa va kale tava landula mEembibeli davo eshi omupopi ta lesha omishangwa. Ngeenge owa kala to ningi omadidilikoshango e li pauxupi, otashi ke ku kwafela u kale to pwilikine nawa. Omadidilikoshango otae ke ku kwafela konima yefimbo u dimbuluke oitwa ya fimana yoipopiwa. Henuka okupopya inashi pumbiwa pefimbo lomutumba ile okukala to fikavaama. Ngeenge ou na ongodi yopeke, ino efa i ku piyaaneke ile i piyaaneke vamwe pefimbo lomutumba. Omolwashike ito kundafana navamwe osho wa hafela moipopiwa konima yomutumba keshe?

6. Oshoongalele otashi ke tu pa omhito yokuninga shike, nongahelipi hatu dulu okuhafela omhito ya tya ngaho pauyadi?

⁶ Poshoongalele shoshitukulwa, otu na omhito okuhafela eendafano liwa novamwatate novamwameme, oshinima osho ihashi ningwa mounyuni. (Eps. 133:1-3; Mark. 10:29, 30) Omolwashike ito ningi eenghendabala u shiivafane naavo ve li omutumba pomudingonoko woye nokukundafana navo pefimbo lomusha? Onghee hano, oshiwa okweetelela omusha u li paunafangwa nokukala ponhele opo tapa ningilwa oshoongalele opo uha ka lande oikulya keerestoulanda. Ninga eenghendabala opo uha pitililwe po komhito yokutwaafana omukumo ya tya ngaho. — Rom. 1:11, 12.

7. Otu na okuninga omalongekido elipi shi na sha noikutu oyo hatu ka djala koshoongalele?

⁷ Omidjalo detu: Oshihokwifa eshi Jehova a li a lombwela Ovaisrael va hondjele eenyemba keemwooyo doikutu yavo nokutula ongodi imbulau pombada yeenyemba odo. (Num. 15:37-41) Osho osha li edimbulukifo li wetike olo la li tali ulike kutya ove li oshiwana sha hoololwa shi longele Jehova. Kunena, omidjalo detu di shii okufimanekwa nodi li paunafangwa odo hatu djala poyoongalele ohadi tu yoolola ko kounyuni. Okudjala kwetu ohaku yandje oundombwedi wa kola kwaavo tave tu mono, nokuli nongeenge hatu i keerestoulanda konima yoshoongalele. Onghee hano, diladila nawa komesho yefimbo kombinga yoikutu oyo to ka djala.

8. Ongahelipi hatu dulu okuyandja oundombwedi kuvamwe ofimbo tu li moshilando omo tamu ningilwa oshoongalele?

⁸ Natu yandje oundombwedi: Ngeenge otwa ningi eemhangela, ohatu ka dula okuyandja oundombwedi kovanhu ofimbo tu li moshilando omo tamu ka ningilwa oshoongalele. Omumwatate umwe oo a li a ya korestoulanda pamwe nomukulukadi waye konima yoshoongalele okwa li ashike a ulika kokakalata kaye koshoongalele, ndele ta pula omuyakuli womorestoulanda ta ti: “Owa mona nale ovanhu vahapu va djala oukalata ve li ngaha?” Omuyakuli womorestoulanda okwa li a nyamukula kutya okwe va mona, ndele okwa li te lipula kutya oukalata ovo ovashike naanaa. Osho osha li sha twala meenghundafana, nomumwatate oo okwa li a shiva omuyakuli oo koshoongalele.

9. Ongahelipi hatu dulu okuulika kutya otwa pandula Omushivi wetu, Jehova?

⁹ Nonande oipopiwa aishe otai ka yandjwa kovamwatate nonokutya ovamwatate novamwameme otava ka kufa ombinga mokupulwapulwa nosho yo momauliko, Tate yetu womeulu, Jehova, oye e tu longekidila pahole oshivilo shopamhepo osho shokomudo. (Jes. 65:13, 14) Natu ulike olupandu letu kOmushivi wetu, mokukala poshoongalele osho omafiku aeshe nokulya eendja dopamhepo adishe odo e tu longekidila. Mbela owa mana nale okuninga omalongekido opo u ka ninge ngaho?

[Caption on page 6]

Omadimbulukifo e na sha noshoongalele shoshitukulwa

◼ Efimbo: MEtitano, oshoongalele shoshitukulwa otashi ka hovela po 9:00 wongula fiyo opo 4:15 komatango, mOlomakaya otashi ka hovela po 9:00 wongula fiyo opo 4:30 komatango, nomOsoondaxa otashi ka hovela po 9:00 wongula fiyo opo 3:30 komatango. Oshoongalele shopaiwana otashi ka hovela mEtine po 1:20 yomutenya fiyo opo 4:30 komatango, mEtitano otashi ka hovela po 9:00 wongula fiyo opo 4:40 komatango, mOlomakaya otashi ka hovela po 9:00 wongula fiyo opo 4:15 komatango, nomOsoondaxa otashi ka hovela po 9:00 wongula fiyo opo 3:50 komatango. Ngeenge taku ningwa eshiivifo li na sha nomusika oyo hai hovele, atusheni otu na okukala omutumba peenhele detu opo oshoongalele shi hovele monghedi i shii okufimanekwa.

◼ Eenhele dokupaakinga: Poyoongalele aishe yoshitukulwa, ovanhu otava ka paakinga eehauto oshali, notaku ka paakingwa palandulafano. Ovanhu otava ladipikwa va longife oshihauto shimwe apa tashi shiiva molwaashi eenhele dokupaakinga ohadi kala alushe dinini.

◼ Eenhele dokunangala: Ovaudifi ovo va hala okuninga eindilo leenhele dokunangala ove na okuyadeka ofoloma yedina Room Request. Okomitiye yOilonga yEongalo oi na okushilipaleka ngeenge omuudifi okwa wana ngoo okupewa onhele yokukala, tai landula omifindalandu odo di li mofoloma nosho yo odo di li monhumwafo yo 15 Juli 2009, oyo ya li ya shangelwa ovakulunhuongalo aveshe. Ovaudifi ovo tava dulu okukongelwa eenhele ovovo ashike ve na edina liwa meongalo nosho yo ovo ve na ounona ve na elihumbato liwa.

◼ Okuumbulila vamwe oipundi: Oipundi otai dulu ashike okuumbulilwa ovo to ende pamwe navo mohauto ile ovo hamu di navo meumbo limwe.

◼ Omusha: Oto indilwa u etelele omusha woye opo uha fiye po onhele yoshoongalele u ka lande oikulya pefimbo lomusha. Oto dulu okulongifa okandjato kanini kokutalaleka oikulya, oko taka dulu okutulwa koshi yoshipundi. Eendjato dinene domaukwaneumbo dokutalaleka oikulya odi na okutulwa opo to ulikilwa kovayakuli. Oikwatelwa yoikwamakende nosho yo oikunwa yoalkoholi inai pitikilwa mo monhele yoshoongalele.

◼ Omayambidido: Ohatu dulu okuulika olupandu letu omolwomalongekido oshoongalele mokuyandja omayambidido nehalo liwa e na sha noilonga yomounyuni aushe kOlupale lOuhamba ile poshoongalele. Ngeenge owa hala okuyambidida notyeke, shilipaleka nOkomitiye yOshoongalele kutya openi to dulu oku i tuma.

◼ Oiponga nosho yo ekwafo lopaulumomumbwe: Oshikondo shokuyandja ekwafo lopaulumomumbwe ohashi dengelwa eengodi luhapu omolwoinima inai kwata moiti. Ngeenge opa holoka onghalo oyo tai pula omunhu a pewe ouhaku meendelelo poshoongalele, ninga ekwatafano nomuyakuli oo e li popepi naave, oo ta ka shiivifila diva oshikondo shEkwafo loTete opo ovo tava longo moshikondo osho va konakone kutya onghalo oyo oya kwata moiti shi fike peni nokuyandja ekwafo.

◼ Eenghaku: Omudo keshe poshoongalele ohapa holoka oiponga ihapu oyo hai etifwa keenghaku. Oshiwa okulanda eenghaku odo omunhu to wana mo nawa, odo tadi ke ku kwafela uhe limonife oshiponga ngeenge to ende keetalapa nosho yo peenhele di lili noku lili.

◼ Okukwata omawi: Oilongifo yokukwata omawi kai na okutulwa keepulaka dolusheno ponhele yoshoongalele ile komambako, nokai na okulongifwa monghedi oyo tai piyaaneke vamwe.

◼ Outemba vokulonga ounona okweenda nosho yo oipundi oyo hai tonywa: Outemba vokulonga ounona okweenda nosho yo oipundi oyo hai tonywa kai na okweetwa monhele yoshoongalele. Ashike outemba vounona vokukala omutumba va mangelwa mo otava dulu okulongifwa nokukala polwaamba lovadali.

◼ Omaadi okulishasha: Oyoongalele yoshitukulwa ihapu ohai ningilwa meenhele dihe na omhepo ya wana omo hamu longifwa ashike omashina okupepela omhepo. Onghee hano, otashi ka kala shiwa okuhalongifa omaadi okuvava ile okulishasha nosho tuu, oo e na edimba li na eenghono, olo tali dulu okuninga nai ovo ve na oupyakadi wokufuda ile omaupyakadi amwe. — 1 Kor. 10:24.

◼ Ofoloma yokulandula ovanhu ovo ve na ohokwe: Ofoloma yedina Please Follow Up (S-43) otai dulu okulongifwa opo ku yandjwe ouyelele u na sha novanhu ovo va ulika ohokwe eshi va pewa oundombwedi wohangelela pefimbo loshoongalele. Ovaudifi ove na okweetelela ofoloma imwe ile mbali koshoongalele. Eefoloma odo da yadifwa otadi dulu okuyandjwa konduda yomambo ile kuhamushanga weongalo leni ngeenge mwa shuna komaongalo. — Tala okafo Oukalele Wetu wOuhamba kOshiingilisha kaFebruali 2005, epandja 6.

◼ Eerestoulanda: Natu fimanekifeni edina laJehova okupitila melihumbato letu liwa ngeenge twa ya keerestoulanda. Moilongo ihapu, oshi li onghedindjikilile okuyandja olupandu lokamaliwa keepresenda 10 fiyo 15, she likolelela keyakulo.