Okupopya monghedi i li paushitwe

NGEENGE owa popi monghedi yoye yopaushitwe, ovanhu otava ka pwilikina kwoove nohokwe. Mbela oto ke lineekela eendjovo domunhu oo ta popi a djala sha koshipala ndele ku mu wete? Mbela ongahelipi ngeenge okwa djala sha koshipala osho shi na eholokepo liwa li dulife laye mwene? Kashipu okulineekela omunhu oo ta popi naave ndele ku wete oshipala shaye. Onghee hano, ponhele yokuhopaenena onghedi yaumwe yokupopya, popya monghedi yoye yopaushitwe.

Okupopya monghedi i li paushitwe itashi ti kutya okupopya uhe na ko nasha. Ku na okulongifa nai eemhango delaka, okutumbula nai oitya noku na okupopya uhe uditike nawa. Ou na yo okuhenuka okupopya elaka lomepandavanda. Otu na alushe okupopya nokulihumbata monghedi yefimaneko. Omunhu oo ha popi monghedi i li paushitwe iha kala unene ta longifa oitya idjuu noiha kala unene te lipula nokufuula ovanhu nokupopya kwaye.

Okupopya monghedi i li paushitwe ngeenge u li moukalele. Mbela oho kala wa tila ngeenge to uya peumbo lonhumba ile ngeenge owa shakene nomunhu wonhumba peenhele daaveshe, oo u na okuudifila? Vahapu vomufye osho hatu kala tu udite ngaho, nonande vamwe ohatu kala unene twa tila tu dule vamwe. Omunhu oo a tila otashi dulika a kale ta popi ta ngengema ile a kale te linyenganyengifa eenyala ile omutwe waye.

Omuudifi wonhumba ota dulu okukala e na oupyakadi wa tya ngaho omolwomatomheno onhumba. Otashi dulika a kale e na oupyakadi wa tya ngaho, molwaashi te lipula kutya ovanhu otava diladila shike shi na sha naye ile molwaashi ta diladila ngeenge ota ka pondola ngoo mokuyandja oundombwedi. Oshi li paushitwe okukala e udite ngaho, ndele oupyakadi ohau holoka po ngeenge omunhu te lipula unene shi na sha noinima oyo. Mbela oshike tashi ke ku kwafela ngeenge owa kwatwa koumbada fimbo ino ya moukalele? Ou na okulilongekida nawanawa nou na okwiilikana kuJehova wa mana mo. (Oil. 4:29) Diladila konghenda yaJehova inene oyo ye mu linyengifa a udanekele ovanhu oukolele muwa nosho yo omwenyo waalushe mOparadisa. Diladila kombinga yaavo wa hala oku ka kwafela nosho yo shi na sha nomhumbwe yavo yokuuda onghundana iwa.

Dimbuluka yo kutya ovanhu ove na emanguluko lokuninga omatokolo. Onghee hano, otashi dulika va tambule ko ile vaha tambule ko etumwalaka letu. Osho sha li yo ngaho eshi Jesus a li ta udifa muIsrael shonale. Ove shimha ashike to wanifa po oshilonga shoye shokuudifa. (Mat. 24:14) Nonande ovanhu inave ku pa omhito yokupopya, okuya kwoye moukalele otaku yandje oundombwedi. Nokungaho, owa pondola sha molwaashi owa efa Jehova e ku longife u wanife po ehalo laye. Ngeenge owa pewa omhito yokutya sha, mbela oto ka popya monghedi ya tya ngahelipi? Ngeenge owe lihonga okuyandja elitulemo keemhumbwe davamwe, oto ka popya monghedi i li paushitwe notai hokwifa.

Ngeenge to yandje oundombwedi to popi monghedi yopaushitwe, to popi ngaashi ho popi keshe efiku, ovapwilikini voye otava ka kala ve ku mangulukila. Otashi dulika va ka tambule ko noupu omadiladilo opamishangwa oo to ke va pa. Ponhele yokukala oove to popi wa fa to yandje oshipopiwa, ninga navo eenghundafana. Popya navo nohamu nonoukaume. Ulika kutya ou na ko nasha navo, na pwilikina komatyekosha avo. Ndele ou na okuungaunga novanhu ovo uhe shii nale nefimaneko metwokumwe naasho sha tambulwa ko palaka lavo ile paputuko lavo. Ndele shi ninga alushe to limemesha tashi di komutima.

Okupopya monghedi i li paushitwe ngeenge u li komutune. Ngeenge to popi nongudu yovanhu, oshiwa okupopya paushitwe, monghedi yeenghundafana. Ndele owa pumbwa okupopya newi lopombada ngeenge oto popi novanhu vahapu. Ngeenge owa kendabala okukopela momutwe oshipopiwa shoye ile owa shanga kondadalunde oinima aishe oyo to ka popya, otashi dulika to lipula unene shi na sha noitya oyo to ka longifa. Osha fimana omatumbulo oye a kale a unganekwa nawa ngeenge to popi, ndele ngeenge owe lipula unene shi na sha noitya yokondadalunde oyo to ka longifa, oshipopiwa shoye otashi ka kala sha kukuta, noi to ka popya paushitwe. Ou na okudiladila nawa osho wa hala oku ka popya komesho yefimbo, ndele yandja elitulemo koitwa oyo wa hala oku ka yelifa, ndele hakoitya yo vene.

Sha faafana, ngeenge oto ka pulwaapulwa pokwoongala, lilongekida nawanawa, ndele ino ka lesha ile uye wa kopela momutwe omanyamukulo oye. Popya to lundulula ewi loye monghedi i li paushitwe, to popi tashi di komutima, opo omatyekosha oye a kale taa hokwifa.

Ngeenge owa longifa onghedi yokupopya yonhumba sha pitilila, ovapwilikini otashi dulika va kale ve wete ito popi monghedi i li paushitwe. Pashihopaenenwa, ou na okupopya monghedi i uditike nokutumbula nawa oitya, ndele ino shi ninga monghedi ihe li paushitwe, molwaashi ngeenge owe shi ningi, okupopya kwoye otaku ka kala kwa kukuta. Ngeenge owa longifa nawa omadivilikoudi nosho yo omahepaululiudi, oto ka mwenyopaleka oshipopiwa shoye. Ndele ngeenge owe a longifa nai, ovanhu itava ka yandja elitulemo kwaasho to popi. Longifa ewi la yeleka, ndele kendabala uha popye unene pombada. Otashi ka kala shiwa omafimbo amwe okupopya nexwamo, ndele henuka okulongifa oitya idjuu okuudiwa ko opo u limonikife. Okulundulula ewi, okupopya nexwamo nosho yo nomaliudo oi na okulongifwa monghedi oyo itai ningifa ovanhu va yukife elitulemo kwoove ile va kenyanane.

Ovanhu vamwe ove na onghedi yokondadalunde yokupopya, nokuli nonande itava yandje oshipopiwa. Vamwe ohava longifa elaka lashamha, elaka olo hali longifwa mokupopya kwakeshe efiku. Ndele osha fimana okukala hatu popi elaka la didwa nawa keshe efiku nokulihumbata monghedi yefimaneko tu li Ovakriste. Opo nee ngeenge u li komutune, oto ka dula okupopya nokulihumbata noupu monghedi yopaushitwe oyo ya tambulwa ko.

Okulesha newi loye lopaushitwe ngeenge to lesha moipafi. Opo u kale ho lesha moipafi monghedi i li paushitwe owa pumbwa okuninga eenghendabala. Opo u shi pondole, didilika oitwa oyo ya fimanenena moshitukulwa osho to ka lesha, nokukonakona nghee ya enda tai kundafanwa momukokomoko woshitukulwa osho. Kaleka oitwa oyo momadiladilo, molwaashi ngeenge hasho, oto ka kala ashike to lesha oitya, ndele okulesha itaku kala ku na eityo lela. Ngeenge omu na oitya oyo uhe shii, pula vamwe kutya oi na okutumbulwa ngahelipi. Lideula okukala to lesha to lundulula omutono wewi loye noule walo nokulesha oinhoko yomatumbulo monghedi oyo tai holola omadiladilo nawa. Kala to lideula lwoikando fiyo osheshi to dulu okulesha okamukwikolo. Nongonona nawa ouyelele woye, opo eshi to ke u lesha mokule, u kale wa mwenyopala noto lesha nexwamo. Osho otashi ke ku kwafela u kale ho lesha monghedi yopaushitwe.

Luhapu, ngeenge hatu lesha moipafi yavamwe ohatu longifa oishangomwa yetu oyo ya kanghamena kOmbibeli. Kakele kokulesha ngeenge twa pewa oshipopiwa shokulesha mOfikola yOukalele woPauteokratika, ohatu lesha yo omishangwa ngeenge tu li moukalele nosho yo ngeenge hatu yandje oipopiwa meongalo. Ovamwatate ohava pulwa va leshe oitukulwa yOshungonangelo oyo tai konakonwa nosho yo pefimbo lEkonakonombibeli lEongalo. Ovamwatate vamwe ovo va wana ohava pulwa va ka yandje oipopiwa yokuleshwa poyoongalele. Kutya nee oto lesha Ombibeli ile oshishangomwa shimwe shi lili, omatumbulo oo e li moihepaununinghwanyu a lesha monghedi oyo tai ningifa osho to lesha shi kale sha mwenyopala. Ngeenge moshitukulwa osho to lesha omu na omatofwemo eendjovo odo tadi popiwa kovanhu ve lili noku lili, lesha to lundulula ewi loye wa fa ovanhu ve lili noku lili tava popi. Ndelenee, henuka uha kale wa fa to ningi oshinyandwa. Lesha ashike wa mwenyopala, to shi ningi monghedi i li paushitwe.

Ngeenge omunhu ta lesha monghedi i li paushitwe ota lesha a fa omunhu ta popi monghedi yeenghundafana. Iha kala a fa ta hopaenene onghedi yomunhu wonhumba yokupopya, ashike oha lesha nondjungu.