Okupopya panghedi yeenghundafana

OVANHU ohava kala va manguluka ngeenge tava kundafana nookaume kavo, nohava popi tashi di komutima. Ovanhu vamwe ohava kala va mwenyopala neenghono, ndele vamwe ohava kala va ngungila neenghono. Ndele ngeenge otava popi monghedi oyo hava popi paushitwe, okupopya kwavo ohaku kala kuhokwifa.

Ngeenge to popi nomunhu uhe mu shii, inashi wapala okukala to popi naye monghedi ya fa yomunhu mwa ikililafana nawa ile to popi wa fa ino mana mo. Momaputuko amwe, ngeenge to hovele eenghundafana nomunhu oo uhe shii nale, ou na okupopifa omunhu a tya ngaho she likolelela keputuko lavo. Konima yaasho, oto dulu nee okutwikila eenghundafana nomuneumbo to longifa omautumbulilo e li paunafangwa nokupopya monghedi yoye yopaushitwe. Okuninga ngaho otashi pula eendunge dokuyoolola.

Ou na yo okukala wa lungama ngeenge to popi u li komutune. Ngeenge oto popi wa fa to danauka, ovapwilikini itava ka kala ve wete okwoongala oko kwopaKriste ku li omhito ya fimana noitava ka tala ko osho to popi sha kwata moiti. Momalaka amwe, owa pumbwa okulongifa omautumbulilo onhumba ngeenge to popi nomukulunhu, nomuhongi nomunambelewa ile nomudali. (Didilika omautumbulilo amwe oo a longifwa mOilonga 7:2 nosho yo 13:16.) Ope na omautumbulilo oo to dulu okulongifa ngeenge to popi nakaume kopahombo ile nakaume kopofingo. Nonande ou na okupopya panghedi yeenghundafana ngeenge u li komutune, ou na oku shi ninga nefimaneko.

Ashike ope na oinima ihapu oyo tai dulu okwiimba omunhu a kale ta popi panghedi yeenghundafana. Shimwe osho tashi dulu okwiimba omunhu a popye panghedi yeenghundafana osho omutungilo womatumbulo. Oupyakadi ohau etifwa kungeenge omupopi ta kendabala okupopya omatumbulo e li naanaa ngaashi a shangwa pombapila. Ovanhu ihava popi lela panghedi yokushanga. Odoshili kutya luhapu ohatu kongo omauyelele e na sha noipopiwa yetu moishangomwa. Naluhapu ohatu pewa ouyelele oko kwa kanghamena oipopiwa yetu. Ndele ngeenge owa popi to landula filufilu ashike osho sha shangwa ile to lesha odikilila moshipopiwadutilo shoye, ito ka popya lela panghedi yeenghundafana. Opo u kale to popi panghedi yeenghundafana, ou na okukala to longifa oitya yoye mwene nou na okuhenuka okulongifa omutungilo womatumbulo wa kitakana.

Oshinima vali shimwe osho tashi dulu okwiimba omunhu a popye panghedi yeenghundafana onhapo yomunhu yokupopya. Ngeenge owa kala ashike to popi ponhapo imwe aike, ito ka popya panghedi yeenghundafana. Mokupopya kwakwalukeshe, omunhu oha popi ta lundulula onhapo yaye yokupopya nokutula oule wefimbo la yoolokafana.

Nonande oto popi nongudu yovanhu inene, itashi imbi u popye panghedi yeenghundafana, ashike ou na okuweda ko kewi loye nokexwamo, opo ovapwilikini va kale tava yandje elitulemo.

Opo u kale ho popi nawa panghedi yeenghundafana moukalele, owa pumbwa oku shi ninga onghedindjikilile okupopya nawa keshe pamwe. Osho inashi hala okutya ou na okukala omuhongwanhu. Ndele osha fimana okuxwepopala meenghedi dokupopya odo tadi dulu okuningifa vamwe va kale tava pwilikine nefimaneko kwaasho hatu popi. U na ouyelele oo momadiladilo, tala koitwa tai landula u tale kutya openi u na okuxwepopala mokupopya kwoye kwakwalukeshe.

1. Henuka okulongifa omautumbulilo oo ehe li metwokumwe neemhango delaka ile oo taa ningifa ovanhu va diladile kutya oho endafana novanhu ovo ihava diinine omifikamhango dopakalunga. Metwokumwe nomayele oo e li mOvakolossi 3:8, ou na okuhenuka popya eendjovo dikukutu nomatukano. Inashi puka okulongifa elaka la shamhwa ile tu tye olo hatu longifa mokupopya kwakeshe efiku, molwaashi okupopya kwa tya ngaho okwa tambulwa ko.

2. Henuka okukala ashike to longifa omautumbulilo a faafana opo u holole ediladilo lonhumba. Lihonga okulongifa oitya oyo tai holola omadiladilo monghedi ya yela.

3. Henuka okukala to popi to lishuna moinima oyo wa popya nale. Diladila nawa tete kwaasho wa hala okutya, opo nee to hovele okupopya.

4. Henuka okupopya oinima ihapu oyo tai dulu okwiimba ovanhu va ude ko kutya owa hala okutya ngahelipi. Kendabala alushe okukala ho popi oinima ya yela to longifa omatumbulo maxupi opo ovapwilikini va dule okudimbuluka oitwa yoye noupu.

5. Popya monghedi oyo tai ulike kutya okwa fimaneka vamwe.