Eholokepo liwa

EHOLOKEPO loye ohali holola shihapu kombinga yoye. Jehova oha tale osho omunhu e li meni, ofimbo ovanhu luhapu hava fiki pexulifodiladilo she likolelela kwaasho “shokombada.” (1 Sam. 16:7) Ngeenge owa koshoka nowa djala nawa, vamwe otava ka diladila kutya owe lifimaneka notava ka kala va hala okupwilikina kwaasho to ti. Okudjala nawa kwoye otaku ka yandja yo efano liwa shi na sha nehangano olo u lile po, novapwilikini voye otava ka kala yo ve na etaleko liwa li na sha naKalunga oo ho longele.

Omafinamhango oo tu na okutula moilonga. Ombibeli inai tula po eemhango dihapu di na sha neholokepo. Ndele oi na omafinamhango e li pandjele oo taa dulu oku tu kwafela tu ninge omatokolo e li pandunge. Ndele osho sha fimanenena osho ‘okuninga ashishe okufimanekifa Kalunga.’ (1 Kor. 10:31) Omafinamhango elipi taa dulu oku tu wilika tu kale tu na eholokepo liwa?

Shotete, Ombibeli otai tu ladipike tu kale twa koshoka palutu notu kaleke oidjalomwa yetu ya koshoka. MOmhango oyo Jehova a li a pa Ovaisrael vopefimbo lonale omwa li mu na oiteelelwa i na sha noukoshoki. Pashihopaenenwa, ngeenge ovapristeri va li tava wanifa po oilongayakulo yavo, ova li ve na okulikosha nokukosha oikutu yavo pomafimbo oo a tulwa po. (Lev. 16:4, 24, 26, 28) Ovakriste kave li vali koshi yOmhango yaMoses, ndelenee omafinamhango oo e li mo oku na natango oshilonga. (Joh. 13:10; Eh. 19:8) Osha fimana okukala twa koshoka kolutu nomokanya nokudjala oidjalomwa ya yela unene tuu ngeenge hatu i keenhele delongelokalunga ile hatu kufa ombinga moukalele, opo tuha pundukife vamwe. Ovo hava yandje oipopiwa ile hava kufa ombinga momauliko meongalo ove na okutula po oshihopaenenwa shiwa moshinima osho. Ngeenge otwa kala hatu yandje elitulemo keholokepo letu, ohatu ulike kutya otwa fimaneka Jehova nosho yo ehangano laye.

Oshitivali, Ombibeli oye tu kumaida kutya natu kale hatu djala noshishohoni nosho yo pandunge. Omuyapostoli Paulus okwa kumaida ovakainhu Ovakriste kutya ‘nava djale noshishohoni nosho yo pandunge, haneexwiki da vindwa ile noulenga woshingoldo ile noshilanda ile noikutu youkengeli ei tai landwa nondilo, ndelenee onoilonga iwa ei tai wapalele ovakainhu ovo otave lihepaulula kutya, vo oonakutilakalunga.’ (1 Tim. 2:9, 10, yelekanifa NW.) Ovalumenhu navo ove na yo okudjala noshishohoni nosho yo pandunge.

Omunhu oo ha djala noshishohoni iha kala a hala okupundukifa vamwe inashi pumbiwa, noiha yukifa elitulemo la pitilila kuye mwene. Omunhu oo ha djala pandunge oyoo ha ningi omatokolo a diladilwa nawa, ta longifa eendunge dokuyoolola. Omunhu oo e na omaukwatya a tya ngaho oha kala a fimaneka omifikamhango dopakalunga, naasho ohashi mu kwafele a kale e na ondjele. Okukala nomaukwatya oo itashi ti kutya omunhu ke na okukala ta monika nawa, ashike omaukwatya oo otae tu kwafele tu henuke okukala hatu djala nokuliwapeka monghedi yokuliulika. (1 Joh. 2:16) Otwa hala okukala hatu tula moilonga omafinamhango oo, kutya nee otu li ponhele yelongelokalunga, moukalele, ile ohatu kufa ombinga moinima imwe i lili. Otu na yo okudjala noshishohoni nosho yo pandunge oikutu yetu yomeumbo ile ngeenge hatu ka pashiyona. Keefikola nokeenhele doilonga ohaku holoka eemhito dokuyandja oundombwedi wohangelela. Onghee hano, nonande itatu djala ngaashi hatu djala eshi hatu i kokwoongala nokoyoongalele, otu na okukala twa djala nawa, tu na oshishohoni notwa koshoka.

Doshili, ihatu djala oidjalomwa ya faafana atusheni, noinatu teelelwa tu ninge ngaho. Ovanhu ove hole okudjala meenghedi di lili noku lili, naasho inashi puka. Ndele nande ongaho, otu na okutula alushe moilonga omafinamhango Ombibeli.

Omuyapostoli Petrus okwa ulika kutya “omunhu womeni womomutima” okwa fimanenena e dule eholokepo letu lokombada, sha hala kutya, onghedi omo hatu wapeke eexwiki detu nosho yo oikutu oyo hatu djala. (1 Pet. 3:3, 4) Otwa pumbwa okuyadifa omitima detu nomaukwatya ngaashi ohole, ehafo, ombili, olune neitavelo la kola. Omaukwatya oo oku li oidjalomwa yetu yopamhepo oyo tai fimanekifa shili Kalunga.

Oshititatu, Ombibeli otai tu kumaida tu kale hatu tale ngeenge eholokepo letu oli li nawa. Mu 1 Timoteus 2:9 omwa tumbulwa “oikutu tai wapala eenghedi diwa.” Nonande omuyapostoli Paulus okwa li ta popi shi na sha noikutu yovakainhu, efinamhango olo otali longo yo nokovalumenhu. Oshidjalomwa osho tashi wapalele oshosho shi yela noshi li momushingo muwa. Nonande otu na oiniwe ihapu ile hasho, ohatu dulu okukala neholokepo liwa.

Ngeenge ovanhu tave tu tale, oshinima shimwe osho hava tale tete kusho eexwiki detu. Eexwiki detu odi na okukala di yela noda fulwa nawa. Eputuko nosho yo oshitwe yeexwiki domunhu oyo hai ufa kutya oku na okufila oshisho ngahelipi eexwiki daye. Mo 1 Ovakorinto 11:14, 15, omuyapostoli Paulus okwe tu pa omayele e na sha nokuwapeka eexwiki. Osha yela kutya pefimbo opo okwa li a diladila kombinga yomaputuko nosho yo yoshitwe yeexwiki. Ndelenee, ngeenge eexwiki domunhu wonhumba otadi ulike kutya ota kendabala okukala ta monika a fa omunhu woukashike kookanhu wa yooloka ko kuwaye, osho oshi li omhinge nomafinamhango Ombibeli. — Deut. 22:5.

Eholokepo liwa lovalumenhu ola kwatela mo okukala have likulula eendjedi. Moitukulwa omo ovanhu va fimaneka eendjedi dopomayulu, omunhu oo e na eendjedi da tya ngaho oku na okukala he di file oshisho.

Oshitine, eholokepo letu ka li na okuulika kutya otu hole ounyuni ile eenghedi dao. Omuyapostoli Johannes okwe tu kumaida a ti: “Inamu kala nokuhola ounyuni nakeshe eshi shi li mo.” (1 Joh. 2:15-17) Mounyuni omu na ovanhu vahapu ovo ve na omahalo oulunde. Johannes okwe tu londwela shi na sha nokahalu kombelela noifulalala yokukalamwenyo. Omishangwa otadi tu londwele yo shi na sha nomhepo younashibofa ile yokuhadulika kwaavo ve na eenghonopangelo. (Omayel. 17:11; Ef. 2:2) Omahalo noikala oyo luhapu ohai ulikwa monghedi omo ovanhu hava djala. Ovanhu ovo ve na oikala ya tya ngaho ohava djala monghedi oyo tai ulike kutya kave na oshishohoni, onghedi oyo tai pendula omahalo opamilele, yokuliulika, yokuhenakonasha, noinai filwa oshisho. Tu li oshiwana shaJehova, otu na okuhenuka okudjala nokuliwapeka meenghedi odo dihe li metwokumwe nomifikamhango dopaKriste.

Itashi ka kala tuu pandunge okweefa oihopaenenwa iwa yovakainhu novalumenhu va pyokoka pamhepo ovo ve li meongalo lopaKriste oyo i tu nwefe mo, ponhele yokuhopaenena oikala younyuni! Ovalumenhu ovanyasha ovo va hala okukala ovapopi vomoipafi monakwiiwa otava dulu okutala nhumbi ovamwatate ovo hava yandje oipopiwa yomoipafi hava djala nokuliwapeka. Ndele nande ongaho, atusheni ohatu dulu okulihonga kovaitaveli vakwetu ovo va kala tava kufa ombinga nouladi moukalele oule womido dihapu. — 1 Tim. 4:12; 1 Pet. 5:2, 3.

Oshititano, ngeenge hatu hoolola onghedi yonhumba yokudjala ile yokuliwapeka, otu na okudimbuluka kutya ‘Kristus yo ine liwapalela.’ (Rom. 15:3) Jesus okwa li a pitifa komesho okulonga ehalo laKalunga nosho yo ouwa wavamwe. Ngeenge otwa didilika kutya onghedi yonhumba yokudjala ile yokuliwapeka otai pundukifa ovanhu vomoshitukulwa omo hatu longo, ohatu ka ninga po shike? Okuhopaenena oikala yaKristus yelininipiko otashi ke tu kwafela tu ninge omatokolo opandunge. Omuyapostoli Paulus okwa popya efinamhango limwe a ti: “Itatu pe omunhu omhito okudina moshinima nande shimwe, oshilongayakulo shetu shi ha shekwe.” (2 Kor. 6:3) Metwokumwe nefinamhango olo, ohatu ka henuka omidjalo ile eenghedi dokuliwapeka odo tashi dulika di ningife ovanhu va kale inava hala okupwilikina ketumwalaka letu.

Onghedi omo hatu kala ofika. Eholokepo liwa ola kwatela mo yo okukala ofika nawa. Odoshili kutya ihatu kala ofika monghedi ya faafana, nokape na omhango tai dengele kutya otu na okukala ofika monghedi yonhumba. Ndele shididilikwedi, Ombibeli otai ulike kutya okukala ofika wa yukilila ohaku holola kutya omunhu okwe lifimaneka noku na omukumo. (Lev. 26:13; Luk. 21:28) Ashike ovamwatate ile ovamwameme vamwe ihava dulu okukala ofika va yukilila lela omolwokulonga omido dihapu va petama ile molwoukulupe ile molwokuhenoukolele. Onghee hano, vamwe otashi dulika va pumbwa okufikama ve likolelela kusha. Ndele kwaavo tava dulu okukala ofika va yukilila, oshiwa okuninga ngaho, opo vaha yandje efano kutya kave na ko nasha ile kutya ove lietela onghenda. Inashi puka komupopi okukwatelela efimbo nefimbo kokataafula kovapopi, ndele keshiwa okupopya wa yaamena kokataafula oko.

Oilongifo yoye. Kakele keholokepo loye, oinima oyo to longifa moukalele oi na okukala ya filwa oshisho.

Tala kutya Ombibeli yoye oi li monghalo ya tya ngahelipi. Haalushe atushe hatu dulu okupingena po Eembibeli detu ngeenge da kulupa. Onghee hano, kashi na nee mbudi kutya Ombibeli yetu oya kala po efimbo li fike peni, oshi na okukala shi liwetikile kutya otwe i kwata nawa.

Nonande ope na eenghedi dihapu omo hatu dulu okupakela eendjato detu domomapya, nado odi na okukala da filwa oshisho nawa. Mbela owa mona ngoo nande onale omuudifi ta leshele omuneumbo omushangwa ile omumwatate ta yandje oshipopiwa meongalo, ohaluka mOmbibeli yaye otamu wu oumbapila? Mbela oshinima sha tya ngaho kasha li tashi ku piyaaneke? Ngeenge oumbapila ovo wa tuvikila mOmbibeli yoye ove na oupu okuwa mo, oshixwepo u va tuvikile poima pamwe pe lili. Momaputuko amwe, osha talika ko okuhenefimaneko okutenheka Ombibeli ile oishangomwa yopalongelokalunga pedu. Onghee hano, otu na okulungamena oshinima sha tya ngaho.

Otu na okukala twa lenga okukala neholokepo liwa. Eholokepo liwa ohali nwefa mo yo nghee vamwe have tu tale ko. Ndele komesho yaaishe, ohatu fi oshisho tu kale neholokepo liwa molwaashi otwa hala tu “wapaleke muaishe elongo laKalunga, Omukulili wetu.” — Tit. 2:10.