Okutunga vamwe noku va twa omukumo

ETUMWALAKA olo twa pewa tu udife oli li onghundana iwa. Jesus okwa ti: “Tete [onghundana iwa oi, NW] na okuudifilwa oiwana aishe.” (Mark. 13:10) Jesus okwa tula po oshihopaenenwa eshi a udifa “onghundana iwa youhamba waKalunga.” (Luk. 4:43, NW) Ovayapostoli navo ova li yo va udifa “onghundana iwa yaKalunga” nosho yo “onghundana iwa i na sha naKristus.” (1 Tes. 2:2, NW; 2 Kor. 2:12, NW) Etumwalaka la tya ngaho otali tungu notali tu omukumo.

Metwokumwe neudifo ‘longhundana iwa yaalushe,’ oyo tai udifwa ‘komwengeli ta tuka pokati keulu,’ ohatu ladipike ovanhu va ‘tile Kalunga, nove mu fimaneke.’ (Eh. 14:6, 7, yelekanifa NW.) Ohatu lombwele ovanhu aveshe ovo hatu shakeneke kombinga yaKalunga kashili, yedina laye, yomaukwatya aye makumwifi, oilonga yaye ikumwifi, elalakano laye lopahole, kutya otu na okulihokolola kuye nonokutya ota pula shike kufye. Onghundana oyo iwa oya kwatela mo yo oushili oo kutya Jehova Kalunga ota ka hanauna po ovakolokoshi, ovo ihave mu fimaneke nohava nyonene vakwao onghalamwenyo. Ndele katu na okutokola oohandimwe ovo hatu udifile. Otwa halelela ovanhu vahapu ve linyenge nawa ketumwalaka lOmbibeli opo ve shi limonene kutya etumwalaka olo onghundana iwa shili kuvo. — Omayel. 2:20-22; Joh. 5:22.

Ino yandja unene elitulemo koinima oyo ii. Doshili, monghalamwenyo omu na oinima ihapu ii, noihatu lipwililikile oinima ya tya ngaho. Opo u hovele eenghundafana nomunhu, oto dulu okupopya kombinga youpyakadi wonhumba oo ovanhu moshitukulwa sheni tave lipula nao ndele to u kundafana naye pauxupi. Ndele luhapu ihashi kala naanaa shiwa okupopya oule wefimbo kombinga yomaupyakadi. Ovanhu ohava udu luhapu eenghundana dinyikifa oluhodi. Onghee hano, ngeenge owa kala to popi shi na sha noinima ii, otashi dulika vaha ka pwilikine nohokwe. Pehovelo leenghundafana doye nomunhu, kendabala okuyukifa elitulemo laye keeshili tadi tulumukifa odo tadi hangwa mEendjovo daKalunga. (Eh. 22:17) Opo nee nonande omunhu oo to kundafana naye oku ka kale vali ina hala mu twikile neenghundafana, oto hangwa we mu lombwela nale sha tashi tungu osho ta dulu oku ka diladila kusho. Kungaho, otashi dulika a ka kale a hala okupwilikina pomhito imwe i lili.

Sha faafana, ngeenge owa ulikwa u ka yandje oshipopiwa, ino yada ovapwilikini ouyelele muhapu u na sha noinima ii molwaashi ashike wa mona ouyelele muhapu u na sha noinima oyo. Ngeenge omupopi okwa kala ta popi efimbo lile shi na sha nokuponya kwovapangeli vopanhu, eenghundana di na sha nekaulonyanga nelongifo leenghono nosho yo shi na sha noluhaelo olo li li apeshe, otashi ka ningifa ovapwilikini va teke omukumo. Popya ashike kombinga yoinima ii ngeenge sha pumbiwa. Ngeenge owa popi pauxupi shi na sha noinima oyo ii, otashi ka kwafela vamwe va mone kutya oshipopiwa shoye oshi li pefimbo. Ouyelele oo otau dulu yo oku va kwafela va mone kutya oshike sha etifa oupyakadi wonhumba noto dulu okulongifa ouyelele oo u ulike kutya omolwashike ekandulepo loupyakadi wonhumba olo la yandjwa mOmbibeli tali wapalele. Apa tashi shiiva, popya omaupyakadi oo kondadalunde, ashike ino kala to popi kombinga yao efimbo lile.

Luhapu ito dulu okukala ino kundafana shi na sha neenghalo donhumba dii moshipopiwa shoye. Ndele owa pumbwa okulongifa pandjele ouyelele oo tau kundafana oinima oyo iwa neenghalo odo dii, opo oshipopiwa shoye shi kale tashi tungu ovapwilikini. Opo u ninge ngaho, ou na okuhoolola kutya ouyelele ulipi to ka longifa naao ito ka longifa nonokutya oshike a divilika. MEudifo laye lokOmhunda, Jesus okwa li a ladipika ovapwilikini vaye va henuke oikala yokuliholamwene oyo ya li i niwe kovanongo vomishangwa nokOvafarisai, nokwa li a yandja oihopaenenwa yonhumba opo a yelife oshitwa shaye. (Mat. 6:1, 2, 5, 16) Ndele ponhele yokukala ashike ta popi kombinga yoihopaenenwa ii yovakwatelikomesho ovo velongelokalunga, Jesus okwa li a divilika efimano lokukala nonghedi yokukalamwenyo oyo ya hokiwa kuKalunga. (Mat. 6:3, 4, 6-15, 17-34) Oshidjemo, ehongo laye ola li la etela ovanhu ouwa.

Popya monghedi tai tungu. Ngeenge owa pewa omhito yokuyandja oshipopiwa meongalo leni shi na sha nomalipyakidilo onhumba opaKriste, kendabala okupopya monghedi tai tungu, ponhele yokukembaula ovapwilikini. Shilipaleka kutya naave oho ningi osho to ladipikile vamwe va ninge. (Rom. 2:21, 22; Heb. 13:7) Ngeenge owa hala ovapwilikini va katuke eenghatu, popya to linyengifwa kohole, ndele hakehandu. (2 Kor. 2:4) Ngeenge ou na elineekelo kutya ovaitaveli vakweni ova hala okuhafifa Jehova, osho to ka popya otashi ka holola elineekelo loye, naasho otashi ka eta oidjemo iwa. Didilika nghee omuyapostoli Paulus a li a holola elineekelo la tya ngaho, ngaashi sha hokololwa mo 1 Ovatessaloniki 4:1-12; 2 Ovatessaloniki 3:4, 5 nosho yo muFilemon 4, 8-14, 21.

Omafimbo amwe, ovakulunhuongalo ohava kala va pumbiwa okulondwela shi na sha nelihumbato lonhumba lihe li pandunge. Ndele elininipiko otali ke va kwafela va ungaunge novamwaxe nonheni. (Gal. 6:1) Onghedi omo ovamwatate ovo tava popi oi na okuholola kutya ova fimaneka oilyo yeongalo. (1 Pet. 5:2, 3) Ombibeli otai kumaida unene tuu ovalumenhu ovanyasha va lungamene oshinima osho. (1 Tim. 4:12; 5:1, 2; 1 Pet. 5:5) Ngeenge pa holoka omhito yokuhanyena oohandimwe, yokuyandja outekuduliko koohandimwe nosho yo okuyukifa oinima, omayele oye naa kale a kanghamena kOmbibeli. (2 Tim. 3:16) Omupopi ke na okuyelifa etulomoilonga lomishangwa papuko ile oku di endameka opo a yambidide ediladilo laye mwene olo a kanyatela kulo. Nonande efimbo limwe otashi dulika sha pumbiwa okuyandja omapukululo, oshipopiwa otashi ka kala tashi tungu ngeenge omupopi okwa yandje unene elitulemo kunghee hatu dulu okuhenuka okunyona, nghee hatu dulu okuungaunga nomashongo, nghee hatu dulu okupondola omaupyakadi, nghee hatu dulu okupukulula umwe oo a nyona nosho yo nghee oiteelelwa yaJehova hai tu amene. — Eps. 119:1, 9-16.

Ngeenge to lilongekidile oshipopiwa shoye, yandja elitulemo kunghee to ka ngonga oshitwa keshe sha fimanenena nosho yo nghee to ka xulifa oshipopiwa shoye lwopexulilo. Osho to ka popya lwaxuuninwa osho hashi dimbulukiwa efimbo lile. Mbela osho to ka popya otashi ka tunga ngoo vamwe?

Ngeenge to popi novaitaveli vakweni. Ovapiya vaJehova ohava hafele eemhito dokweendafana novaitaveli vakwao pokwoongala kwopaKriste. Okwoongala ohaku tu tulumukifa pamhepo. Ombibeli otai tu ladipike tu kale hatu ‘twaafana omukumo’ ngeenge twa ongala peenhele dokulongela Kalunga. (Heb. 10:24) Ohatu twaafana omukumo okupitila moipopiwa, momatyekosha etu pokwoongala nosho yo mokweendafana novaitaveli vakwetu komesho nokonima yokwoongala.

Nonande oshi li paushitwe okukala hatu kundafana oinima oyo ya pamba onghalamwenyo yetu yakeshe efiku, ohatu ka twaafana unene omukumo ngeenge otwa kala hatu kundafana kombinga yoinima yopamhepo. Oinima oyo otashi dulika i kale oimoniwa oyo twa hafela moilonga yetu iyapuki. Okuulika kutya otu na ko nasha navamwe shili otashi ka tunga yo vamwe.

Molwaashi otwa dingililwa kounyuni ou, otu na okulungama uhe tu nwefe mo. Eshi Paulus a li a shangela Ovakriste vokuEfeso okwa ti: “Efeni oipupulu, popyeni oshili keshe tuu namukwao.” (Ef. 4:25) Okupopya oshili okwa kwatela mo okuhatumbaleka oinima nosho yo ovanhu ovo ounyuni wa ninga oikalunga yavo. Sha faafana, Jesus okwa li a londwela shi na sha “neheka loupuna.” (Mat. 13:22) Onghee hano, ngeenge hatu popi novaitaveli vakwetu, otwa pumbwa okukala twa lungama tuha kale hatu xumifa komesho eheka loupuna mokukala hatu tange oiniwe yopamaliko. — 1 Tim. 6:9, 10.

Eshi omuyapostoli Paulus a yandja omayele e na sha nokukala hatu tungafana, okwe tu ladipika tuha tokole ile tu dine omumwatate oo ina hala okuninga oinima yonhumba molwaashi e li “omwiitaveli oshingone,” sha hala okutya, ine lihonga pauyadi kutya Ovakriste ova manguluka okuninga shike nashike. Opo tu tunge vakwetu ngeenge hatu popi navo, otu na okulihonga shi na sha nomaputuko avo nosho yo shi na sha nexumokomesho lavo lopamhepo. Itashi ka kala tuu shinyikifa oluhodi ‘okutulila omumwaxo [ile omumwanyoko] oshinima shehaulo, ile shokupundukifa mondjila yaye’! — Rom. 14:1-4, 13, 19.

Oohandimwe ovo ve na omaupyakadi a kwata moiti, pashihopaenenwa, tashi dulika tava vele oudu woshinamenena, ohava kala va hafa ngeenge vamwe tava popi navo oinima tai tungu. Omunhu a tya ngaho otashi dulika ha ningi eenghendabala da mana mo opo a kale pokwoongala. Ovo ve shii shi na sha nonghalo yaye otashi dulika ve mu pule tava ti: “Ou udite ngahelipi?” Nopehe na omalimbililo, ota ka kala e va pandula omolwokunakonasha kwavo. Ndele otashi dulika aha kale a hokwa lela okupopya kombinga youkolele waye, molwaashi itashi mu tungu. Ndele ngeenge vamwe ove mu pandula omolweenghendabala odo ta ningi, otashi dulika shi ka hafife neenghono omutima waye. Mbela ou wete nghee omwiitaveli oo ta twikile okuulika kutya oku hole Jehova nomudiinini nonande oku li meenghalo didjuu da tya ngaho? Mbela ohashi ku tu omukumo ngeenge ta yandje omatyekosha? Mbela itashi ke ku twa omukumo neenghono ngeenge owa yukifa elitulemo keenghendabala odo ha ningi nosho yo kunghee ha tungu eongalo ponhele yokuyandja elitulemo komangabeko aye? — 1 Tes. 5:11.

Opo tu tunge vamwe ngeenge hatu popi navo, osha fimana okukaleka momadiladilo kutya Jehova okwa tala ko ngahelipi oshinima osho hatu kundafana kombinga yasho. MuIsrael shonale, ovo va li tava popile mowii ovakalelipo vaJehova nova li tava ngongota shi na sha nomanna ova li va katukilwa onghatu ya kwata moiti kuJehova. (Num. 12:1-16; 21:5, 6) Ohatu ulike kutya otwe lihonga mo sha moiningwanima ya tya ngaho, ngeenge ohatu fimaneke ovakulunhuongalo nokukala tu na olupandu li na sha neendja dopamhepo odo hatu pewa okupitila momupiya omudiinini nomunaendunge. — 1 Tim. 5:17.

Kashidjuu naanaa okupopya kombinga yoinima tai tungu ngeenge tu li nOvakriste vakwetu. Ndele ngeenge otwa didilike kutya umwe ota popi ta kembaula vamwe, natu kendabale tu popye kombinga yoshinima shimwe shi lili osho tashi tungu.

Kutya nee ohatu udifile vamwe, ohatu yandje oshipopiwa ile ohatu popi novaitaveli vakwetu, natu longifeni eendunge dokuyoolola eshi hatu holola omamona oo e li momitima detu, opo eendjovo odo hatu popi di kale “diwa dokutungafana, da wapala okupwilikina.” — Ef. 4:29.