Okulongela kefimbo nokutukula nawa efimbo

NONANDE osha fimanenena okuyandja elitulemo kwaasho to hongo, owa pumbwa yo okulongela kefimbo olo wa ufilwa. Okwoongala kwetu okwa unganekwa ku kale haku hovele noku kale haku xulu pefimbo lonhumba lokondadalunde. Opo okwoongala ku pwe pefimbo, aveshe ovo ve na oitukulwa pokwoongala ova pumbwa okulongela kefimbo olo va ufilwa.

Pefimbo lOmbibeli, ovanhu ova li ve na etaleko la yooloka ko kwaalo li niwe kuvahapu kunena li na sha nefimbo. Ovanhu ova li hava tengeneke efimbo tava longifa omautumbulilo ngaashi “pokafimbo okatitatu,” nosho yo ‘otundi onhimulongo.’ (Mat. 20:3-6; Joh. 1:39) Kava li lela ve na omafimbo okondadalunde okuninga oinima yomokukalamwenyo kwakeshe efiku. Kunena, ovanhu moitukulwa imwe younyuni navo osho ve na etaleko la tya ngaho li na sha nefimbo.

Ndelenee nonande eenghedindjikilile domoitukulwa ile omataleko opaumwene otashi dulika i ningife ovanhu vaha kale ve na ko nasha nefimbo, ohatu ka mona ouwa ngeenge otwe lihongo okukala hatu kwata nawa efimbo. Ngeenge ovanhu vahapu ove na oitukulwa pokwoongala, ova pumbwa okulongifa efimbo olo la ufilwa oitukulwa yavo. Efinamhango olo tali ti kutya “aishe nai ningwe keenghedi diwa nokushikulafana” otali dulu okulongifwa ngeenge tashi uya pokulongifa efimbo olo la ufilwa oitukulwa oyo tu na pokwoongala. — 1 Kor. 14:40.

Nghee to dulu okulongela kefimbo olo wa ufilwa. Opo tu dule okulongifa nawa efimbo olo twa ufilwa, otwa pumbwa okulilongekida. Luhapu ovapopi ovo hava pitililifa efimbo ovovo ihave lilongekida nawa. Otashi dulika ve lineekela mounghulungu wavo, ile have lilongekida komunute waxuuninwa. Opo u dule okulongela kefimbo olo wa ufilwa, tete ou na okuuda ko nawa oshikundafanwa shoye nokulilongekidila nawa oshipopiwa shoye.

Mbela oto ka yandja oshipopiwa shokulesha? Konakona tete onghedi yokupopya onhi-4 fiyo onhi-7, oyo ya kwatela mo okupopya oitya tai kunguluka nawa, okutula, okudivilika opo sha pumbiwa nosho yo okudivilika omadiladilo oo a fimanenena. Opo nee tula moilonga omayele oo eshi to lesha mokule ouyelele oo wa pewa. Tala kutya oto longifa efimbo li fike peni. Mbela owa pumbwa okulesha to endelele opo u dule okumana pefimbo? Lesha to endelele ngeenge oto lesha oinima oyo inai fimanenena, ashike kala to tula po opo wa pumbwa okutula nokulesha to ende kanini opo u divilike oitwa oyo ya fimanenena. Kala to liendifa po lwoikando. Ngeenge owa kala u shii okulesha nawa, otashi ka kala shipu kwoove okulongela kefimbo.

Mbela oto ka yandja oshipopiwa to longifa oshipopiwadutilo? Itashi ti kutya opo u longele kefimbo ou na okushanga oinima ihapuihapu wa fa to ka yandja oshipopiwa shokuleshwa. Eshi wa lesha onghedi yokupopya onhi-25, owe lihonga kutya ope na onghedi ixwepo yokuunganeka oshipopiwadutilo. Eshi to lilongekida, kaleka oitwa ei itano momadiladilo: (1) Ouyelele woye nau kale tau wapalele, ndele inau kala muhapu unene. (2) Kaleka momadiladilo omadiladilo oo a fimanenena, ndele ino kopela momutwe omatumbulo aeshe. (3) Shanga moshipopiwadutilo shoye kutya poshitukulwa keshe owa diladila oku ka longifa efimbo li fike peni, ile kutya ope na okupita efimbo li fike peni ofimbo ino ya koitwa yonhumba. (4) Eshi to lilongekida, tala kutya ouyelele ulipi to ka fiya po ngeenge efimbo ola nyika oku ku kwata. (5) Liendifa po poshipopiwa shoye.

Osha fimanenena okulideula nghee to ka yandja oshipopiwa shoye. Eshi to lideula, longela kefimbo olo la ulikwa pokapalanyole keshe koshipopiwa shoye. Kala to lideula lwoikando fiyo osheshi to dulu okuyandja oshipopiwa shoye moule wefimbo olo wa ufilwa. Ino kendabala okulongifa ouyelele muhapu unene. Lideula okukala to mane diva, to fiye ko ominute donhumba, molwaashi eshi to ka yandja oshipopiwa shoye, otashi dulika u popye olule shi dulife pefimbo lokulideula kwoye.

Okutukula nawa efimbo. Osho otashi ke ku kwafela u longele kefimbo. Efimbo lihapu loshipopiwa ohali longifwa mokati kasho. Mokati koshipopiwa omo mu na oitwa oyo ya fimanenena, oyo tai hongo. Etwalemo loye oli na okukala li na oule wa yeleka opo u dule okuhanga omalalakano oo a kundafanwa monghedi yokupopya onhi-38. Ino pitililifa efimbo olo u na okulongela kulo eshi to ndjadjukununa mo oitwa yoye ya fimanenena, ndele to kala uhe na efimbo la wana okuninga exulifo tali ti sha, to shi ningi metwokumwe nouyelele oo u li monghedi yokupopya onhi-39.

Ngeenge owa kala ho longele kefimbo olo wa pewa, oto ka dula okuyandja oipopiwa iwa noto ka ulika kutya owa fimaneka vakweni ovo ve na oitukulwa pokwoongala nosho yo eongalo alishe.