Omalombwelo kovapashukili vofikola

MEONGALO keshe, omwa hoololwa omukulunhuongalo wonhumba oye a kale omupashukili wOfikola yOukalele woPauteokratika. Ngeenge owe lineekelelwa oshinakuwanifwa sha tya ngaho, owa pumbwa okukala u na ondjungu nokukala wa halelela okukwafela omunafikola keshe a ninge exumokomesho. Osho osha fimanenena mokukwafela eongalo li mone ouwa mofikola.

Oshitukulwa sha fimanenena shoshinakuwanifwa shomupashukili wofikola osho okukwatela komesho Ofikola yOukalele woPauteokratika oshivike keshe meongalo. Kaleka momadiladilo kutya kakele kovanafikola ovo ve na oipopiwa mofikola, ope na yo ovo tava pwilikine. Kwatela komesho ofikola monghedi oyo tai tungu eongalo alishe, nokulongifa omadimbulukifo oo a pambafana nalimwe lomomalalakano ofikola oo a tumbulwa pepandja 5 fiyo 8 lembo eli.

Kala u na ko nasha novanafikola aveshe, kutya nee oyoo ta ka yandja oshipopiwa shokuleshwa, oshipopiwauliko, ile oshipopiwa osho hashi yandjwa monghedi yoshipopiwa shomoipafi. Va kwafela va tale ko oipopiwa yavo i li omhito yokuninga exumokomesho moilonga yaJehova, ndele kai fi ashike oinakuwanifwa yongahenya. Eenghendabala odo omunafikola keshe ta ningi odo hadi ufa kutya ota ka ninga exumokomesho li fike peni. Ashike osha fimana yo okuulika kutya ou na ko nasha nomunafikola, oku mu kwafela a ude ko efimano longhedi yokupopya oko ta longele noku mu yelifila kombinga yanghee ta dulu okutula moilonga omaetepo oo a kwatelwa mo. Pwilikina nawa koshipopiwa keshe opo u dule okuyandja omayele taa ti sha she likolelela kwaasho wa didilika.

Shilipaleka kutya ofikola otai hovele notai xulu pefimbo. Tula po oshihopaenenwa shiwa mokuyandja omatyekosha oye moule wefimbo olo wa ufilwa. Ngeenge omunafikola okwa pitililifa efimbo, ove ile omuyakuli oo a ulikwa a kale ta tale efimbo oku na okuyandja edidiliko kutya efimbo lomunafikola ola pwa ko. Ngeenge omunafikola okwa ulikilwa kutya efimbo laye ola pwa ko, oku na okuxulifa etumbulo olo a li ta popi ndele ta di ko komutune. Ngeenge ovanafikola vamwe ova pitililifa efimbo, omatyekosha oye a ninga meni lefimbo lixupi, opo nee konima yokwoongala kundafaneni oshinima osho naavo va pitililifa efimbo.

Ngeenge owe uya kokwoongala, oove u na okukwatela komesho ofikola. Ndele ngeenge peemhito dimwe ito dulu okuya kokwoongala, omukulunhuongalo oo a li nale a pewa oshinakuwanifwa osho kolutu lovakulunhuongalo oye na kwatele komesho ofikola. Ngeenge owa hala umwe e ku kwafele mokuninga ko kelandulafano, okushanga nokuyandja oumbapila voipopiwa ile okukonga ovo tava dulu okupingena po ovanafikola vonhumba ngeenge itava dulu okukala po, olutu lovakulunhuongalo otali dulu okuhoolola omuyakuliongalo oo ta dulu oku ku kwafela okuninga oinima oyo.

Okulishangifa mofikola. Ladipika ovaudifi aveshe ve lishangife mofikola. Ovanhu ovo hava endafana alushe neongalo navo otava dulu yo okulishangifa mofikola ngeenge otava tu kumwe nomahongo Ombibeli, nosho yo ngeenge onghalamwenyo yavo oi li metwokumwe nomifikamhango dopaKriste. Ngeenge ope na umwe oo a hala okulishangifa mofikola, mu pandula nomutima aushe. Ngeenge omunhu oo hala okulishangifa mofikola ke fi omuudifi natango, ove, u li omupashukili wofikola, ou na okukundafana naye oiteelelwa yokulishangifa mofikola, naasho oto dulu oku shi ninga moipafi yaao ha konakona naye Ombibeli (ile pamwe nomudali waye oo e li moshili). Omunhu oo a hala okulishangifa mofikola naye oku na yo okuwanifa po oiteelelwa oyo i na okuwanifwa po komunhu oo a hala okuninga omuudifi ina ninginifwa. Oiteelelwa oyo oi li pepandja 79 fiyo 81 lembo Organized to Do Jehovah’s Will. Kala u na elandulafano laaveshe ovo ve li mofikola.

Okulongifa omusholondodo woitwa oko ovanafikola ve na okulongela. Omusholondodo oo otau hangwa membo eli, pepandja 79 fiyo 81. Ngaashi sha ulikwa komaluvala, oitwa okudja po 1 fiyo 17 oto dulu oku i longifa ngeenge omunafikola okwa pewa oshipopiwa shokulesha. Ovanafikola ovo ve na oipopiwauliko otava dulu okulongifa oitwa aishe kakele koshitwa 7, 52 nosho yo 53. Ngeenge omunafikola ota yandje oshipopiwa osho shi li molupe loshipopiwa shomoipafi, oto dulu okulongifa oitwa aishe kakele koshiti-7, 18 nosho yo 30.

Ngeenge omunafikola okwa pewa oshitwa oko e na okulongela, omupashukili wofikola oku na okushilipaleka kutya opo pa shangwa “Efiku omo to hovele,” pokamufinda oko ka yukilila onghedi yokupopya oko omunafikola ta longele, opa yadekwa efiku omo ta hovele. Konima eshi omunafikola a mana oshipopiwa shaye, mu pula paumwene ngeenge okwa ninga ngoo edeulo ile omadeulo oo e li pexulilo longhedi yokupopya oko a li ta longele. Ngeenge osho, oto dulu okupa po okangobe poshitwa osho. Ngeenge owa hala natango a longele konghedi oyo yokupopya, ino pumbwa okuyadeka po sha opo pa shangwa “Efiku omo wa mana.” Opo ou na ashike okuyadeka po ngeenge a longela nawa koshitwa osho nokwa pita a ye kushikwao. Kakele kaasho, pepandja 82 lembo eli, kolumosho longhalo omo omunafikola ta longele ope na okamufinda opo pe na okudidilikwa efiku omo omunafikola a longifa onghalo oyo. Momusholondodo woitwa oko omunafikola e na okulongela nosho yo momusholondodo weenghalo omu na oumufinda vavali, opo omunafikola a dule okulongifa oshitwa ile onghalo yonhumba lwoikando ivali. Ovanafikola ove na okweetelela omambo avo kokwoongala kwofikola.

Omunafikola oku na ashike okulongela konghedi yokupopya imwe poshikando. Ohashi kala shiwa okulongela keenghedi dokupopya to di di melandulafano. Ashike ngeenge ovanafikola vamwe ove udite ko nawa eenghedi dokupopya donhumba, oto dulu oku va ladipika va konakone paumwene eenghedi dokupopya odo nokutula moilonga kuvo vene oilihongomwa oyo ya kwatelwa mo. Opo nee oto dulu oku va kwafela va longele keenghedi dokupopya odo u wete kutya otadi ke va kwafela va ninge ovapopi novahongi ovanekeka.

Nokuli nonande omunafikola okwa kala ta kufa ombinga mofikola oule womido dihapu, ota ka mona ouwa muhapu ngeenge okwa konakona nokutula moilonga oinima aishe oyo e lihonga membo olo. Ngeenge owa hala okukwafela omunafikola oo e na omhumbwe yonhumba yokondadalunde, oto dulu okuhoolola eenghedi dokupopya donhumba oko u wete a pumbwa okulongela, ponhele ashike yokukala ta longele keenghedi dokupopya melandulafano.

Nghee u na okuyandja omayele. Ngeenge to yandje omayele, longifa oihopaenenwa nomafinamhango omOmbibeli. Ovanafikola ove na okukala ve wete kutya omayele oo tava pewa nosho yo monghedi omo taa yandjwa oi li metwokumwe nomafinamhango a denga mbada oo e li mEendjovo daKalunga.

Kaleka momadiladilo kutya ou li ‘omuyakuli pamwe’ novamwaxo. (2 Kor. 1:24) Ngaashi ashike ovamwaxo va pumbwa okuninga exumokomesho, naave owa pumbwa okukala to ningi exumokomesho u li omupopi nomuhongi. Konakona paumwene embo Mona ouwa mOfikola yOukalele woPauteokratika, tula moilonga omayele oo e li mo nokutulila po vamwe oshihopaenenwa shiwa, opo navo va ninge sha faafana.

Eshi to ningi ngaho, shi ninga elalakano loye okukwafela ovanafikola va ninge ovaleshi ovanekeka, ovapopi ovanekeka nosho yo ovahongi va pyokoka. Opo u dule okuninga ngaho, kendabala okukwafela ovanafikola opo va ude ko eenghedi dokupopya di lili noku lili, nonokutya omolwashike da fimana nosho yo nghee ve na okulongifa eenghedi odo dokupopya. Embo eli lofikola ola unganekwa monghedi oyo tai dulu oku ku kwafela u dule okuninga ngaho. Ashike owa pumbwa okuninga shihapu shihe fi ashike okulesha osho shi li membo eli. Kundafana eityo longhedi yokupopya keshe nokuyelifa nghee omunafikola ta dulu okulongela kuyo.

Ngeenge omunafikola okwa longele nawa koshitwa shonhumba, mu pandula. Popya pauxupi kutya oshike she mu kwafela a pondole ile omolwashike osho a ninga sha fimana. Ngeenge okwa pumbwa okuyandja elitulemo koshinima shonhumba, shilipaleka kutya oku udite ko kutya omolwashike e na okuyandja elitulemo kusho. Mu yelifila kutya oku na okuninga shike opo a pondole. Popya sha yukilila, ndele pefimbo opo tuu opo mu yavelela.

Dimbuluka kutya kovanhu vahapu ohashi kala shidjuu oku ka yandja oshipopiwa komesho yovanhu vahapu. Ngeenge omunhu oku wete kutya ine shi endifa nawa, otashi dulika a kale te lipula kutya na twikile ngoo okuninga eenghendabala. Hopaenena Jesus oo a li ina nyanyaula “oshihati sha tanduka” noi na dima ‘okangodi koshela yomaadi taka twimana.’ (Mat. 12:20) Kala ho yavelele omaliudo ovanafikola. Ngeenge to yandje omayele, ou na okutala ngeenge omunafikola oo to pe omayele omupe ile oku na nale owino wokuyandja oipopiwa. Okukala ho pandula vamwe tashi di komutima otashi ke va pameka va twikile okukala tava ningi ngaashi tava dulu.

Ungaunga nomunafikola keshe monghedi yefimaneko. Ovaroma 12:10 otava ti: “Mokufimanekafana pafaneni oshihopaelelwa.” Oo kae fi tuu omayele mawa kwaavo hava yandje omayele mOfikola yOukalele woPauteokratika! Ngeenge omunafikola omukulunhu kwoove, tula moilonga omayele oo e li mu 1 Timoteus 5:1, 2. Kashi na nee mbudi kutya omunhu oku na omido ngapi, ngeenge oto pe omunafikola omayele oo a kwatela mo okuninga omalunduluko monghedi omo ta ningi oinima, ndele oto shi ningi pahole, ote ke a tambula ko noupu. — Omayel. 25:11.

Ngeenge to pe ovanafikola omayele, va dimbulukifa elalakano ledeulo olo hatu pewa mofikola. Inashi wana ashike okupandula omunhu eshi a yandja oshipopiwa noku mu lombwela kutya na ye koshitwa tashi landula ko. Elalakano lomunafikola ka li fi okukala omupopi nomuhongi oo ta fuula vamwe. (Omayel. 25:27) Otwa hala okulongifa oshali yetu yokupopya opo tu tange Jehova nokukwafela vamwe ve mu shiive nova kale ve mu hole. Ohatu deulwa opo tu kale hatu wanifa po nawa oshilonga osho shi li muMateus 24:14 nosho yo 28:19, 20. Ovamwatate ovo va ninginifwa nova wana, omafimbo amwe otashi dulika va pewe oshinakuwanifwa shokufila oshisho “oufita waKalunga” ve li ovahongi novapopi vomoipafi. — 1 Pet. 5:2, 3.

Lombwela ovanafikola va kale hava lesha diva ouyelele u na sha noitwa oko tava ka longela konima ngeenge ve i pewa. Va ladipika va tule moilonga osho ve lihonga ngeenge tave lilongekidile oitukulwa yavo yomofikola, meenghundafana davo dakeshe efiku, ngeenge tava yandje omatyekosha pokwoongala nosho yo moukalele womomapya.

Oumbapila voipopiwa. Oumbapila ove na okuyandjwa ofimbo ku na oivike itatu, va shangwa omauyelele aeshe.

Oipopiwa oyo ya kwatela mo okuhonga eongalo oi na okupewa ovakulunhuongalo, unene tuu ovakulunhuongalo ovo tava dulu oku i yandja nawanawa nosho yo ovayakuliongalo ovo ve li ovahongi ovanekeka.

Opo u mone kutya oipopiwa ilipi u na okuyandja kovamwatate nosho yo kovamwameme, landula omalombwelo oo haa yandjwa melandulafano lofikola. Ngeenge meongalo leni omu na ovamwatate vanini shi dulife ovamwameme, ovo hava yandje oipopiwa mofikola, shilipaleka kutya oho pe ovamwatate oipopiwa ihapu oyo ya kwatela mo shihapu shihe fi ashike okulesha.

Diladila shi na sha neenghalo doohandimwe ngeenge to yandje oipopiwa. Mbela owa pumbwa ngoo okupa omukulunhuongalo ile omuyakuliongalo oshipopiwa mofikola mefiku tuu omo e na oshipopiwa mOkwoongala kwoPailonga ile moshivike omo ta ka yandja oshipopiwa shomoipafi meongalo? Mbela ou na okupa omumwameme oshipopiwa mefiku omo okaana kaye ke na oshipopiwa, oko tashi dulika a pumbwa oku ka kwafela? Mbela oshikundafanwa osho wa yandja komunafikola otashi mu wapalele ngoo e li omunyasha ile omuudifi ina ninginifwa? Shilipaleka kutya oshipopiwa shonhumba otashi wapalele oshitwa oko omunafikola ta longele.

Shi na sha noipopiwa yovamwameme, omunafikola oye mwene e na okuhoolola onghalo omo ta ka yandja oshipopiwa shaye, te shi ningi metwokumwe nomayele oo e li pepandja 78 no 82. Omumwameme oo ta ka yandja oshipopiwa oku na okupewa oo tave ke shi yandja naye, ndele otapa dulu yo okuwedwa vali omutitatu. Ngeenge omunafikola okwa pula a pewe omunafikola oo tava ka yandja naye oshipopiwa, oo ta wapalele monghalo yonhumba, ota dulu okupewa epitikilo la tya ngaho.

Ofikola onhivali. Ngeenge mofikola omwe lishangifa ovanafikola ve dulife po 50, otamu dulu okuunganeka pa kale ofikola onhivali omo tamu ka yandjwa oipopiwa yovanafikola. She likolelela keemhumbwe deongalo leni, mofikola onhivali otamu dulu okukala hamu yandjwa oipopiwa aishe oyo yovanafikola ile oipopiwa ashike ivali yaxuuninwa.

Ofikola keshe ya wedwa po oi na okukala hai pashukilwa komuyandjimayele a wana, ngeenge otashi dulika na kale omukulunhuongalo. Ngeenge osha pumbiwa, omuyakuliongalo oo a wana ota dulu okukwatela komesho ofikola. Olutu lovakulunhuongalo olo li na okuhoolola ovo tava dulu okukwatela komesho eefikola odo. U li omupashukili wofikola, omu na okukala tamu longele kumwe naao ta pashukile ofikola onhivali, opo u mone kutya ovanafikola ove na okulongela koitwa ilipi oshikando tashi landula.

Eetundi de likalekelwa dokulesha. Ngeenge olutu lovakulunhuongalo ola mono kutya oohandimwe vonhumba meongalo ova pumbwa okuhongwa okulesha elaka olo hali longifwa meongalo, otava dulu okuninga elongekido opo eetundi odo di ningwe pefimbo lOfikola yOukalele woPauteokratika. Eetundi odo otadi dulu okukala da kwatela mo ehongo lopetameko, ile di kale di na sha nokukwafela ovanhu va xwepopale mokulesha kwavo.

Ngeenge itashi shiiva okuninga eetundi odo oshita nOfikola yOukalele woPauteokratika, otadi dulu okuningwa pefimbo limwe li lili. Opo ovo tava hongwa okulesha va mone ekwafo la wana, otashi dulika ve na okuhongwa oule wefimbo lile shi dulife olo hali longifwa mofikola. Ovakulunhuongalo otava dulu okutala kutya oshike sha pumbwa okuningwa po nonaini eetundi odo di na okuningwa. She likolelela komhumbwe oyo i li po, otapa dulu okuningwa omalongekido opo oohandimwe ovo va kale hava hongwa ve li ongudu, ile pauhandimwe.

Oohandimwe ovo ove na okuhongwa komuhongi a pyokoka. Ngeenge otashi shiiva, oshinakuwanifwa osho oshi na okupewa omumwatate oo e shii okulesha nawa noku shii nawa elaka. Ngeenge kape na omumwatate oo a wana, ovakulunhuongalo otava dulu okupula omumwameme oo a wana noku li oshihopaenenwa shiwa. Omumwameme oo oku na okudjala oshikaiwa ngeenge ta hongo eetundi da tya ngaho. — 1 Kor. 11:3-10; 1 Tim. 2:11, 12.

Okambo Apply Yourself to Reading and Writing oka nyanyangidwa momalaka mahapu. Okambo oko oka nuninwa okuhonga vamwe ehongo lopehovelo. Otaku dulu yo okulongifwa oishangomwa imwe, she likolelela kokudula kwaavo va unganekelwa eetundi odo. Ngeenge ovanafikola otava ningi exumokomesho, ove na okuladipikwa va kale hava kufa ombinga pandjikilile mOfikola yOukalele woPauteokratika.

U li omupashukili wOfikola yOukalele woPauteokratika, oto dulu okuninga shihapu opo eongalo li mone ouwa mofikola. Kala ho lilongekida nawa, to shi ningi metwokumwe nomayele oo e li mOvaroma 12:6-8 nokuwanifa po oshinakuwanifwa shoye sha fimanenena osho we lineekelelwa kuKalunga.