Omalombwelo e na sha nokafo Onghalamwenyo yopaKriste nOilonga yOkuudifa

Oshikalimo

1. Omalombwelo aa otaa kwafele aveshe ovo ve na oitukulwa pOkwoongala kwOnghalamwenyo yopaKriste noilonga yokuudifa. Ovo ve na oitukulwa ove na okulesha omalombwelo e na sha noitukulwa yavo, oyo i li mokafo Onghalamwenyo yopaKriste noilonga yokuudifa — Okafo kokulongifwa pokwoongala, ofimbo inave lilongekidila oitukulwa yavo. Ovaudifi aveshe ove na okuladipikwa va kale hava yandje oipopiwa. Vamwe ovo hava endafana neongalo pandjikilile navo otava dulu okukufa ombinga, ngeenge ova itavela osho Ombiibeli tai hongo nongeenge onghalamwenyo yavo oi li metwokumwe nomafinamhango dopaKriste. Omupashukili wokwoongala kwOnghalamwenyo yopaKriste noilonga yokuudifa oku na okukundafana oiteelelwa i na sha nofikola yovaudifi naumwe oo a hala okukufa ombinga mofikola, ashike ke fi omuudifi, opo nee te mu shiivifile kutya okwa wana, ile ina wana. Osho oshi na okuningwa komesho yaao ha konakona naye Ombiibeli (ile komesho yomudali, oo e li Ondombwedi yaJehova). Oiteelelwa oya faafana naao yomunhu oo a hala okuninga omuudifi ina ninginifwa. — od etuk. 8 okat. 8.

OMATYEKOSHA OPEHOVELO

2. Omunute umwe. Oshivike keshe, konima yeimbilo neilikano lotete, omunashipundi wokwoongala kwoshivike osho ota ka tumbula oitukulwa oyo tai kundafanwa pokwoongala oko. Omunashipundi na yandje elitulemo koitwa oyo tai etele unene eongalo ouwa.

OMAMONA OMEENDJOVO DAKALUNGA

3. Oshipopiwa: Ominute omulongo. Oshipalanyole, ile ouyelele oko kwa kanghamena oshipopiwa osho otau hangwa mokafo Onghalamwenyo yopaKriste noilonga yokuudifa. Oshipopiwa osho oshi na okukala hashi pewa ovakulunhuongalo, ile ovayakuliongalo ovo va pyokoka. Ngeenge taku hovelwa nembo lOmbiibeli lipe melesho lOmbiibeli lokoshivike, otaku kala haku danwa okavidio ke na sha netwalemo lembo olo. Omupopi ota dulu okukundafana nghee osho sha ulikwa mokavidio tashi tu kumwe noshipalanyole. Ashike oku na okushilipaleka kutya okwa kundafana oitwa oyo i li mokafo. Ngeenge efimbo otali shi pitike, oku na yo okulongifa nawa omafano oo e li mokafo, oo a nuninwa okuyambidida ouyelele oo tau kundafanwa. Ota dulu yo okuweda mo ouyelele wa dja meedjo dimwe vali, shimha ashike tau tu kumwe noshikundafanwa.

4. Omamona opamhepo: Ominute omulongo. Oshitukulwa eshi osha kwatela mo omapulo nomanyamukulo nokashi na okukala shi na etwalemo, ile exulifo. Oshi na okukala hashi yandjwa kovakulunhuongalo, ile kovayakuliongalo ovo va pyokoka. Ou te shi kwatele komesho oku na okupula ovapwilikini omapulo aeshe. Oku na yo okutokola kutya omishangwa odo da etwa mo otadi leshwa, ile hasho. Ovo tava ningi omatyekosha, nave a ninge moule weesekonde 30, ile dinini.

5. Elesho lOmbiibeli: Ominute nhee. Oshitukulwa eshi oshi na okuyandjwa komumwatate. Omunafikola oku na okulesha eevelishe odo a pewa nopehe na okuninga etwalemo, ile exulifo. Omunashipundi wokwoongala ota ka kala ta kwafele ovanafikola va kale hava lesha mondjila, ve udite ko osho tava lesha, tava lesha oitya tai kunguluka nawa, tava divilike opo sha pumbiwa, tava longifa omawi a yeleka, tava tula opo sha pumbiwa notave shi ningi monghedi i li paushitwe. Molwaashi elesho lOmbiibeli omafimbo amwe ohali kala lixupi, ile lile, omupashukili wofikola oku na okukaleka momadiladilo okudula kwovanafikola ngeenge ta ningi elandulafano.

LONGA NOUDIININI MOILONGA YOKUUDIFA

6. Ominute 15. Oshitukulwa eshi shokwoongala osha nuninwa okupa omhito aveshe ovo hava kufa ombinga moukalele, opo va xwepopaleke onghedi yavo yokukundafana nosho yo ounghulungu wavo wokuudifa nowokuhonga. Ngeenge otashi shiiva, ovakulunhuongalo navo otava dulu okukala hava kufa ombinga mofikola. Omunafikola keshe oku na okulongela koshitwa, kutya nee osha dja mokambo Okuhonga, ile Ulika kutya ou hole ovanhu, osho shi li pamwe noshitukulwa mokafo Onghalamwenyo yopaKriste noilonga yokuudifa. Omafimbo amwe, ota pa ka kala ashike oshitukulwa sheenghundafana novapwilikini. Oshitukulwa osho oshi na okuningwa komukulunhuongalo, ile komuyakuliongalo a pyokoka. — Tala okatendo 15 opo u mone nghee u na okukwatela komesho oshitukulwa sheenghundana novapwilikini.

7. Okuhovela eenghundafana: Oshipopiwa eshi otashi dulu okuyandjwa komumwatate, ile komumwameme. Omuneumbo na kale woukashike kookanhu waao ta yandje oshipopiwa, ile oshilyo shoukwaneumbo. Ovanafikola otava dulu okuyandja oshipopiwa shavo ve li ofika, ile omutumba. — Opo u mone ouyelele muhapu u na sha noshikalimo nosho yo nonghedi yokuudifa ya pamba oshitukulwa eshi, tala okatendo 12-13.

8. Okuninga omalishuneko: Oshipopiwa eshi otashi dulu okuyandjwa komumwatate, ile komumwameme. Omuneumbo na kale woukashike kookanhu waao ta yandje oshipopiwa. (km-E 5/97 ep. 2) Ovanafikola otava dulu okuyandja oshipopiwa shavo ve li ofika, ile omutumba. Omunafikola na ulike nghee elishuneko li na okuningwa. — Opo u mone ouyelele muhapu u na sha noshikalimo nosho yo nonghedi yokuudifa ya pamba oshitukulwa eshi, tala okatendo 12-13.

9. Okuninga ovanhu ovahongwa: Oshipopiwa eshi otashi dulu okuyandjwa komumwatate, ile komumwameme. Omuneumbo na kale woukashike kookanhu waao ta yandje oshipopiwa. (km-E 5/97 ep. 2) Ovanafikola otava dulu okuyandja oshipopiwa shavo ve li ofika, ile omutumba. Oshitukulwa eshi oshi na okuningwa monghedi omo ekonakonombiibeli la fa li li nale metifa. Inava pumbwa okuninga etwalemo, ile exulifo okuninga shapo ovaudifi va pewa va longele koshitwa osho. Ouyelele aushe oo wa yandjwa inau pumbwa okuleshwa, nonande otashi dulika osho shi ningwe.

10. Okuyelifila vamwe eitavelo loye: Ngeenge oshitukulwa eshi oshi li monghedi yoshipopiwa, oshi na okuyandjwa komumwatate. Ngeenge oshi li monghedi yeuliko, otashi dulu okuyandjwa komumwatate, ile komumwameme. Omuneumbo na kale woukashike kookanhu waao ta yandje oshipopiwa, ile oshilyo shoukwaneumbo. Omuudifi na nyamukule epulo mondjila nonelungi ta longifa ouyelele oo u li modjo oyo ya yandjwa. Omuudifi ota dulu okuhoolola okutumbula, ile aha tumbule oshishangomwa omo mwa dja ouyelele oo wa etwa mo moshitukulwa shaye.

11. Oshipopiwa: Oshitukulwa eshi oshi na okuyandjwa komumwatate, tashi yandjwa monghedi yoshipopiwa. Ngeenge oshipopiwa osha kanghamena koshitwa sha dja moshiwedelwako A shokambo Ulika kutya ou hole ovanhu, omuudifi oku na okudivilika nghee ovelishe, ile eevelishe tadi dulu okulongifwa moukalele. Pashihopaenenwa, ota dulu okuyelifa kutya onaini ovelishe tai dulu okulongifwa, eityo layo nosho yo nghee i na okulongifwa, ngeenge to tomhafana naumwe. Ngeenge oshipopiwa osha kanghamena koshitwa sha dja mushimwe shomoileshwa yokambo Ulika kutya ou hole ovanhu, omuudifi oku na okuyandja elitulemo kunghee shi na okutulwa moilonga moukalele. Ota dulu okudivilika oshihopaenenwa osho shi li moshitwa shotete shoshileshwa, ile a divilike ovelishe keshe yomeevelishe da wedwa po, odo di li moshileshwa, ngeenge otashi wapalele.

12. Oshikalimo: Ouyelele oo u li mokatendo aka nosho yo ka shikula ko owa nuninwa oitukulwa “Okuhovela eenghundafana” nosho yo “Okuninga omalishuneko.” Okuninga sha ulikwa, elalakano lomuudifi okulombwela oo ta popi naye oshili yOmbiibeli, she likolelela konghalo yomupwilikini, te shi ningi monghedi i li paunafangwa, nokudika po ekanghameno lokwaaluka. Omunafikola oku na okuhoolola oshikundafanwa shi li pefimbo moshitukulwa shavo. Ota dulu okuhoolola okuhayandja, ile okuyandja oshifo, ile okuhaulika, ile okuulika okavidio okudja mOshikefa shetu shOkuhonga. Ponhele ashike yokukopela euliko, ovanafikola ove na okulongifa eenghedi dokukundafana da yoolokafana, ngaashi okuulika ohokwe nokupopya paushitwe.

13. Eenghedi dokuudifa: Omunafikola oku na okuyandja oshitukulwa shaye ta longifa onghedi yokuudifa, oyo ya ulikwa mokafo, she likolelela keenghalo domoshitukulwa shavo. Pashihopaenenwa:

(1) Okuudifa eumbo neumbo: Onghedi ei oya kwatela mo okuudifa eumbo neumbo, kutya nee oto shi ningi komudidi, pangodi, ile mokushanga onhumwafo, nokuninga elishuneko la kanghamena kwaasho mwa li mwa kundafana eshi wa li to udifa eumbo neumbo.
(2) Okuyandja oundombwedi wohangelela: Onghedi ei oi na sha nokulundululila eenghundafana da keshe efiku mokuyandja oundombwedi. Otai dulu okukwatela mo okuudifila ovo ho longo pamwe navo, ovanafikola vakweni, ovashiinda shoye, ovo wa shakena navo mosheendifo shaaveshe, ile keshe tuu, ofimbo we lipyakidila noilonga ya keshe efiku.
(3) Okuudifa moipafi: Onghedi ei otai dulu okukala ya kwatela mo okuudifa to longifa okatemba, okudengela ovanhu meenhele domangeshefelo, okuudifa mepandavanda, ile meenhele daaveshe, meenhele dokupaakinga eetuwa, ile keshe tuu opo ovanhu tava dulu okuhangwa.

14. Okulongifa ouvidio noishangomwa: Omunafikola ota dulu okuhoolola a ulike okavidio, ile a yandje oshishangomwa she likolelela keenghalo. Ngeenge oshitukulwa shomunafikola osha kwatela mo okavidio, ile okwa hoolola okuulika okavidio, oku na oku ka kundafana, ashike ine ka dana.

OKUKALA OMUKRISTE WASHILI

15. Konima yeimbilo, mominute 15, odo tadi shikula ko, otamu ka kundafanwa oshitukulwa shimwe, ile ivali, oyo tai kwafele ovapwilikini va tule moilonga Eendjovo daKalunga. Oitukulwa oyo oi na okupewa ovakulunhuongalo, ile ovayakuliongalo ovo va pyokoka, kakele keemhumbwe deongalo odi na ashike okuyandjwa kovakulunhuongalo. Ngeenge oshitukulwa oshi li monghedi yeenghundafana, omupopi ota dulu okupula omapulo a wedwa po. Etwalemo laye oli na okukala li li pauxupi, opo shi mu pe omhito yokukundafana oitwa ya fimana, novapwilikini va dule okukufa ombinga. Ngeenge oshitukulwa oshi na omapulaapulo, oo ta pulwaapulwa oku na okuya komutune, ponhele yokukala moipundi, ngeenge otashi shiiva.

16. Ekonakonombiibeli lEongalo: Ominute 30. Oshitukulwa eshi oshi na okukwatelwa komesho komukulunhuongalo oo a pyokoka. (Momaongalo omo mu na ovakulunhuongalo vanini, otaa dulu okulongifa ovayakuliongalo va pyokoka, ngeenge osha pumbiwa.) Olutu lovakulunhuongalo oli na okutokola kutya olyelye a wana okukwatela komesho Ekonakonombiibeli leongalo. Ovo va popilwa ove na okukala tava dulu okukwatela komesho monghedi i li nawa, opo ekonakono li pwe pefimbo, tava divilike omishangwa odo di na enenediladilo, nokukwafela keshe umwe a ude ko efimano laasho tashi kundafanwa. Ovo va nangekwa po otava ka mona ouwa mokulesha omalombwelo e na sha nanghee ve na okukwatela komesho oitukulwa yomapulo nomanyamukulo. (w23.04 ep. 24, oshimhungu) Konima ngeenge oshikundafanwa shoshivike osho osha kundafanwa nawanawa, inashi pumbiwa vali okulelepeka ekonakono. Ngeenge otashi shiiva, naku longifwe ovakwatelikomesho novaleshi va yoolokafana oshivike keshe. Ngeenge omunashipundi wokwoongala kwOnghalamwenyo yopaKriste noilonga yokuudifa okwa pula ekonakono li xupipikwe, oo ta kwatele komesho oku na okutala kutya openi e na okuteta. Ota dulu okuhoolola opo outendo vamwe vaha leshwe.

OMATYEKOSHA OPEXULILO

17. Ominute nhatu. Omunashipundi wokwoongala ota ka endulula pauxupi a twe omufindo oitwa ya fimana oyo ya kundafanwa pokwoongala. Ota kala yo ha tumbula oitukulwa oyo tai ka kundafanwa moshivike tashi landula ko. Ota dulu okutumbula omadina ovanafikola opo e va dimbulukife kutya ove na oipopiwa moshivike sha landula ko, ngeenge ope na efimbo. Omunashipundi na ninge omashiivifo oo a pumbwa okuningwa, ile a leshe eenhumwafo donhumba odo da pumbwa okuleshelwa eongalo moule wominute odo daxuuninwa. Omashiivifo oinima oyo hai ningwa pandjikilile, ngaashi elandulafano lelongekido loilonga yomomapya nosho yo elandulafano lokuwapaleka, kai na okushiivifwa komutune, ndele oku na okutulikwa kekafa lomauyelele. Ngeenge omashiivifo, ile eenhumwafo odo da pumbwa okuleshwa itadi pu moule wominute 3 daxuuninwa, omunashipundi na pule ovamwatate ovo tava yandje oipopiwa oyo i li moshitukulwa Okukala Omukriste washili va ninipike oipopiwa yavo. (Tala okatendo 16, 19.) Okwoongala oku na okuxulifwa neimbilo neilikano.

OKUPANDULA NOKUYANDJA OMAYELE

18. Konima yoshipopiwa keshe shomunafikola, omunashipundi wokwoongala kwOnghalamwenyo yopaKriste noilonga yokuudifa na longife omunute umwe lwaapo, opo a pandule nokuyandja omayele a kanghamena koshitwa osho sha yandjwa. Ngeenge omunashipundi ta shivi ovanafikola ovo ve na oitukulwa, ke na okupopya kutya otava longele koshitwa shilipi. Konima eshi omunafikola a mana oshitukulwa shaye, omunashipundi ne mu pandule, ndele ta popi kutya okwa li ta longele koshitwa shilipi. Na popye opo omunafikola e shi endifa nawa, ile a yelife pahole kutya omolwashike nongahelipi shiwa komunafikola okulongela koshitwa oko. Omunashipundi ota dulu yo okupopya oitwa yonhumba oyo e wete kutya otai dulu okukwafela omunafikola nosho yo ovapwilikini. Konima yokwoongala, ile pomhito imwe tai wapalele, omunafikola ota dulu okupewa omayele taa tungu pauhandimwe e likolelela koshitwa oko a li ta longele, ile kuimwe vali, nomayele oo oku na okukala taa di mokambo Ulika kutya ou hole ovanhu, Okuhonga, ile membo Ofikola yOukalele. Opo u mone ouyelele muhapu u na sha nonghandangala oyo tai danwa komunashipundi wokwoongala Onghalamwenyo yopaKriste noilonga yokuudifa nosho komuyandjimayele omutivali, tala okatendo 19, 24 no 25.

EFIMBO

19. Oitukulwa oi na okuyandjwa moule wefimbo olo la ufwa, nomatyekosha omunashipundi wokwoongala kwOnghalamwenyo yopaKriste noilonga yokuudifa kae na okuningwa a pitilila efimbo olo la ufwa. Nonande oitukulwa oyo i li mokafo Onghalamwenyo yopaKriste noilonga yokuudifa oya ulika kutya oi na efimbo li fike peni, omupopi ina pumbwa okumana ko ominute adishe, ngeenge okwa mana meni lefimbo olo a pewa. Ngeenge oipopiwa imwe yokwoongala oya pitililifa efimbo, omuyandji woshipopiwa oku na okupewa omayele komunashipundi wokwoongala kwOnghalamwenyo yopaKriste noilonga yokuudifa, ile komuyandjimayele omutivali, te a pewa e li oye aeke. (Tala okatendo 24 no 25.) Okwoongala akushe, mwa kwatelwa omaimbilo nomailikano, oku na okupwa moule wovili 1 nominute 45.

ETALELEPO LOMUPASHUKILISHIKANDJO

20. Ngeenge eongalo otali talelwa po komupashukilishikandjo, okwoongala oku na okuningwa ngaashi sha ulikwa mokafo Onghalamwenyo yopaKriste noilonga yokuudifa, kakele koitukulwa tai landula: Ekonakonombibeli lEongalo olo li li koshi yoshitukulwa Okukala Omukriste washili, nali pingenwe po koshipopiwa shomupashukilishikandjo shominute 30. Fimbo oshipopiwa inashi hovela, omunashipundi wokwoongala ota ka endulula pauxupi osho sha kundafanwa metetekelo, ta tumbula pauxupi osho tashi ka kundafanwa moshivike tashi landula, ta ningi omashiivifo oo a pumbwa okuningwa, ta lesha eenhumwafo odo da pumbwa okuleshwa, opo nee ta ifana omupashukilishikandjo a yandje oshipopiwa shoilonga. Konima yoshipopiwa, omupashukilishikandjo na tumbule eimbilo olo a hoolola li xulife okwoongala. Ota dulu okushiva omumwatate umwe a xulife neilikano. Eongalo olo tali talelwa po ka li na okuninga ofikola onhivali pefimbo letalelepo lomupashukilishikandjo. Ongudu yeleka limwe otai dulu okuninga okwoongala kwayo nokuli nongeenge eongalo omo i li otali talelwa po komupashukilishikandjo. Ashike ongudu oi na oku waimina eongalo ngeenge omupashukilishikandjo ta yandje oshipopiwa shoilonga.

OSHIVIKE SHOSHOONGALELE SHOSHIKANDJO, ILE SHOSHITUKULWA

21. Moshivike shoshoongalele shinini, ile shoshitukulwa, eongalo kali na okuninga okwoongala. Eongalo oli na okudimbulukifwa kutya ouyelele oo wa nuninwa okwoongala oshivike osho nau konakonwe komuudifi pauhandimwe, ile komaukwaneumbo.

OSHIVIKE SHEDIMBULUKO

22. Ngeenge Edimbuluko ola wile mokati koshivike, okwoongala kwOnghalamwenyo yopaKriste itaku kala ko.

OMUPASHUKILI WOKWOONGALA KWONGHALAMWENYO YOPAKRISTE NOILONGA YOKUUDIFA

23. Olutu lovakulunhuongalo oli na okuhoolola omukulunhuongalo oo ta kala omupashukili wokwoongala kwOnghalamwenyo yopaKriste noilonga yokuudifa. Oku na oshinakuwanifwa shokushilipaleka kutya okwoongala oko okwa unganekwa nawa notaku ningwa naanaa metwokumwe nomalombwelo oo e li momukanda ou. Oku na okukala ha kundafana nomuyandjimayele omutivali. Ngeenge okafo Onghalamwenyo yopaKriste noilonga yokuudifa oka piti, omupashukili wokwoongala kwOnghalamwenyo yopaKriste noilonga yokuudifa oku na okuninga elandulafano loitukulwa aishe leemwedi mbali. Osho osha kwatela mo oitukulwa yaavo vehe fi ovanafikola nosho yo ovanashipundi vokwoongala kwomokati koshivike. (Tala okatendo 3-16 no 24.) Ngeenge ta dutu elandulafano lovanafikola, oku na okukaleka momadiladilo omido davo, owino nosho yo ngeenge otava dulu tuu okuyandja oshitukulwa osho va manguluka. Oku na okuninga sha faafana, ngeenge ta dutu oitukulwa ikwao yokwoongala. Oitukulwa aishe yovanafikola, oi na okuyandjwa ofimbo ku na oivike itatu efiku loshipopiwa li fike, taku longifwa okafoloma kedina Oshitopolwa shoye pokugongala Onkalamwenyo yopaKriste niilonga yetu yokuuvitha (S-89-OD). Omupashukili wokwoongala kwOnghalamwenyo yopaKriste noilonga yokuudifa oku na okushilipaleka kutya okopi yelandulafano lokwoongala akushe oya tulwa kekafa. Olutu lovakulunhuongalo otali dulu okunangeka po omukulunhuongalo, ile omuyakuliongalo, opo e mu kwafele. Kakele kaasho, ovakulunhuongalo ovo ashike ve na okuninga elandulafano loitukulwa oyo ihe fi yovanafikola.

OMUNASHIPUNDI WOKWOONGALA ONGHALAMWENYO YOPAKRISTE NOILONGA YOKUUDIFA

24. Oshivike keshe, omukulunhuongalo umwe oku na okuhoololwa a kale omunashipundi wokwoongala akushe kwOnghalamwenyo yopaKriste noilonga yokuudifa. (Momaongalo omo mu na ovakulunhuongalo vanini, otaa dulu okulongifa ovayakuliongalo va pyokoka ngeenge osha pumbiwa.) Oku na okulilongekidila etwalemo nexulifo lokwoongala akushe. Oku na yo okushiivifa keshe oo ta ka yandja oshipopiwa, navali she likolelela komuvalu wovakulunhuongalo meongalo, naye ota dulu yo okuyandja oipopiwa imwe, unene tuu oyo ya kwatela mo ouvidio ovo inava kwatela mo eenghundafana novapwilikini. Omatyekosha oo taa ningwa pokati koitukulwa naa kale maxupi lela. Olutu lovakulunhuongalo olo li na okuhoolola ovakulunhuongalo ovo tava dulu okukala ovanashipundi vokwoongala. Ovakulunhuongalo ovo va pyokoka otava dulu okukala hava ningi ovanashipundi omafimbo nomafimbo. She likolelela keenghalo domoshitukulwa sheni, omupashukili wokwoongala kwOnghalamwenyo yopaKriste noilonga yokuudifa ota dulu okukala ha longifwa lwoikando e li omunashipundi. Ngeenge omukulunhuongalo oha longifwa mokukwatela komesho Ekonakonombibeli lEongalo, nopehe na omalimbililo, ota dulu yo okuningwa omunashipundi wokwoongala. Omukulunhuongalo, oo a hoololwa a kale omunashipundi, na kaleke momadiladilo kutya okwa teelelwa a pandule nokukwafela pahole ovo ve na oitukulwa, noku va pa omapukululo. Omunashipundi oku na yo oshinakuwanifwa shokushilipaleka kutya okwoongala otaku pu pefimbo. (Tala okatendo 17 no 19.) Ngeenge oshi li nawa komunashipundi nongeenge komutune oku na onhele ya wana, komutune otaku dulu okukala embako la wedwa po, opo a dule oku li longifa eshi ta shiivifa kutya oshitukulwa shilipi tashi shikula ko, ofimbo omumwatate oo a landula ko ta fikama pembako olo tali longifwa kovayandji voipopiwa. Shikwao vali, omunashipundi ota dulu okukala e li omutumba poshitaafula komutune, eshi elesho lOmbiibeli tali ningwa nosho yo pefimbo loshitukulwa Longa noudiinini moilonga yokuudifa. Kungaho, otashi ka xupifa efimbo.

OMUYANDJIMAYELE OMUTIVALI

25. Ngeenge otashi shiiva, oshiwa okulongifa omukulunhuongalo, oo a wokupopya, oye a kale omuyandjimayele omutivali. Omuyandjimayele omutivali oku na oshinakuwanifwa shokuyandja omayele kovakulunhuongalo novayakuliongalo paumwene, ngeenge osha pumbiwa. Otashi dulika va pewe omayele kombinga yoitukulwa oyo hava yandje pokwoongala Onghalamwenyo yopaKriste noilonga yokuudifa, oipopiwa yomoipafi, okukwatela komesho nokulesha pEkonakono lOshungonangelo, ile Ekonakonombiibeli lEongalo. (Tala okatendo 19.) Ngeenge ope na ovakulunhuongalo vahapu meongalo ovo ve li ovapopi novahongi ovanekeka, otaku dulu okuhoololwa omuyandjimayele umwe e lili omudo keshe. Omuyandjimayele omutivali ina pumbwa okuyandja omayele konima yoshitukulwa keshe.

OFIKOLA ONHIVALI

26. Omaongalo otaa dulu okukala e na eefikola dopavali, she likolelela komuvalu wovaudifi meongalo. Ofikola keshe onhivali oi na okukala i na omuyandjimayele omutivali, oo a wana, noku na okukala omukulunhuongalo. Otaku dulu yo okulongifwa omuyakuliongalo oo e na owino, ngeenge otashi shiiva. Olutu lovakulunhuongalo oli na okutokola kutya olyelye e na okupewa oshinakuwanifwa osho nosho yo ngeenge oshi na okukala tashi li yakulwa, ile hasho. Omuyandjimayele oku na okulandula omalombwelo oo e li mokatendo 18. Ngeenge ope na ofikola onhivali, ovanafikola ove na okupulwa va ye kokanduda okativali eshi taku hovelwa noshitukulwa Omamona opamhepo koshi yoshitukulwa Omamona omEendjovo daKalunga. Konima yaasho, ovanafikola nava waimine vali eongalo, konima eshi oshitukulwa shovanafikola sha pwa.

OUVIDIO

27. Otaku kala haku ulikwa ouvidio vonhumba pokwoongala. Ouvidio vokwoongala kwomokati koshivike otava kala hava kala ko-JW Library® nokutapwa ko taku longifwa oikwaelektronika i lili noku lili.

S-38-KY 11/23