Ehongo olo hatu pewa okupitila mouhamba — Nghee ovapangelwa vOuhamba hava deulwa

KALA wa fa u liwete to tale omupopi e li komutune ndele to limemesha eshi mwa shakenifa omesho. Omupopi oo na kale omumwatate omunyasha womeongalo leni nosho oshikando shotete ta yandje oshipopiwa poshoongalele. Eshi to hafele okupwilikina koshipopiwa shaye, owa kuminwa onghedi omo oshiwana shaKalunga hashi deulwa. Oto dimbulukwa nawa eshi omumwatate oo a yandjele oshipopiwa shaye shotete meongalo nowa kuminwa exumokomesho olo a ninga. Okwa ninga exumokomesho meendelelo eshi a deulwa mOfikola yOkudeula Ovaudifi nosho yo mOfikola yOkudeula Ovakokolindjila. Efimbo opo la di ko, omumwatate oo nomukulukadi waye ova ile kOfikola yOvaudifi vOuhamba. Eshi tamu pandula konima yoshipopiwa shaye shitunhula, owa tala keemhunga odo di li poshoongalele nokudilonga vali kehongo olo hatu pewa tu li oshiwana shaKalunga.

Ombibeli oya xunganeka shi na sha nefimbo olo eshi oshiwana shaKalunga tashi ka kala sha “longwa kOmwene.” (Jes. 54:13) Paife otu li pefimbo olo. Kunena ohatu hongwa okupitila moishangomwa, pokwoongala, poyoongalele nosho yo okupitila meefikola di lili noku lili odo da unganekwa kehangano laJehova nelalakano loku tu kwafela tu dule okuwanifa po oinakuwanifwa yokondadalunde mehangano laJehova. Moshitukulwa eshi, ohatu ka tala nghee ehongo la tya ngaho tali yandje oumbangi wa kola kutya Ouhamba waKalunga otau pangele shili.