Etaleko lovanhu li na sha nokuya meulu
OVANHU ohava kala va tunhukwa neenghono shi na sha netimaumbwile lokuya meulu. Ovamoslema, Ovahindu, Ovabuddha, oilyo yeengeleka dOukwakriste, nokuli novanhu vahapu ovo vehe na ohokwe momalongelokalunga ove na omataleko e lili noku lili e na sha neteelelo loku ka kala nomwenyo konima yefyo. Luhapu ovanhu ohava diladila kutya eulu olo onhele iwa noihafifa omo ovanhu itava ka mona vali oixuna notava ka hangana vali “novaholike vavo ovo va fya.” Ndele eyeletumbulo limwe lonale ola popya shi na sha novanhu vahapu la ti: Keshe umwe okwa hala okuya meulu, ashike kape na oo a hala okufya opo a ye mo. Mbela omolwashike shi li ngaho?
Ndele mbela ngeno okwa li twa shitwa nelalakano lokufya nokuya meulu, mbela ngeno ovanhu vahapu itava ka kala va teelela nodjuulufi okufya ngaashi ashike okaana haka kala ka teelela nodjuulufi okukula ile omunyasha ha kala a teelela nodjuulufi okuhombola ile okuhombolwa? Mepingafano naasho, ovanhu vahapu ihava kala va hala okufya.
Ndele nande ongaho, ovafita vahapu ohava popi kutya ohatu ka ya meulu omo twa nuninwa okukala konima yoweenda wetu muxupi wokombada yedu. Pashihopaenenwa, Theodore Edgar Cardinal McCarrick, oo a li omubisofi omukulunhu, wokuWashington, D.C., okwa ti: “Inatu shitwa tu kale nonghalamwenyo ei tu li muyo. Otwa shitilwa okuya meulu.” Sha faafana, oo a li nale omupresidende wo-National Association of Evangelicals yokOilongo yaHangana, okwa ti: “Elalakano longhalamwenyo olo okufimanekifa Kalunga ndele hatu i meulu . . . molwaashi eulu olo eumbo letu.”
Ovo va itavela kutya ohatu ka twikila okukala nomwenyo meulu ngeenge otwa fi kave na naanaa ouyelele we lixwa po. George Barna, omupresidende wehangano olo hali kongo omauyelele e na sha nomalongelokalunga okwa ti kutya “omataleko [ovanhu vahapu] e na sha nomwenyo nosho yo okukala nomwenyo konima yefyo okwe likolelela komauyelele a dja keedjo di lili noku lili, ngaashi meefilima, meemusika nosho yo momambo omahokololo.” Omufita umwe Omuepiskopal wokuFlorida okwa ti: “Fye katu na eshi tu shii kombinga yeulu, shapo otu shii ashike kutya Kalunga oha kala meulu.”
Eulu oli li oshikundafanwa sha fimana mOmbibeli. Ndele paEndjovo daKalunga, eulu onhele ya tya ngahelipi? Mbela ovanhu ova shitwa nelalakano loku ka kala meulu? Ngeenge ovanhu ohava i meulu, mbela ohava ka ninga mo shike?
[Eendjovo dididilikwedi pepandja 3]
Mbela omolwashike ovanhu vahapu va hala okuya meulu, ndele ihava kala va hala okufya va ye mo?