Ombibeli ohai lundulula onghalamwenyo yovanhu
OSHIKE she linyengifa omukainhu omunyasha a kale ha dulika vali komafinamhango Ombibeli oo a li a hongwa ndele te a efa po? Natu ka tale osho a ti.
“Paife onghalamwenyo yange oi na elalakano.” — LISA ANDRÉ
ODULA OMO A DALWA: 1986
OSHILONGO OMO A DALELWA: LUXEMBOURG
ONAKUDIWA: OMUNYASHA A KANENE
ONGHALAMWENYO YANGE YONALE: Onda kulila muBertrange, okamukunda ka yela, ka amenwa noka hepuluka, popepi noshilando Luxembourg. Otwa dalwa tu li vatano, ame aame onghelo. Ovadali vange Eendombwedi daJehova nova li va longa noudiinini opo va findile mufye omifikamhango dopaKriste.
Eshi nda li ndi na omido omulongo nasha, onda li nda hovela okukala nda limbililwa neenghono shi na sha nomahongo Eendombwedi daJehova. Pehovelo onda li ngoo handi lipwililikile omaliudo oo, ndele mokweendela ko kwefimbo eitavelo lange ola enda tali nghundipala. Ovadali vange ova li va ninga ngaashi tava dulu opo va yukife nge mondjila ya yuka, ndele inandi tambula ko ekwafo lavo. Onda li nda hovela okweendafana novanyasha ovo inava fimaneka ovo ve na eenghonopangelo nonande ovadali vange kava li ve shi shii. Onda li nda hala emanguluko olo ovanyasha ovo va li tava monika va fa ve na. Otwa li hatu i luhapu koivilo, hatu i momilele, hatu nu sha pitilila nokulongifa oingangamifi. Tete onda li nda hafa okukala pamwe novanhu ovo va li tava monika va fa tava hafele onghalamwenyo pauyadi.
Ashike paulelalela, kanda li nda hafa shili. Onghalamwenyo yetu nookaume kange ovo kaya li i na eityo lasha nokapa li oo ha diladila sha lela. Mepingafano naasho, onda li nda nyematekwa koinima ngaashi okuhenouyuki oko kwa hapupala mounyuni. Mokweendela ko kwefimbo, onda li nda polimana neenghono.
NGHEE OMBIBELI YA LUNDULULA ONGHALAMWENYO YANGE: Eshi nda li ndi na eedula 17, efiku limwe onda li nda polimana neenghono. Eshi meme a didilika kutya inandi hafa, okwa li a pula nge ndi konakone vali Ombibeli. Okwa li a ladipika nge ndi konakone omahongo ayo opo ndi dule okutokola ame mwene ngeenge onda hala okukala metwokumwe nao ile hasho. Eenghundafana domoule da tya ngaho oda li da kwafela nge. Onda li nda dimina okukonakona Ombibeli nomukulu wange Caroline nomushamane waye, Akif. Akif okwa li a ninga Ondombwedi yaJehova eshi a kula. Onda li handi dulu okupopya naAkif nda manguluka omolwonakudiwa yaye, naasho osha li sha fimana kwaame.
Onda li ndi shii kutya onghedi yange yokukalamwenyo kaya li tai wapalele Ondombwedi, ashike tete onda li ndi udite kutya onghedi oyo handi longifa onghalamwenyo yange oshinima shopaumwene. Ndele eshi nda konakona Ombibeli, onda uda ko kutya elihumbato lange ohali kumu omaliudo aJehova. (Epsalme 78:40, 41; Omayeletumbulo 27:11) Onda uda ko yo kutya elihumbato lange ohali kumu vamwe.
Eshi nda konakona Ombibeli moule, onda li nda tomwa ndi itavele kutya oi li Eendjovo daKalunga. Pashihopaenenwa, onde lihonga kombinga yomaxunganeko Ombibeli mahapu oo a wanifwa naanaa ngaashi sha li sha xunganekwa. Eshiivo la tya ngaho ola li la kwafela nge ndiha kale vali momalimbililo.
Konima yomudo umwe okudja eshi nda hovela okukonakona Ombibeli, ame novadali vange otwa li twa talela po omukulu wange oo a li omuliyambi koshitaimbelewa shEendombwedi daJehova shomuNdowishi. Eshi nda mona nghee omukulu wange a hafa, osha li sha kuma nge neenghono. Ehafo la tya ngaho olo naanaa nda li nda halelela. Onda li yo nda kumwa okumona Eendombwedi dimwe vali odo de liyamba koshitaimbelewa osho. Oda li da yooloka ko filufilu kovanhu vehe na oshili nohava lalakanene omalihafifo ovo nda kala handi endafana navo. Okudja opo onda li nda ilikana Jehova nomutima aushe, handi mu udanekele kutya onda hala oku mu longela onghalamwenyo yange aishe. Eshi nda li ndi na omido 19, onda li nde liyapulila Jehova nokuninginifwa.
OUWA OO NDA MONA: Paife onghalamwenyo yange oi na elalakano. Onda mona ehafo mokuhonga vamwe Ombibeli opo ve lihonge kombinga yaJehova nomaudaneko aye e na sha nonakwiiwa. Oukwaneumbo wetu owa mona yo ouwa molwaashi itau lipula vali naame.
Ondi shii omanyono ange onale, ashike ohandi kendabala okuhakala handi lipula nao. Ponhele yaasho, ohandi yandje elitulemo kediminepo laJehova nosho yo kokunakonasha naame kwaye. Onda dimina nomutima aushe eendjovo dOmayeletumbulo 10:22, odo tadi ti: ‘Enangeko noupuna lOmwene olo tali likolifa noita weda ko oshilonga shidjuu.’
[Eendjovo dididilikwedi pepandja 10]
“Otwa li hatu i luhapu koivilo, hatu i momilele, hatu nu sha pitilila nokulongifa oingangamifi”
[Eendjovo dididilikwedi pepandja 11]
“Ondi shii omanyono ange onale, ashike ohandi kendabala okuhakala handi lipula nao”