“Efimbo lokuhola nefimbo lokutonda”
“KALUNGA Oye ohole.” Moilongo imwe, ovanhu ohava shange eendjovo odo komafano noku a tulika komakuma momaumbo avo. Eendjovo odo otadi hokolola nawa kutya Kalunga okwa tya ngahelipi, oo e li oshihopaenenwa sha denga mbada shohole.
Ndele nande ongaho, ovanhu vahapu kave shii kutya eendjovo odo oda dja mOmbibeli. Omuyapostoli Johannes oye a shanga a ti: ‘Ou ehe nohole, oye ina shiiva Kalunga, osheshi Kalunga Oye ohole.’ (1 Johannes 4:8) Johannes okwa popya yo kombinga yohole yaKalunga yokuhola ovanhu ovakulilwa, a ti: “Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.” — Johannes 3:16.
Ohole yaKalunga ya tya ngaho otashi dulika i diladilife vamwe kutya Kalunga ote ke tu dimina po alushe nehalo liwa keshe osho hatu ningi. Ovanhu vahapu otava diladila kutya Kalunga ite ke va tokola, kashi na nee mbudi kutya ohave lihumbata ngahelipi, naasho oshi liwetikile monghedi yavo yokukalamwenyo. Ndele mbela osho oshoshili ngoo? Kalunga oku hole ngoo shili ovanhu aveshe, ovo hava longo ouwa naavo hava longo owii? Mbela ope na efimbo limwe Kalunga ha ulike outondwe?
Ohole oyo oukwatya waKalunga wa tongomana u dule outondwe
Ohamba inaendunge Salomo oya ti: “Ashishe shi notundi yasho ya pangelwa, noshinima keshe shokoshi yeulu oshi nefimbo lasho . . . efimbo lokuhola nefimbo lokutonda.” (Omuudifi 3:1, 8) Efinamhango olo otali ulike kutya nonande Kalunga omunahole nomunalukeno, ope na omafimbo amwe oo ha ulike outondwe.
Tete natu ka taleni kutya oshitya ‘okutonda’ osho sha longifwa mOmbibeli otashi ti shike. Embo limwe lomauyelele ola ti: “Pamishangwa oshitya ‘okutonda’ oshi na omaityo mahapu. Otashi dulu okutya outondwe munenenene wa kwatela mo onghone. Outondwe wa tya ngaho otau dulu okuningifa omunhu a kale a hala okuyahameka oo e tonde.” Eityo olo olo tu shii nawa, notu wete oidjemo youtondwe wa tya ngaho mounyuni aushe. Embo olo tuu olo ola ti: “‘Okutonda’ otaku dulu yo okuulika kokukala uhe hole nandenande oshinima shonhumba ndele ino lalakanena oku shi ningila owii.”
Eityo etivali olo tali kundafanwa moshitukulwa eshi. Eityo olo otali ulike koutondwe munene wokunyanyala omunhu, ndele inau kwatela mo onghone, okuhenonghenda ile ehalo loku mu ningila owii. Mbela Kalunga ota dulu okukala noutondwe wa tya ngaho? Didilika osho sha popiwa mOmayeletumbulo 6:16-19, a ti: “Oinima ei i-6 Omwene te i tondo, noinima i-7 oyo oixuna komwenyo waye: omesho elinenepeko, elaka li noipupulu, nomake taa tileshi ohonde i he netimba, omutima tau diladila omauko maii, eemhadi tadi endelele okuninga owii, ondombwedi i noipupulu tai tandavelifa oipupulu ndee ta kunu eemhata mokati kovamwaina ovalumenhu.”
Omushangwa oo otau ulike kutya ope na oinima yonhumba oyo Kalunga e tonde. Ashike osho inashi hala okutya oku tonde ovo hava ningi oinima ya tya ngaho. Oha tale komatomheno onhumba, ngaashi ounghundi wombelela, omudingonoko, onghedi omo omunhu a tekulwa nosho yo okuhashiiva sha. (Genesis 8:21; Ovaroma 5:12) Omushangi wOmayeletumbulo okwe shi yelifa a longifa oshihopaenenwa shiwa a ti: “Ou Omwene e mu hole Ye ote mu hanyene, heeno, ngaashi xe ta hanyene omona waye e mu hole.” (Omayeletumbulo 3:12) Omudali otashi dulika a kale e tonde eenghatu dokuhadulika domona ndele natango oku mu hole nota ningi keshe osho ta dulu e mu kwafele a efe po elihumbato laye lii moku mu pa outekuduliko. Omolwohole yaye, Jehova oha katuka onghatu ya faafana ngeenge oku wete kutya omunyoni ota dulu okukwafelwa.
Onaini hashi kala pauyuki kuKalunga okutonda ovanhu vonhumba?
Ongahelipi ngeenge umwe okwa shiiva ehalo laKalunga ndele ina hala oku li longa? Omunhu ngeenge ota longo owina oinima oyo Kalunga e tonde ita ka kala a hokiwa kuYe. Pashihopaenenwa, Ombibeli oya ti: “Omwene ota konakona ovayuki, ndelenee ovahenakalunga naau e hole owii, omwenyo waye otau mu tondo.” (Epsalme 11:5) Ovo tava longo owii ndele itave livele ombedi itava diminwa po, ngaashi omuyapostoli Paulus e shi yelifa nawa monhumwafo oyo a li a shangela Ovaheberi a ti: “Ngenge hatu nyono owina nande twa shiiva oshili, itapa kala vali eyambo molwomatimba, ndelenee eteelelo letokolo alike la tilifa, nehandu lomundilo wokulungwinifa ovanandubo.” (Ovaheberi 10:26, 27) Omolwashike mbela Kalunga omunahole ta katuka onghatu ya tya ngaho?
Ngeenge omunhu ota nyono enyono la kwata moiti owina, owii otau kala we mu kanyatela neenghono noite u efa po. Ota dulu okunyonaukilila nokukala ita dulu vali okulunduluka. Ombibeli oya faafanifa omunhu a tya ngaho nongwe oyo itai dulu okulundulula omavala ayo. (Jeremia 13:23) Ovanhu ovo itava dulu vali okulunduluka, ova longa osho Ombibeli tai shi ifana ‘etimba laalushe,’ olo itave li diminwa po. — Markus 3:29.
Osho osho naanaa sha ningwa po shi na sha naAdam naEva nosho yo Judas Iskariot. Molwaashi Adam naEva ova li va shitwa va wanenena, na Kalunga okwa li e va pa oshipango sha yela nawa kuvo aveshe nova li ve shi udite ko, otashi ulike kutya ova nyonena owina nokave na elipopilo. Eendjovo odo Kalunga a li e va lombwela konima eshi va nyona otadi ulike kutya ka li e va pa omhito ve livele ombedi. (Genesis 3:16-24) Nonande Judas ka li a wanenena, okwa li e na ekwatafano lopofingo nOmona waKalunga ndele okwa li e mu kengelela. Jesus okwa popya shi na sha naJudas a ti kutya “omona wekano.” (Johannes 17:12) Ombibeli oya ulika yo kutya Ondiaboli oyo ya kala tai nyonene owina oule wefimbo oya teelela ashike ehanauno. (1 Johannes 3:8; Ehololo 12:12) Oohandimwe va tya ngaho kava li vali ve holike kuKalunga.
Ndele otashi hekeleke okushiiva kutya ovanyoni vamwe ove na omhito yokulivela ombedi. Jehova omulididimiki noiha hafele okuhandukila ovo tava nyono omolwokuhashiiva sha. (Hesekiel 33:11) Ote va shivi ve livele ombedi opo va dule okudiminwa po. Jesaja 55:7 okwa ti: “Omudinikalunga na efe ondjila yaye nomukolokoshi omadiladilo aye, ye a alukile Omwene, opo nee Ye ote mu file onghenda; ye na ehene kuKalunga ketu, osheshi puye ope nedime po lomatimba mahapu.”
Etaleko li li pandjele li na sha nohole nosho yo outondwe
Tu li ovahopaeneni vaKalunga nOvakriste vashili, otu na okukala tuu shii kutya onaini shi li “efimbo lokuhola nefimbo lokutonda.” Onghenda ya pitilila otai dulu okuningifa umwe aha kale e na etaleko li li pandjele li na sha nohole nosho yo onghenda. Ndele eendjovo domuhongwa Judas otadi dulu oku tu kwafela tu kale netaleko la yuka li na sha nokukala nonghenda nosho yo okutonda oulunde, odo tadi ti: “Vamwe va fileni onghenda nokutila nokutonda oshikutu shavo sha nyatekwa kombelela.” (Judas 22, 23) Onghee hano, otu na okutonda osho shii ndele havanhu vo vene ovo hava longo osho shii.
Ovakriste ova lombwelwa yo va ulikile ovatondi vavo ohole moku va ningila ouwa. Jesus okwa ti: “Holeni ovatondi veni, ilikaneneni ovahepeki veni.” (Mateus 5:44) Osho osho sha ningifa Eendombwedi daJehova diha efe po okuudifila ovanhu vakwao lwoikando onghundana iwa yOuhamba waKalunga, nokuli nonande vamwe ihava tambula ko etumwalaka olo. (Mateus 24:14) Molwaashi etaleko lado ola vyulwa kOmbibeli, oda tala ko kutya omunhu keshe ota dulu okufilwa onghenda nokukala e holike kuJehova. Ngeenge eenghendabala dado dokukwafela ovanhu inadi tambulwa ko ile da tewatewa ile tadi hepekwa, ohadi landula omayele omuyapostoli Paulus oo taa ti: “Nangekeni noupuna ava tave mu taata. Nangekeni noupuna, nye inamu finga . . . Inamu alulila nande omunhu owii waye.” (Ovaroma 12:14, 17) Ohadi kaleke momadiladilo kutya Jehova ota ka tokola kutya olyelye e lilongela ohole ile outondwe waye. Oye ta ka tokola xuuninwa ngeenge tashi uya pomwenyo ile efyo. — Ovaheberi 10:30.
“Kalunga Oye ohole” shili. Ndele atushe otu na okuulika olupandu li na sha nohole yaye mokuninga eenghendabala tu konakone kutya ehalo laye olilipi noku li longa. Eendombwedi daJehova domoshitukulwa sheni otadi ka kala da hafa oku ku kwafela u lihonge okudja mOmbibeli yoye kutya ehalo laKalunga olilipi nosho yo nghee to dulu oku li longa monghalamwenyo yoye. Ngeenge owa ningi ngaho, oto ka henuka okulonga osho Kalunga e tonde noto ka kala u holike kuYe.
[Eendjovo dididilikwedi pepandja 13]
“Oinima ei i-6 Omwene te i tondo, noinima i-7 oyo oixuna komwenyo waye: omesho elinenepeko, elaka li noipupulu, nomake taa tileshi ohonde i he netimba, omutima tau diladila omauko maii, eemhadi tadi endelele okuninga owii, ondombwedi i noipupulu tai tandavelifa oipupulu ndee ta kunu eemhata mokati kovamwaina ovalumenhu.” — OMAYELETUMBULO 6:16-19
[Eendjovo dididilikwedi pepandja 14]
“Ngenge hatu nyono owina nande twa shiiva oshili, itapa kala vali eyambo molwomatimba, ndelenee eteelelo letokolo alike.” — OVAHEBERI 10:26, 27
[Eendjovo dididilikwedi pepandja 15]
“Omudinikalunga na efe ondjila yaye nomukolokoshi omadiladilo aye, ye a alukile Omwene, opo nee Ye ote mu file onghenda . . . osheshi puye ope nedime po lomatimba mahapu.” — JESAJA 55:7
[Efano pepandja 14]
Omudali omunahole ta pe omona waye outekuduliko opo e mu kwafele
[Efano pepandja 15]
Ovanadolongo vahapu ova mona ouwa mohole nomonghenda yaKalunga