Omapulo Opambibeli A Nyamukulwa

Ombibeli oi li ngoo shili Eendjovo daKalunga?

Ombibeli oye likalekelwa, naasho osho shi na okukala molwaashi oi li Eendjovo daKalunga. Eembibeli omabiliyona ohadi nyanyangidwa momalaka omafele. Ounongo oo u li mOmbibeli ou na eenghono dokuxwepopaleka onghalamwenyo yovanhu. — Lesha 1 Ovatessaloniki 2:13; 2 Timoteus 3:16.

Otu shii kutya Ombibeli oya dja kuKalunga molwaashi oya xunganeka oshili i na sha naasho tashi ka ningwa po monakwiiwa. Kape na omunhu ta dulu okuninga ngaho kuye mwene. Pashihopaenenwa, diladila embo laJesaja. Okopi yembo olo oyo ya li ya ningwa omido di dulife pefele manga Jesus ina dalwa oya li ya hangwa mekololo popepi nEfuta la Fya. Oya li ya popya kutya oshilando Babilon itamu ka kala vali ovanhu. Exunganeko olo ola li la wanifwa omido dihapu konima youkalele waKristus wokombada yedu. — Lesha Jesaja 13:19, 20; 2 Petrus 1:20, 21.

Osha enda ngahelipi opo Ombibeli i shangwe?

Ombibeli oya shangwa moule womido di dulife 1 600 lwaapo. Oya shangwa kovanhu 40 lwaapo nova li ve na enenediladilo limwe nopehe na okukondjifafana. Osho osha enda ngahelipi? Ova li va wilikwa kuKalunga. — Lesha 2 Samuel 23:2.

Omafimbo amwe Kalunga okwa li ha popi novashangi vOmbibeli okupitila movaengeli, momamoniko ile meendjodi. Luhapu, Kalunga okwa li a tula omadiladilo aye momadiladilo ovashangi noku va efa va hoolole eendjovo odo tava ka longifa opo va yelife etumwalaka laye. — Lesha Ehololo 1:1; 21:3-5.