OSHIPALANYOLE SHOKOMBADA | NGEENGE UMWE OO U HOLE A FYA
Mbela osha puka okukala wa nyika oluhodi?
Mbela owa kwatwa nande nale kouvela wa kwata moiti oule wefimbo lixupi? Otashi dulika wa li wa veluka diva ndele to dimbwa ouyahame oo. Ashike oluhodi itali yelekwa nouyahame. Omuxungimwenyo, Alan Wolfelt, okwa shanga membo laye Healing a Spouse’s Grieving Heart a ti: “Kape na oshinima hashi kwata olule shi dulife okukala wa nyika oluhodi.” Okwa weda ko a ti: “Mokweendela ko kwefimbo nosho yo kekwafo lavamwe, oho ende to xwepopala.”
Pashihopaenenwa, diladila nghee tatekulululwa Abraham a li e linyenga eshi a li a filwa omukulukadi waye. Ombiibeli oya ti: “Abraham e uya keefya daSara noku mu lila.” Outumbulilo “noku mu” otau ulike kutya okwa kala olule a nyika oluhodi.a Ope na vali oshihopaenenwa shaJakob, oo a li a lombwelwa oipupulu kutya omonamati waye, Josef, okwa dipawa koifitukuti. Okwa kala “omafiku mahapu” a nyika oluhodi noilyo youkwaneumbo waye oya li ya nyengwa oku mu hekeleka. Oluhodi lomonamati ola kala le mu wilila po neenghono oule womido. — Genesis 23:2; 37:34, 35; 42:36; 45:28.
Abraham okwa li a nyika oluhodi omolwefyo lomuholike waye, Sara
Sha faafana, nokunena ovanhu vahapu ohava kala va nyika oluhodi ngeenge va filwa. Natu ka taleni koihopaenenwa yopavali.
Gail, womido 60, okwa ti: “Omushamane wange Robert okwa fya mo 9 Juli 2008. Fimbo omushamane wange ina ya koilonga ongula yefiku olo a fya, otwa li twe lixupita, twa papatelafana na keshe umwe okwa lombwela mukwao ta ti, ‘ondi ku hole’ ngaashi hatu shi ningi shito. Ndele onda kala oule womido hamano nda nyika oluhodi. Nghi shii ngeenge nandi ka dimbwe omuholike wange, Rob.”
Etienne, womido 84, okwa ti: “Nonande omukulukadi wange okwa fya pa pita paife omido di dulife po 18, natango onde mu djuulukwa nohandi kala nda nyika oluhodi omolwefyo laye. Efimbo keshe handi mono oshinima shihokwifa meshito, ohandi mu diladila nohandi lipula kutya ngeno opo a li ngeno ota ka kala yo e shi hafela.”
Osha yela kutya okukala twa nyika oluhodi efimbo lile oshi li paushitwe. Ovanhu ohava kala va nyika oluhodi meenghedi da yoolokafana, onghee hano, kashi li pandunge okutokola vamwe. Sha faafana, nafye inatu pumbwa okukala hatu litokola fye vene ngeenge otwa nyika oluhodi efimbo lile. Ongahelipi to dulu okuungaunga nonghalo yokukala wa nyika oluhodi?
a Omonamati waAbraham, Isak, naye okwa kala a nyika oluhodi efimbo lile. Natango pefimbo opo Isak okwa hangika a nyika oluhodi omolwefyo laina, Sara, oo a fya konima yomido nhatu. — Genesis 24:67.